Ayyaana Cuuphaa baranaafi xiiqii Ummataa

 

Finfinnee Amajjii 11.2015(YMN) Humnoonni tokko tokko yeroo ummanni baay’een walga’utti haawaasa irra miidhaan akka ga’u taasisuudhaan dhaga’amtummaa argachuuf carraaqu.Taateen humnoota kanaa kanaan dura waltajjiiwwan ummanni bal’aan itti hirmaatu irratti mudatee agarree jirra.

Akka fakkeenyaatti wantoota mudatanii darban yaadachuuf kanaan dura Magaalaa Finfinneetti sirna kabaja Damaraa Masqalaa irratti jeeqamsi akka ka’u taasisuudhaan hawaasa irra miidhaan akka ga’u taasifameera.

Ayyaanni Sooma hiikaa Ramadaanaa wayita kabajamuttis haaluma walfakkaatuun miidhaan akka ga’u taasifameera.Kana malees yeroo jalqaba hooggansa jijjiiramaatti iddoo muummichi ministiraa Dr.Abiy Ahmad argamuun adda babayii Masqalaatti haasawa dhageessisanitti waxabajjii 16 boombii darbachuudhaan yaaliin ajjeechaa taasifameera.

Waan kana hunda kan raawwate diina keessaafi alaati.Diinni alaafi keessaa qindoomina uumuudhaan bu’aa siyaasaa galmeessifachuuf carraa kamittuu kan fayyadamu ta’uunsaa waan beekamuuf mootummaan tibba ayyaanaafi waltajjiin hawaasa hedduu hirmaachisu wayita adeemsifamutti of eeggannoon cimaan akka taasifamuuf hawaasa dammaqsa.Humnoonni tasgabbiitiis qindoominaan akka hojjetan taasisuudhaan miidhaan diinni keessaafi alaa geessisuuf karoorfatu akka hin milkoofneef carraaqqii hinqusatamne taasisa.

Haala qabatamaa amma jiruun ummanni bal’aan dhugaa kana sirritti qalbeeffachuudhaan mootummaadhaaf deeggarsa gamasaa taasisaa jira.Tumsa Ummanni taasisuun ammoo diinoonni keessaafi alaa mataa gadi qabachuuf dirqamu.Kunis qabatamaan mul’achaa jira.

Kan fagoo dhiifnee ayyaanuma Cuuphaa baranaa wajjin walqabatee hirmaannaa ummanni taasise ilaaluun gahaadha.Ayyaana Kataraa kaleessa kabajame irraa eegalee hirmaannaan ummanni nagaan amansiisaan akka jiraatuuf taasise ol’aanaadha.Kutannoon ummanni mul’ise kun ammoo humnoota tasgabbii kan onnachiisuufi nagaan amansiisaan akka jiraatuuf daran akka hojjetan kan taasisudha.

Ummanni haala kanaan xiiqeeffachuun Nagaasaatiif kan dhaabbate adeemsa diina keessaafi alaa akkasumas qindoomina isaanii sirritti waan hubateefidha jechuun nidanda’ama.Hirmaannaan ummataa utuu jiraachuu baatee ayyaana Kataraafi Cuuphaa ummanni miliyoonaan lakkaa’amu itti hirmaate irratti rakkoon mudachuun isaa waan hinoolle ture.

Odeeffannoon dhimma tasgabbii ayyaana Kataraafi Cuuphaa ilaalchisuudhaan hanga yoonaatti poolisiin kenne jiraachuu baatus ayyaanni Kataraafi Cuuphaa haala ho’aa ta’een kabajamee darbeera.Ayyaana Kataraafi Cuuphaa Finfinnee qofarratti kanneen bilbila moobaayilaa hatan namoonni 13 too’annoo jala oolfamuusaaniitiin ala wanti poolisiin hime hinjiru.Taabotoonni hindeebine waan jiraniif hundumtuu erga deebi’anii booda gabaasa qindeessuun tarii odeeffannoon dabalataa qaama tasgabbiirraa nikennama jedhamee eegama.

Hundumaafuu ammaan booda ummata jidduutti jeeqamsi akka ka’u taasisuudhaan bu’aa siyaasaa galmeessifamuuf socho’uun mootummaa irratti dhiibbaa geessisuuf wixiffachuun bu’aan argamsiisuu danda’u akka hinjirre hubatamaa dhufeera.

Karaa nagaatiin socho’uudhaan waan ummata fayyadu hojjechuuf carraaquudhaan ala falli biraa hinjiru.Humnoonni kamiyyuu ummata irraa deeggarsa argachuu kan barbaadan yoo ta’e diina alaa wajjin qindaa’uudhaan socho’uun salphina isaan goonfachiisuun ala bu’aan argamsiisuuf gonkumaa akka hinjirre waanuma isaan mudachaa jiru irraa hubachuu qabu.

Sababoota gara garaa uumuun humnaan socho’uudhaan mootummaafi ummata walitti buusuudhaan bu’aan argamuu danda’u akka hinjirres carraaqqiin isaan kanaan dura taasisuudhaan jalaa fashalaa’e ragaa qabatamaadha.Gibtsiifi diinoota alaa kanneen biroo irraa deeggarsa argachuun mootummaafi ummata Itiyoophiyaa hinjilbiinfachiisu.Fayyaa ta’aa!

Maddi suuraa:FBC