Kenniinsi tajaajila Paaspoortii ariifachiisaa yeroof adda citeera

Finfinnee #Ethiopia Bitootessa 20,2015(YMN) Tajaajilli Immigireeshiniifi Lammummaa kenniinsi tajaajila Paaspoortii ariifachiisaan yeroof addaan cituu beeksiseera.

Tajaajilichi kenniinsa tajaajila Paaspoortii idilee dabalataan kenniinsa tajaajila Paaspoortii ariifachiisaa Waajjira ol'aanaafi dameelee waajjirichaa naannolee 11’tti argamanitti bifa yaaliin kennaa turuu yaadachiisuun, yeroo ammaa dhimmatoonni humnaa ol baay’achuurraan walqabatee sanadoota waliin dhahuun uumamuu eereera.

Kana malees tajaajilamtoonni tajaajila argachuuf halkan wayita gara tajaajilichaa dhufan namoonni dhuunfaa seer-maleeyyiin tajaajilamtootaafi kenniinsa tajaajilaarratti rakkoo uumaa jiraachuu ibsameera.

Kanaaf dandeettiin keessummeessuufi rakkooleen biroon hanga sirreeffamanitti kenniinsi tajaajila Paaspoortii ariifachiisaa waajjira olaanaattis ta’e waajjiraalee dameetti yeroof addaan cituu eerameera.

Tajaajilamtoonni imala ariifachiisaa qaban waajjira olaanaa qofaatti ragaalee isaanii dhiyeeffachuun hojiimaata kanaan dura ittiin hojjetamaa tureen Bitootessa 20,2015 har'a irraa eegalee kan keessummeeffaman ta’uu beeksiseera.

Tajaajilamtoonni dallaalota seer-maleeyyiirraa akka of eeggatan tajaajilichi yaadachiiseera.

Tajaajilli kenniinsa Paaspoortii idilee adeemsuma kanaan dura tureen kan itti fufu ta’uu ragaan tajaajilicharraa argame mul'iseera.