Koloneel Baacaa Hundee Eenyuu?

 

Finfinnee #Ethiopia Amajjii 19,2015 (YMN)  Biyyasaanii amanamummaan tajaajiluudhaan; kabajaafi daangaashii eegsisuudhaan waadaa seenan hojiitti hiikuudhaan gootota dirreewwan waraanaa adda addaatti qabsoo taasisaa turan keessaa Koloneel Baacaa Hundee isaan tokko.

Keessumaa yeroo weerara Somaaliyaa dirqama loltummaan gaafatuun ol Jigjigaafi Dirre Dhawaarratti samii Ogaadeenirratti xiyyaarota waraanaa Ameerikaa ‘F5’ jedhamu balaliisaa miigiiwwan diinaa barbadeessuudhaan gootummaa gita hinqabne raawwachuunsaanii ni yaadatama.

Kanaafis meedaaliiyaa guddaa mootummaarraa badhaafamuuf qaqqabaniiru. Abbaan oolmaa biyyaa guddichi kun jabduu ga’umsi loltummaasaanii irraa mul’ate loltummaa dinqii dhaloonni ittiboonuufi seenaawwan hojjetaniiru.

Jabduuwwan kanneen keessaa yeroo waraana Somaaliyaatti waraana qilleensarraatiin miigiiwwan diinaa daaraa gochuunsaanii kan eeramuudha. Ilma Itoophiyaa cimaa kan ta’an Koloneel Baacaa Hundee, qofaasaaniis ta’e hiriyootasaanii wajjin dirreewwan waraanaa biroorratti hanga aarsaa lubbuutti kanfaluuf qophaa’anii gootummaa guddaadhaan kabajamuu daangaa biyyasaaniitiif qabsaa’aniiru.

Ijoollummaa

Baacaa Hundee kan dhalatanis ta’e guddatan Holotaatti. Oggaa umuriinsaanii barnootaaf ga’u Mana Barnootaa Dajjaazmaach Mangashaa Yilmaa duraanii Holotaatti argamutti hanga kutaa 8ffaatti baratan.

Ijoollummaasaaniitti kolfaafi tapha jaalachaa akka turan miiltoon barnootaasaanii Hayilamaarqoos Fayyisaa ni dubbatu. “Baacaa kan bare oggaa umuriidhaan daran xiqqaa ture. Baacaan tapha dooqaa jaalataayyu. Oggaa boqonnaaf kutaadhaa baanu fiigee gara dirree deema ture” jechuun ibsu.

Akka barattoota kaanii barnootarratti xiyyeeffachuurra tapha baay’isaa akka turanis ni dubbatu. Ta’us Baacaan uumamaan sammuu gaariidhaan kan badhaadhan waan ta’aniif otoo homaa hindhiphatiin qabxii gaarii galmeessisaa akka turan hiriyaansaanii kun ragaa bahu.

Qaxalee Baacaan qormaata ministirii kutaa 8ffaatti firii gaariidhaan darbus manneen barnootaa baay’ee magaalota aanaas ta’e konyaatti argaman waan kutaa 8ffaa caalaa hinbarsiisneef maatiinsaanii kallattummaan gara mana barnootaa duraan Maa’iraga Hiwot Qadaamaawwii Hayilasillaasee Ambotti galchan.

Otoo barataa kutaa 10ffaa jiraniis guyyaa hineegamne tokkotti mooraa mana barnootichaatti oduun tokko dhaga’ame; innis Humni Qilleensaa miseensa fo’aa akka jiruudha.

Humna Qilleensaa

Manni Barnootaa Maa’iraga Hiwot Waxabajjii bara 1957 yeroo barumsi barichaa xumuramettiifi hunduu qormaatasaanii fudhatanitti qondaaltonni humna qilleensaa yuniformiisaanii miidhagaadhaan bareedanii; mormasaanii ol qabanii as bahan qalbii barattoota baay’ee hawwatan.

Baacaanis akkuma barattoota kaanii humna qilleensaatti mindeeffamuuf hiriiruufi qormaata fudhachuuf xiqqumallee hinmamne. Qormaaticha waan darbeef miiltoowwansaanii kaan wajjin gara Bishooftuu geeffaman.

Namoota mindeeffamuuf fo’aman 65 wajjin ta’uun xayyaara C-54 jedhamuun imalanii leenjii loltummaatiif gara Asmaraatti ergaman.

Baacaan umuriidhaanis ta’e qaamaan leenjitoota kaanii gad ta’anis shaakallii loltummaa cimaa humna qilleensaa jabinaan darban. Umuriisaanii daa’imummaatti naamusaanis ta’e hojiisaaniitiin galateeffamaa ta’uu danda’an. Onkoloolessa bara 1958 leenjichi xumuramee hunduu gara sadarkaa appireentisummaatti ce’an.

Imala jireenyaa ittaanuun hunduu yeroo itti beekumsa horataniifi teknolojiiwwan haaraa wajjin walbaran waan ta’eef barumsicha kan fudhatan Baacaadhaaf rakkisaa hintaane.

Waggaa lama booda oggaa eebbaaf ga’an Appireentis Baacaa Hundee akaakuuwwan barnootaa 15n firii olaanaa galmeessisanii darban. Keessumaa Barnootaa Ingiliffaafi Herregaan; beekumsa qaama xiyyaaraafi motoraatiin qabxii olaanaa fiduun 3ffaa bahanii sadarkaa Juuniyar Erkiraaftimaan jedhamu argatanii hojiitti seenan.

Hojii

Seenaan hojii Juuniyar Erkiraaftimaan Baacaa Hundee kan jalqabamu eebba booda ramaddii qilleensaa 2ffaan Asmaraa; erga kutaa siphaa Iskuwaadironii waraanaa 126ffaatti ji’a Onkoloolessaa bara 1960 ramadamanii kaasee ture.

Iskuwaadironicha keessatti keessumaa oggaa xiyyaara waraanaa F=86tti makaanikummaan ramadaman dhugaadhumatti waan kallattii jireenyaa gaarii qabatan fakkaatan; Juuniyar Erkiraaftimaan Baacaan makaanikummaa xiyyaaraatiin Asmaraa ji’oota 15f kan turan yoo ta’u, yeroowwan kanneenittis beekumsa argatan hojiirra oolchuudhaan ittigaafatamtootasaanii biratti galataafi dinqisiifannaa argatanii turan.

Yeroo sanatti Juuniyar Erkiraaftimaan Baacaan akkuma humni qilleensichaa waggaa waggaadhaan taasisu teknishiyaanonniifi miseensonni humni qilleensichaa kaanis gara gara balaliisummaatti akka makamaniif beeksisa baasee isaanis iyyata galfatan. Kanaafuu, hunduu milkaa’ee ji’a Sadaasaa bara 1961 teknishaanummaarraa gara balaliisummaatti imala eegalan.

Dacheerraa gara Samii

Carraa balaliisummaa humni qilleensaa baasetti fayyadamuuf baay’onni hawwanis qormaata fayyaa kaan darbanii carricha argachuu kan danda’an kanneen qubaan lakkaa’aman turan. daraggaggoota bara sana dorgoman keessaa hundi milkaa’eefii mana barrootaa balalii seenuu danda’an muraasa keessaa tokko Baacaa hundee turan.

Juuniyar Erkiraaftimaan Baacaan ulaagaalee balaliisummaa hunda guutanii miiltoo koorsii P-19A ta’uudhaan barumsa iskuwaadiroonii balalii sadarkaa jalqabaa Dirre Dhawaatti argamuuyyu; ittaansees iskuwaadironii barnoota balalii bu’uuraa 32ffaa Asmaraa turetti makaman.

Guddina si’aayaa

Haalli guddinaa Dhibbaalaa Ittaanaa Baacaa si’aayaa akka ture kan ragaa bahan miiltoowwansaanii, fedhiifi dandeettii balaliif qabaniin otoo walirraa hincitiin sadarkaarraa gara sadarkaatti guddachaa akka turan dubbatu.

Kanaafis kan ragaa ta’u erga balaliisummaan eebbifamanii booda akkuma sanaan ji’a Onkoloolessaa bara 1963 Iskuwaadironii barnoota balalii jeettii 33ffaa Hararitti argamutti makamuun jeettii T-33 jedhamtuufi balalii barsiisuuf oolturratti akka leenji’an ramadamuusaanii ture.

Hanga ji’a Amajjii bara 1964ttis akkuma barnootasaanii T-33 xumuraniin kallattummaan wiingii oppireeshinii Iskuwaadironii waraanaa 1ffaa Asmaraatti argamutti ramadamanii dirqamarratti hirmaachuu jalqaban. Jidduuttis sadarkaasaaniitiin gara dhibbaalummaa guutuutti guddatan.

Turtiisaanii xiyyaara F-86 balalii dirqamaatiin keessumaa oggaa waraanni kaabaa cimaa deemetti deddeebii balalii 80 caaluun gocha boonsaa raawwachuusaaniirrayyuu onneefi kutattummaa agarsiisaa turan kan irratti mul’ate ta’uun galmaa’eeraaf.

Baacaan wayita Asmaraa turanittis barnootasaa idilee kutaa 10ffaatti addaan kutanii galgala ittifufuudhaan achuma, Asmaraatti qormaata kutaa 12ffaa (maatirikii) fudhachuufi qabxii gaarii galmeessisaniiru. Qaxalummaasaaniitiinis keessumaa ittigaafatamtootasaaniitiin tilmaama gaarii argamsiisuufiisaarrayyuu yoo ittigaafatamummaan kennameef bahachuu akka danda’anis kan agarsiise ture. Sababuma kanaan bara 1967 ji’a Amajjii keessa koorsii balaliisummaa akka fudhataniif carraan kennameefi erga baratanii booda barsiisaa gahumsa qaban ta’uunsaanii mirkanaa’ee waraqaa ragaa argatan.

Ta’us yeruma sanatti humni qilleensaa ‘F5A’tti dabalee xiyyaara waraanaa haaraa ‘F5E’ laayar jedhamu hidhachuuf qophiirra waan turaniif Dhibbaalaa Baacaa dabalatee balaliistonni jahaafi teknishiyaanonni torba maallaqni callaan kanfalameefii gara Ameerikaa deeman; ittigaafatamummaan guddaanis irra kaa’ame.

Xiyyaarri ‘F5E’ ittiin leenji’an gararrummaa qilleensaa keenya mirkaneessuuf daran murteessaa ta’uusaarrayyuu haleellaa qilleensaa weeraraa Mootummaan Ziyaad Baarree nurratti aggaame ga’umsaan faccisuuf daran barbaachisaa turte.

Haaluma kanaan leenjii bu’uura ce’umsaafi koorsii barsiisummaa hunda ji’a Bitootessaa bara 1968 xumuranii gara biyyasaaniitti deebi’an.

Dirqama murteessaafi balaliisummaa jeettii

Ji’a Baacaan gara biyyaatti deebi’anitti sadarkaansaanii dhibbaalaarraa gara Irreessummaatti yoo guddatu, ramaddiin hojiisaaniis bakka duraan ture, Asmaraa Iskuwaadironii waraanaa qofaa irraa gara dirree 9ffaa Hararitti argamuutti jijjiiramuun balaliisaa dabalataanis barsiisummaa balaliitiin tajaajiluu eegalan.

Wayitiin kun tattaaffii Irreessaa Baacaan hojiif qaban hammam cimaa akka ture kanitti agarsiisaniif yeroo addaa ture. Sirumayyuu ittigaafatamtoonni dhiyoon Irreessaa Baacaa hojiisaanii idileenis ta’e dabalataatiin mudaa kan hinqabne ta’uun, oduufi qoosaarra hojiidhaan qabamuu filachuunsaanii; dhaga’amummaafi muuxannoo kitaaba dubbisuu kan qaban ta’uun, bakka ramadamanitti ga’umsa qabaachuu qofa otoo hintaane bakka bu’aa kanhinqabne ta’uunsaanii ragaan bahameeraaf.

Keessumaa wayitiin sun yeroo rakkooleen turaniifi weerarri Somaaliyaa bara 1969 golboobaa ture waan ta’eef humni qilleensaas weeraricha faccisuuf qabsoon ittitaasifamu; daangaa ittisuufi qoccollaa Somaaliyaa dhiyeenyatti hordofuu; yoo barbaachisaa ta’es diinarratti tarkaanfi fudhachuu kan gaafatu waan tureef oggaa waraanni golboobe dho’u Irreessaa Baacaafi miiltoowwansaanii naannawa qilleensaa biyyasaanii se’achiisuurra halkanii guyyaa cichanii kanitti tattaafatan; guyyaa tokkoti qofa deddeebiiwwan balalii yeroo saddeetii ol taasisuuf kan dirqamaniifi dirqama qilleensarraatiin xiyyaarota Somaaliyaa wajjin haallitti wal’aansoo keessa seenan uumame.

Gootummaan Irreessaa Baacaa Hundeefi miiltoowwansaanii akka Laggasaa Tafarraa; Ashannaafii Gabratsaadiq; Bazzaabbih Pheexiroos, Mangistuu Kaasaafaan firaafis diinaafis /ifa ta’e.

Xiyaarota waraanaa diinaa qilleensarraa harcaasuun Afrikaan ala addunyaa guutuutti dinqisiifannaa mo’annaa raawwataniinis naannawa qilleensaa biyyasaanii kabachiisan.

Lafarrattis raayyaa ittisaatiif deeggarsa qilleensaa dhiyeenyaan kennuufi balaliiwwan mil’annaa gochuudhaan injifannoo gita hinqabne raawwatan. Akkuma gootota filatamoo kaaniif taasifame Irreessaa Baacaanis xiyyaarota miigii diinaa qilleensarratti rukutanii buusuun; dirqamawwan haleellaa daran murteessoo qilleensarraa Hargeessaafi Barbaaraa miiltoowwansaanii wajjin ga’umsaan raawwataniin meedaaliiyaa jabduu olaanaa lammaffaa biyyattii badhaafamuuf qaqqabaniiru.

Badhaasicha dura wayituma waraanichaatti guddina muudama guddina sadarkaa Kumaalummaa argachuudhaan gara sadarkaa qondaalummaa olaanaatti ce’uu danda’an.

Aarsaan kallattiilee hundaan waraanichaan raawwatame laayyoo hinturre; baay’onni wareegamaniiru. Miidhaan qaamaa irra qaqqabeera. Humna qilleensaa keessatti hiriyoonni dhiyooniifi miiltoowwan Kumaalaa Baacaa utuma xiyyaarrisaanii farra xiyyaaraa diinaatiin rukutamaa jiruu utaaluuf dirqaman, harka diinaatti kufan, sababuma kanaan lubbuunsaanii darbe ykn hidhaadhaan hiraarfaman turaniiru.

Garuu hunduu gatii biyyaaf kanfalamu waan ta’eef aarsaasaaniitiin Itoophiyaan waraana weerartuu Somaaliyaa ari’achuudhaan daangaashii kabachiiste. Jabduun goototaas kunoo dhalootaa dhalootatti ce’aa yaadannoo seenaa jiraataa ta’eera.

Hiree ittaanu

Jireenyi goota jajuufi sadarkaa olaanaaf qaqqaban kanaa rakkoo keessa galuu kan eegale bara 1972 keessumaa wayita qondaala Duulaafi Barnootaa Reejimantii Waraanaa 3ffaa ta’uun gara Dirre Dhawaatti jijjiiramanittiifi xiyyaara miigii 21 irratti yeroo balalii ce’umsaa taasisanii ramadamanirraa eegalee ture.

Kumaalaa Baacaan gara miigii 21tti kan ce’an erga waraanni Somaaliyaa injifannoodhaan goolabamee booda wajjin kufuunshii kan ibsame; gootummaa danuun kanitti raawwatame; biyya keenyaafis oolmaa baay’ee kan hojjette xiyyaarri F5 sababa jijjiirraa meeshaafi kanneen birootiin oggaa tajaajilaaf baatu balaliistonni achirra turanis gara xiyyaarota birootti jijjiiramuun waan dirqama tureef.

Sadarkaa Kumaalaarra kan qaqqaban Baacaa Hundee qondaalummaa sararaa keessaa bahanii leenjii ajaja addaafi istaafi qondaalummaa olaanaaf isaan kaadhimu fudhachuufi mudaa tokko malee qabxii qubsaadhaan darbuun xumuruu danda’aniiru.

Ta’us jireenyisaanii sana booda akka isaan eegan ta’uu hindandeenye. Akkuma bakakkaa waantonni baay’een tasa irratti walfuran. Ittigaafatamtoonnisaanii duran dinqisiifannaa olaanaa arjoomaafii turan wajjin walittibu’iinsa keessan seenan.

Bara 1972 hanga 1978tti jireenyisaanii kan gidiraa malee kan nagaa hinturre. Kallattiin goota kitaaba dubbisuu, waa hubachuufi garraamummaadhaan daran beekamanii ni jijjiirame. Guddinnisaanii humna qilleensaa akka tasaatti ol furguggifamaa tures danqamuu qofa otoo hintaane gadi sigigaachuu jalqabe.

Kunniin hundi maaliif, akkamitti ta’e? kan jedhu hunda maxxansa kanaan tarreessuu baannus miiltoowwansaanii baay’een sirriitti dhiyeenyaan yaada wajjummaan bareechanii beekan qabuuyyu. Boodarratti sadarkaa koloneelummaarra kan qaqqaban Baacaa Hundee kan kanneen hundaan isaan gahe waan itti amanan raawwachuurraa duubatti kan hinjenne; mirgasaanii kan hinxuqsiisne; fedhii namootaafis ta’e dhiibbaa hinbarbaachisneef kan hinjilbeeffanne akka ta’an kaasu.

Amallisaanii kunis keessumaa ittigaafatamtootasaanii muraasa wajjin walittibu’iinsa keessa kan isaan galche yoo ta’u; isaan ammoo dhugaa qabatan qabatanii du’uu malee mo’atamuu diduurratti cichanii waan dhaabataniif akka ta’e ka’a.

Hojiirraa dhorkamuu; hidhamuu; mindaa dhorkamuufi kkfn ajandaalee ittaanuun isaan ilaallatan ta’a.

Garuu, jireenyisaanii sana booda akka duraa abdiiqabeessa hinturre. Walittibu’iinsiif sukkuummiin waggootaaf ittifufes Letenaal Koloneel Baacaan namarraa qoollifachaa; ejjennoosaaniitti caalaatti cimanii qormaatawwan hunda jabinaan fudhachuuf qophii ta’an.

Qofummaansaanii ittihammaataa; hanguma namootarraa caalaatti fagaachaa deeman jireenyasaanii abdiiqabeessa turerraa fagaatan.

Walakkeessa ji’a Bitootessaa bara 1977tti Ittigaafatamummaa Kutaa Nageenya Balalii Qajeelchaa Duulaarraa ka’anii gara ramaddii qilleensaa 6ffaatti jijjiiramuudhaan balaliisaa seesiinaa akka ta’aniif ramadaman. Utuma achi jiraanuuti eegaa, biyya keessatti namarraa fagaataa; akkuma qofuma filatan hunda dhumarrattis hunda gatanii biyyaa bahuu furmaata kan taasifatan.

Ji’a Bitootessaa bara 1978tti Leetanaal Koloneel Baacaan wayita balaliisaa Seesiinaa turanitti balalii kennameef tokko raawwachuuf gara Asmaraatti ergamu.Erga achitti dhimmicha raawwatanii booda balalii deebii eegalu. Bakki deebiisaanii garuu Sudaan ture. Akkasis ta’ee jireenyi godaansaasaanii jalqabame. Sudaanirraa Ameerikaatti galuun bulchiinsa Kaaliforniyaa bakka jireenyasaanii taasifatan. Waggoota 30fis utuu qofummaa keessaa hinbahiin barootaaf achumatti dabarsan.

Bara 2008 garuu akka tasaa manasaanii keessatti lubbuunsaanii darbuun dhaga’ame. Barasaani xumuraatti otoo hingammadiin jiraatanii otoo lammiin hinqaqqabiiniif haala suukanneessaadhaan du’anii argamuunsaanii firootaafi dhibantootasaaniitti gaabbii ulfaataa ta’ee ture.

Ta’us duuti haala jireenyaa kan biraa waan ta’eef oggaa boqochuunsaanii himamu miseensonni humna qilleensaafi ijoolleensaanii walgargaaranii sirna awwaalchaasaanii raawwataniiru.

Ijoolleensaanii sadan qaamolee dhimmi ilaallatu wajjin walta’uun waa’ee du’a abbaasaaniitti gaddi hamaan ittidhaga’amus gumaachi biyyasaaniitiif taasisan waan isaan marareef yoo lubbuudhaan gara biyyasaaniitti deebi’uu baatanis lafeensaanii biyyasaaniitti haa boqotu jechuun tibbana kabajaan akka boqotu taasifameera.

Maddi:Gaazexaa Bariisaa