Obboleeyyan Keenya Nijajjabeessina,Dafaa Galaa!

  

(YMN,Finfinnee Sadaasa 08/2017) Burjaaja’anii karaa nagaa irraa maqanis koodeewwan keenyadha.Obboleeyyan keenya sababoota adda addaatiin dogongoran karaa nagaatti hatattamaan akka deebi’aniif ammallee nijajjabeessina.

Tibbana Ummanni Oromoo godinaalee adda addaa keessa jiraatu adda babayiitti ba’uudhaan ‘Izigoo’ jechuun waaqa kadhate.Ijoolle! qayeetti deebi’aa! jedhee watwaate.Hiriira nagaa adeemsifame irratti wanti Oromoon hundi sagalee tokkoon dhageessise garaa nama nyaata.

Hamma yoomiitti nagaa dhabuudhaan dararamnaa?Hamma yoomiitti yaaddoodhaan jiraanna? Maaloo ijoollee bosona keessaa ba’uudhaan gara qayeetti deebi’aa jechuun irra deddeebiidhaan dhalasaa gaafate.

Waamicha Nagaa dhiyaate  fedhiifi faayidaa baran akka dhaban yaadda’uudhaan kanneen gadi qicuuf yaalan jiraatanis ijoolleen Oromoo hedduun wamicha nagaa dhiyaateef awwaachaa jiru.Gaaffii ‘deebi’aa galaa’ jechuun ummanni dhiyeesseef deebii kennaa jiru.

Odeeffannoowwan maddawwan odeeffannoo adda addaatiin tamsa’aa  jiran dhugaa qabatamaa kana kan mul’isanidha.Akkaataa kanaan miseensoonni garee shanee karaa Nagaatiin Rayyaa Ittisa Itiyoophiyaatti  harka kennachaa jiru.Ijoolleen suraa isaanii daawwattan kun godina shawaa lixaatti harkasaanii Raayyaa Ittisa Itiyoophiyaatti kan kennatanidha.

Miidiyaan hawaasummaa Raayyaa Ittisa Itiyoophiyaa akka gabaasaa jirutti miseensoonni shanee waamicha nagaa dhiyaateef fudhachuudhaan deebi’aa jiru.Kun waan jajjabeeffamidha.Nagaan bu’uun hundatu fayyadama waan ta’eef lammiiwwan karaa dogongoraa irraa deebi’aa jiraniif deeggarsa barbaachisaa ta’e hunda taasisuun dirqama hundaati.

Odeeffannoon Biiroon Komunikeeshinii Mootummaa Naannoo Oromiyaa baasaa jirus haaluma walfakkaatuun miseensoonni shanee iddoowwan adda addaatti bosona turan karaa nagaatti deebi’aa akka jiran kan mul’isanidha.Kanneen deebi’aniin galatoomaa jenna,kanneen shakkiidhaan ammas riphanii jiraniin dafaa galaa jennee gorsa obbolummaa gorsina.

Waamicha nagaa sabni guddaan Oromoon dhiyeesseef kabaja kenuudhaan karaa nagaatiin deebi’uun bu’aa malee miidhaan geessisu hinjiru.Dhugaa kana qalbeeffachuun haala mijaawaa amma uumame kanatti fayyadamuun barbaachisaadha.Carraan kun lammata hinargamu.Ijoollee! koodeewwan keenya kanneen haftanis dafaa deebi’aa jennee isin kadhanna!