Iddoo Lama Dhaabbachuun Fala Waaraa Fiduu Hindanda’u!

  

(YMN,Ebila 30,2018) Filannoon waliigalaa marsaa 7ffaa waan hedduu nutti mul’isaa jira.Humnoonni siyaasaa tokko tokko ammallee idduma durii akka jiran ilaalcha calaqqisiisaa jiraniin of saaxilaa jiru.

Filannoo waliigalaatti hirmaachaa sagantaa siyaasaafi imaammata qaban bilisaan ibsachaa, gareewwan hidhannoo qabatanii bosona keessa dhokatanii jiran deeggaruun ta’aaree? Walfaana deemuu danda’aaree?Wanti walfaallaan waliin deemuu akka hindandeenye beekamaadha.

Gareewwan afaan qawwee wayya jedhanii karaa nagaa filachuu didan waamicha nagaa ummanniifi mootummaan Itiyoophiyaa yeroo adda addaatti dhiyeessaniif haal-dureewwan adda addaa kaa’uudhaan gufuu nagaa ta’aniiru.Diddaan kun sababa qaba.Gareewwan hidhattoonni bosona keessa riphanii luuxaa jiran humnoota adda addaa diina Itiyoophiyaa ta’aniin deeggaramu.Isaan abdachuudhaan akka didan beekamaaha.

Mamii malee ifumatti himuutu gaarii ta’a.Waan qabatamaan jiru isaanuu beeku waan ta’eef dhugaa jiru itti himuun sirrii ta’a.Gareen maqaa ummata Amaaraa da’eeffatee ‘Faannoo’ jedhee of moggaasuun iddoo hedduutti fofottoquun socho’aa jiru Shaabiyaafi Gibtsiin akkasumas abbootii qabeenyaa biyya alaa jiraataniin deeggarama.Deeggarsi taasifamuufis kan meeshaa waraanaafi maallaqaa akka ta’e odeeffannoon yeroo adda addaatti tamsa’an mul’isaniiru.

Gareen Shanee, maqaa ummata Oromoo da’eeffachuun socho’aa jirtus kanaan ala miti. Waayyaannee dabalatee humnoota adda addaa biyya keessaafi biyya alaatu deeggarsa taasisaafii jira.

Shaneen shoroorkeessituun maqaan shoroorkeessummaa waggootaan dura itti moggaafame ‘Waraana Bilisummaa Oromoo(WBO)’ ofiin jechuun ergamaa diinaa taatee socho’aa jirti. Utuu humna qabaattee ammoo yeroo dheeraaf bosona keessa hinfoqoqxu.

Paartiiwwan siyaasaa maqaan beekamaniifi Boordii Filannoo Itiyoophiyaa irraa hayyama fudhachuun filannoo waliigalaatti hirmaachaa jiran qaamaan Finfinnee jiraatanis yaadaan humnoota hidhatanii socho’an kan ‘WBOfi Faannoo’ jedhanii of moggaasan bira akka jiran waanuma isaan dubbachaa jirantu ragaa qabatamaadha.

Egaa walsobuun gaarii hinta’u.Cubbuudha.Haqa qabatamaan jiru hubachuun karaa seera qabeessa ta’e qofarra deemuutu fala waaraa fiduu danda’a.Iddoo lama dhaabbachuudhaan taayitaa qabachuun,barcuma taayitaa koruun jaarraa 21ffaa keessa gonkumaa hindanda’amu! Ummanni bal’aan haqa kana sirritti beeka.Ummanni bal’aan hinbeeku jettanii of hingowwoomsinaa!

Kanneen burjaaja’uudhaan dhugaa qabatamaan jiiru wallaalan ammoo haala jiru  qalbeeffachuun of eeggannoo barbaachisaa taasisuutu irraa eegama.Dursa kennuu kan qaban nagaadhaafi.Nagaan boorofnaan jireenyi guyyuu yaaddessaa ta’uudhaan itti fufa.

Kanaaf humnoota fakkeessitoota  iddoo lama dhaabbataniif Caamsaa 24 sagaleen kennamuu hinqabu.Paartii isa kamtu nagaa waaraa naaf fiduu danda’a?gaaffii jedhuuf deebii gahaa utuu hinkennin guyyaa sagaleen itti kennamu Caamsaa 24 bara 2018 buufata filannoo dhaquudhaan sagalee kennuun medaallii kamiiniyyuu sirrii ta’uu hindanda’u.Murtee dongoraa dabarsuuf haala mijaawaa uuma.Murteen dogongoraan darbu ammoo boodarra hunda miidhuu danda’a.

Of eeggannoo gama kanaan taasifamu maddiitti filannichi karaa nagaafi tasgabbaa’aa ta’een adeemsifamee akka xumuramuufis shoora lammummaa ba’uun barbaachisaadha.Carraaqqiin humnoonni tasgabbii taasisan akkuma jirutti ta’ee nagaan amansiisaan akka jiraatuuf akkuma kanaan duraa hirmaannaan ummata bal’aa bakka bu’ummaa hinqabne barbaachisaadha.

Burjaajeessitoota kallattii adda addaatiin socho’aa jiran irraayis of eeguun waan dagatamuu hinqabnedha.Burjaajeessitoonni nagaan akka hinjiraanne barbaadan  ‘yeroon filannoo jijjiiramee,filannoon yeroo biraatiif darbeera’jechuun oduu sobaa tamsaasaa jiru.Medaalliifi sababa kamiiniyyuu filannoon waliigaalaa hinhafu,yeroo biroottis hinjijjiiramu,jijjiiramuus hindanda’u.

Humnoonni filannoon akka jeeqamu barbaadan ololli sobaa akka afarfamu taasisuun akkuma baran shiraan socho’uun hawaasa burjaajessu. Burjaajeessitoota bobbaasuudhaanis kaayyoosaanii milkeeffachuuf socho’u.Kana ammoo kan godhan ergama diina alaa irraa fudhatan hojiirra oolchuufi.Diinni keessaafi alaa haala mijaawaa argate hundatti fayyadamuu irraa duubatti hinjedhu.Malaafi tooftaa kamittuu fayyadamuu danda’a.

Haalli mijaawaan barana diinni argate ammoo filannoo waliigalaa marsaa 7ffaa akka ta’e duursee hubachuun qindoominaan socho’aa akka jiran haala qabatamaan jirutu ragaadha.Rasaasaafi meeshaan waraanaa Shaabiyaan gara Itiyoophiyaatti dhoksaan yeroo adda addaatti ergu maaliif akka oolu hubachuun barbaachisaadha.

Akkuma diinnoonniifi ergmtoonni isaanii filannoo baranaa da’oo taasifachuun jeeqamsaafi hookkara uumuuf qophaa’an ummanni bal’aan Itiyoophiyaatis nagaasaa waaressuuf qophii gahaa taasiseera.Qindoominni humnoota tasagabbii biyyaa wajjin ummanni bal’aan qabus akkuma kanaan duraa daran cimaadha.Gareen ergamaan kamiyyuu ummata Itiyoophiyaa dura dhaabbachuu hindanda’u.

Qophaa’ummaan caasaa nagayaafi tasgabbii sadarkaan jiru taasises ol’aanaa akka ta’e odeeffannoo qabatamaan jiru caalaa ragaan biroo kennamuu hndanda’u.Kanaaf humnoonni maqaa paartii seera qabeessaatiin iddoo lama dhaabbattan gocha badii qindoominaan raawwachuuf karoorfattan hojiirra oolchuun dura al-lama sadi irra deddeebi’uudhaan yaaduutu isin irraa eegama.’Abbaatu Of Mara’ jedha Bofni.Oromoonkoo mammaaksaan dubbii fixata.Akkasi yaa Jamaa!