Adeemsi Paartiiwwan morkattootaa sirrii miti!

 

Finfinnee Caamsaa 24/2016(YMN) Paartiiwwan tokko tokko marii biyyaalessaa akka biyyaatti xiyyeeffannoo ol’aanaa qabuuf xiyyeeffannoo waan kennan hinfakkaatu.Paartiiwwan morkattoonni jalqabuma irraa eegalee sababa fudhatama hinqabneen marii biyyaalessaa hindeeggarre jiru.Kanneen keessaa tokko Koongransii Federaalawaa Oromoo(KFO)dha.

Dura taa’aan paartii kanaa Piroofeesar Mararaa Guddinaa kanumaan dura marii biyyaalessaa gadi qicaa turan.Sababiin isaan dhiyeessaniifi hunda amansiisuu hindandeenye ‘komishiiniin marii biyyaalessaa Badhaadhinaaf aantummaa qaba,isaaf looga’ kan jedhudha.Himannaan kun medaallii kamiiniyyuu fudhatama argachuu hindanda’u.Soba waan ta’eef.

Adeemsi komishiiniin marii biyyaalessaa ittiin hundeeffameefi erga hundeeffamee boodas hojiin hojjechaa jiru dhokataa miti.Komishinichi wayita marii’f qophaa’aa turetti wanti dhokasaatti raawwate kan qabatamaan beekamu hinjiru.Jibba kanumaan dura barameen ‘hooggantoonni komishinichaa paartii biyya bulchaa jiruuf aantummaa qabu’ jechuun himachuun ummata bal’aadhaan taajjabamuun ala gatii hinqabu.

Paartiin ‘Innaat’ jedhamuufi KFO’n marii biyyaalessaatti waan hirmaachuu didaniif mariin biyyaalessaa gufachuu hindanda’u.Adeemsa hanga ammaatti jiruunuu paartiiwwan kun faallaa deemanis mariin biyyaalessaa hingufanne.Sochiin gara fuulduraatti komishinichaan taasifamus milkaa’aa ta’uusaa mariin ajandaawwan marii dhiyeessuuf bulchiinsa Magaalaa Finfinneetti taasifame milkaa’inaan xumuramuun ragaa qabatamaadha.

Mariin biyyaalessaa akka filannootti kan fudhatamu miti.Paartiin ‘Innaat’ jedhamu tibba mariin eeglametti marii keessaa ba’uusaa ifoomseera.Paartichi waltajjii marii biyyaalessaa irraa ba’uunsaa dhiibbaan komishinicha irratti uumuu danda’u jira jedhamee hinyaadamu.Paartichi muuxannoo ‘KFO’ irraa fudhateen waltajjii marii keessaa ba’uusaa ifoomseera.Koongransiin Federaalawaa Oromoo kanaan dura jala ga’ee filannoo biyyaalessaa keessaa ba’uunsaa miidhaan uume jiraa?KFO’n shira michootasaa waliin qabuun filannicha keessaa ba’uun filannoo hanbisuu hindandeenye.

Akkuma kana paartiiwwan morkattoonni kanneen biros sababa hojii komishinii marii biyyaalessaa gufachiifna jedhuun xumura irratti marii keessaa ba’uun  hiika tokkollee hinqabu.Kan isaaniif wayyu gaaffiiwwan ummata bakka bu’anii qabachuudhaan waltajji marii biyyaalessaa irratti ga’uumsaan hirmaachuu ture.

Paartiiwwan morkattoonni adeemsa marii biyyaalessaa keessaa ba’uun paartii biyya bulchaa jiru ‘Badhaadhina’irratti miidhaan geessisuu danda’u hinjiru.Paartiin Badhaadhinaa akkuma paartiiwwan morkattoota kanneen biroo marii biyyaalessaatti kan hirmaatu waan ta’eef medaallii kamiiniyyuu paartiin amma Itiyoophiyaa bulchaa jiru ‘Badhaadhinni’ paartiiwwan morkattoonni tokko tokko waltajjii marii biyyaalessaatti waan hinhirmaanneef gufuun itti uumamu nijira jedhamee hinyaadamu.

Mootummaan Itiyoophiyaa hojiin komishiinii marii biyyaalessaa akka milkaa’uuf kutannoodhaan deeggarsa akka taasisu kanaan dura irra deddeebiidhaan himeera.Akkaatuma waadaa seeneetiin komishinichaaf deeggarsa hinqusatamne taasisaa waan jiruuf hojiin komishiinii marii biyyaalessaa milkaa’inaan itti fufeera.Jalqabbiin jiru haqa qabatamaan dirree irra jiru kan mul’isudha.Boqonnaan marii Finfinneetti milkaa’inaan xumurame Magaalaa Dirree Dawaafi Naannolee kanneen biroo keessatti kan itti fufu ta’a.

Ummanni bal’aan mariidhaan rakkoo keessaa ba’uu barbaada waan ta’eef mariin biyyaalessaa eegalamuusaatiin gammachuunsaa daangaa kan qabu miti.Marichi waan jalqabameefis tibbana gammachuusaa ibsachaa tureera.Sababa kanaan humnoota mariin biyyaalessaa akka gufatuuf carraaqan dura dhaabbata.

Paartiiwwan morkattoonni ummataaf hojjenna jedhan yoo haqaan deeggartoota isaaniitiif kan hojjetan ta’an miidhama irraa of baraaruuf sochii hojii komishiinii marii biyyaalessaatti gufuu ta’uuf taasisan irraa of qusachuu qabu.Jibba paartii biyyaa bulchaa jiru irratti qaban irraa ka’uun hojii komishinichaa gufachiisuuf carraaquun umurii isaanii gabaabsuudhaan ala bu’aan argamsiisuuf hinjiru.