Gamna Akka Abbichuu!

 

(YMN,Finfinnee Onkololeessa 11,20190) Abbichuun Keeniyaatti Biqiltuu dhaaban.Biyya Ollaa Keeniyaattis yaadama misooma Ashaaraa Magariisaatiin biqiltuu dhaabuun isaanii hiika guddaa qaba.Akkuma Itiyoophiyaan Misooma Ashaaraa Magariisaatiin beekamte Keeniyaanis akka beekamtu barbaadna jechuudha.
Ministirri muummichi Itiyoophiyaa Dr.Abiy Ahmad haala gara gubbaatti suuraadhaan argaa jirtan Kanaan Keeniyaatti biqiltuu kan dhaaban ayyaana guyyaa gootota Keeniyaa durii 'Maasuujaa' kaleecha Keeniyaatti kabajame irratti kabajaan affeeramanii erga hirmaatanii boodadha.

Guyyaan gootota durii Keeniyaa kun akkuma ayyaana inifannoo Adwaa keenyaatti kan ilaalmudha.Akkuma nuti waggaa waaggadhaan guyyaa inifannoo Adwaa waggoota 100 dura galmeeffame yaadachuudhaan waggaa waggaan kabajinu Keeniyaanoonnis guyyaa bittaa kolenooffannoo Ingiliiz ofirraa itti darbatan waggaa waggadhaan yaadachuudhaan kabajatu.

Michummaaniifi ollummaan gaariin Itiyoophiyaan Keeniyaa wajjin qabdu kun biyyaalee ollaa kanneen biroo wajjiis akka jiraatuuf Itiyoophiyaan fedhii guddaa akka qabdu nibeekama.Kanneen  fedhii Itiyoophiyaatiif iddoo hinkennine ammoo jiru.

Hooggantoonni biyyaalee ollaa Itiyoophiyaa tokko tokko, keessumattuu hoogganaan Eertiraa Isaayyaas Afawarqii biyya diina Itiyoophiyaa taate Egypt'f ergamaa ta’uudhaan ollummaan gaariin Itiyoophiyaafi Eertiraa jidduu akka hinjiraanneef gufuu ta’uudhaan turaniiru.

Hoogganaan Eertiraa gocha ollummaa Itiyoophiyaafi Eertiraatti gufuu ta’uu irraa of qusatanii hinadabatan taanaan miidhaan irra ga’u hammaataa akka ta’u ministirri muummichi Abiy Ahmad Gaaffiifi Deebii Afaan Tigriffaatiin tibbana taasisan irratti mamii tokko malee akeekkachiisuun  himuun sirriidha! Biyyaafi dhaloota dhufuuf jecha waan yerootti raawwatamuu qabu yeroonsaa utuu hindarbin raawwachuun barbaachisaadha.Haqa kana gamna akka Abbichuu qofaatu beeka.

Qondaaltoonni Eertiraa akeekkachiisa Dr.Abiy kennan kana olola sobaa baraniin qolachuuf  akkasumas gadi qicuuf socho’aa akka jiran hubatameera.Fakkeenyaaf Asmaraa dabalatee sadarkaa misoomaa magaalaawwann Eertiraafi Magaalaawwan Itiyoophiyaa irratti argaman walibira qabuun waan Abbichuun ibsa kennaniin  nama hubachiisuuf yaalan faallessuudhaan ‘maallaqa biliyoona hedduu liqeeffachuudhaan misoomni Itiyoophiyaa hojjetame’ jechuun wayita ololan dhaga’ameera.

Oduu himaan mootummaa Eertiraa Yamaana Gabramasqal waan kana  fuulleetti ba’uudhaan dhimma kana irratti akka dubbate beelameera.Namtichi kun dhimmoota Itiyoophiyaa kamirrattuu faallaa dubbachuudhaan beekama.Ergamtoota Egypt Asmaraa kaawwatte keessaa tokko waan ta’eef waanuma irraa eegamu raawwachaa jira.

Amma dubbiin dhugaa itti himame olola sobaatiin ofirraa qolachuu qofa miti.Isa kana kanumaan durayyuu  onnatanii raawwachaa turan.Sochiin ergamtummaadhaan Itiyoophiyaa irratti raawwachaa turan akka malee guutee iddoo dhabee dhangala’aa jira.

Adeemsi qondaaltoonni Eertiraa Itiyoophiyaa keessatti ergamtoota bobbaasuudhaan Nagaa Itiyoophiyaa jeequun sochiin misoomaafi guddinnaa akka duubatti harkifatuuf taasisaa turan ammaan boodas akka itti fufuuf qamni hayyamuufi obsa qabaatu amma Itiyoophiyaa keessa hinjiru.Abbichunuu waan isa ta’eef garaa bal’atee hanga ammaatti obsuu danda’e.

Kanaaf obsi Abbichuun ciniinnatee ittiin tures ammaan booda jiraachuu akka hindandeenye ergaa guddaa adda babayiirratti dabarsetu ragaa qabatamaadha.Muummichi ministiraa Itiyoophiyaa Abiy Ahmad waan yaadee karoorfatee dubbate hojiirra utuu hin’oolchin duubatti hindeebi’u.Haala mijaawaa amma jiruttis fayyadamuunsaa waan hinoolledha.Akkaataa ittiin fayaydamus nibeek.

Haalli mijaawaan jiru maalidha?kan jalqabaa Eertiraa dhiyeenya kana loltotashii gara Itiyoophiyaa seensisuudhaan gocha weereeruufi birmadummaa Itiyoophiyaa sarbuu karaa Zaalaanbassaatiin raawwattee jirti.Kun ragaa qabatamaa tokkodha.Akka seerri idila ddunyaa hayyamutti biyyi weereerame humna qabutti fayyadamuun humna birmadummaasaa jalaa sarbe ofirraa qolachuudhaan tarkaanfii irratti  fudhachuu danda’a.Kan biraa qondaaltoonni garee seeraan alaa ABUT konkolaattoota 800 dabalatee qabeenya Itiyoophiyaa irraa saaman fudhachuun gara Eertiraatti baqataniiru.

Karoorri isaanii beekamaadha akkuma Kanaan dura gamoojjii Eertiraa keessa waggootaaf turuudhaan Mootummaa Itiyoohiyaa irratti miidhaa geessisaa turan achitti gurmaa’anii deeggarsa diinni Itiyoophiyaa taasisuufitti fayyadamun turtii yeroo dheeraatiin mootummaa Itiyoophiyaa waraana riphxee loltummaatiin dadhabsiisuudhaan taayitaa irraa fonqolchuudha.Kan gochuu danda’anis,beekumsi qabanis kanuma waan ta’eef tooftaa dur beekanitti deebi’an.Doofummaadhaan xaxaman waan ta’aniif haala ammaafi kan durrii jidduu garaa garummaan ol’aanaan akka jiru hubachuu hindanda’an.

Mootumaan Ida’amuu ammoo kanaaf akka yeroo hinkennineef afaanuma sirritti beekaniin hubachuu akka danda’aniif itti himeera.Tuffii ittiin beekamanitti yoo cichanii hafan hundumtuu dhumn isaanii baranuma akka ta’e beekamaadha.Umurin Shaabiyaatis ta’e kan ABUT gabaabbachaa jira.Akkuma ummanni Naannoo Tigraay taasise ummanni Eertiraatis Shaabiyaan saggoosaa qabee jireenya gadadoo keessa isa turtsiise akka irraa fonqolfamuuf qaamolee dhimmi ilaallatuuf haala kan mijeessu ta’uunsaa waan hin’oolledha.Waan hundumaa arguuf jirra,Fayyaa ta’aa! waan dubbiftaniif galatoomaa!