Yaa’ii Marii Biyyaalessaa Booda Maaltu Ta’a?

 

(YMN, Hagayya 13, 2018) Yaadawwan biyya ceesisu jedhamaniifi hirmaattoonni yaa’ii marii biyyaalessaa  turtii baatii tokkoo booda qindeessan Roobii har’aa ragga’u jedhamee eegamaa jira.Ajandaawwan saddeettan komishiiniin marii biyyaalessaa qopheesse irratti qaamoleen hawaasaa adda addaa lakkoofsaan kuma afur ta’an itti hirmaatan yeroo baatii tokko caaluuf mari’achaa turaniiru.

Komishiiniin marii biyyaalessaa akka himetti marii taasifameen bu’aan baay’oota gammachiisuufi komishiniichis ittiin boone galmeeffameera.

Amma wanti irra jiraan xumurameera.Yaadawwan Itiyoophiyaa ceesisanis qophaa’aniiru.Yaadawwan hirmaattoonni yaa’ichaa itti amanan har’a kan ragga’an ta’a.

Yaadawwan ragga’an qaama yaadawwan kana hojiirra oolchuuf komishiinichaan kan dhiyaatan ta’a.Hirmaattoonni yaa’ichaa aanaalee biyya keenyaa hunda keessaa walitti baba’an imaanaa ummanni bal’aan itti kennate ba’aniiru.

Isaan gootota Itiyoophiyaati.Falmii yaadaa taasisuudhaan rakkooleen Itiyoophiyaa waggoota hedduuf ummata dararan fala waaraa akka argataniif carraaqqii hinqusatamne taasisuudhaan bu’aa barbaadamu galmeesssisuu danda’amiiru.Dhaloota dhufuun ‘bara akkanaa keessa abboonniifi haadholiin keenya durii hojii akkanaa hojjechuudhaan haala nuuf mijeessaniiru’ jechuudhaan kan dubbatan ta’a.AAkk

Yaadawwan marii biyyaalessaatiin ragga’an wantoota baay’ee kan jijjiiran ta’a jedhamee eegama.Wantoota jijjiiraman ykn. Akka fooyya’u taasifaman keessaa tokko Heera Mootummaa Itiyoophiyaa amma tajaajilaa jirudha.

Heerri Mootummaa Itiyoophiyaa bara sirna Waayyaannee qophaa’ee ragga’e akka qondaaltoonni Waayyaannee yeroo sanii barbaadaniifi fedhanitti qophaa’uudhaan kan hojiirra ooledha.Heerichi erga hojiirra oolee boodas wantoonni heerichaan hayyamamaniifi fedhi Waayyaanneetti gufuu ta’u jedhamanii yaadaman guutummaatti akka hojiirra hinoolle taasifameera.Adeemsa abbaa irrummaa Waayyaanneetu gufuu ta’ee ture.

Kanaaf Heerri Mootummaa Itiyoophiyaa akka fedhii Waayyaanneetti hojiirra oolfamaa ture akka fedhiin ummattoota Itiyoophiyaa kabajamuufi eegamutti kan sirraa’u ta’a.Heericha fooyyessuuf bu’uura kan ta’an yaadawwan hirmaattoota marii biyyaalessaatiin ragga’anidha.

Gama birootiin humnoonni yaa’ii marii biyyaalessaa gufachiisuuf socho’aa turan yaadawwan marii erga ragga’aniifi heerri mootummaas erga fooyyeeffamee booda sagalee gungumaafi mormii dhageessisuun isaanii waan hinoolledha.Yaa’iin marii biyyaalessaa utuu hinxumuramin adeemsa yaa’ichaa keessaa ba’uudhaan kan jarjaranii ibsa baasanis mormiisaanii kan itti fufan ta’a

Sababoota adda addaa tarreessuudhaan mormanis dhimmi ummanni bal’aan irratti waliigale duubatti deebisuu hindanda’an.Garuu akkuma barame mormiifi qeeqa amansiisaa hintaane afarsuudhaan bu’aa siyaasaa argachuuf kan socho’an ta’a.

Adeemsa isaanii fokkisaa Kanaan ammoo ummanni hinfayyadamu.Nimiidhama malee bu’aan adeemsa jireenyaa keessatti argachuu danda’ullee hinjiru.Kan fayyadamu daldaaltoota siyaasaa qofadha.Daldaaltoonni siyaasaa akkuma baran dhimmcha afarsaa jiraachuu barbaadu.Kana ammoo itti fufiinsaan kan godhan bu’aa ergamtummaa diina keessaafi alaatiin argatan eegsifachuuf jecha akka ta’e hubachuun barbaachisaadha.Humnoonni kun akka Kanaan duraatti roorrifna jedhanii socho’u taanaan qaamonni mootummaa dhimmi isaan ilaallatu ammoo ol’aantummaa seeraa kabajisiisuutu irraa eegama.