Xiin-Sammuu Tola-Ooltummaa

Tola oolaan waan tola ittiin ooleen gammachuu daangaa hinqabne argata.Tajaajila lammiif kenneen gammachuun argamu ammoo itti fufiinsa qaba,waan yeroof mudatee jalaa darbu miti.

Tibbana bulchiinsi Magaalaa Finfinnee dureeyyoota xiin sammuu tola ooltummaa qabaniifi misooma Magaalaa Finfinnee keessatti shoora guddaa gumaachaniif badhaasaafi beekkamtii kenneera.Bulchiinsi Magaalaa Finfinnee waan dansaa raawwate.

Waltajjii badhaasaafi beekkamtii kennuu kanaaf kabaja guddaatu kenname.Nimalaaf! Ergaa galateeffannaa kantiibaan Magaalaa Finfinnee Adaanach Abeebee dabarsan malees Af-yaa'iin mana maree bakka bu'oota ummataa Taaggasa Caafoo hasawa dhageessisaniin abbootii qabeenyaa galateeffataniiru.

Af-yaachi akkana jedhan 'Tola ooluun wanti nama jalaa hir'isu hinjiru' Dhugaadha! Abbootiin qabeenyaa misooma koriidarii  Magaalaa Finfinneetiif birrii miliyoonaafi biliyoonaan lakkaa'amu gumaachan qabeeya qaban irratti qabeenya dabalataa argachuuf haala mijeeffatan malee jalaa hin'hir'anne,hinkasaarre.Ammoo hunda biraa galata qabu.Kunis qabeenya isaaniirratti qabeenya dabalaaf.

Tola ooltoonni badhaasni waancaafi beekkamtiin kennameef misooma Magaalaa Finfinneetiif maallaqni gumaachan akka waan salphaatti kan ilaalamu miti.Birrii biliyoonaafi miliyoonaan lakkaa’amu mamii malee gumaachan.Beekkamtii isaaniif kennameenis gammachuu guddaa akka qaban ifa fuula isaanii irratti mul’atutu ragaadha.’Xiin sammuun tola ooltummaa gammachuu daangaa hinqabne namaaf kenna’ kan jedhamu waa malee akka hintaane kanatu raga qabatamaadha.

Lageen Finfinnee foolii xiraatiin nama rakkisan miidhagfamanii kan misooman.daandiiwwan Magaalaa Finfinnee maaloo anarra deemaa jedhan arguu kan dandeenye carraaqqii mootummaan taasisaa jiru maddiitti hirmaannaan abbootii qabeenyaa daangaa hinqabne waan jiraateefi.

Abbootiin qabeenyaa kun qabeenya qaban irratti qabeenya dabalachuuf ammas hojjechaa jiru.Misoomni Finfinnee keessatti mul’ate ammoo qabeenyi isaanii daran akka dabaluuf shoora gamasaa akka gumaachu beekamaadha.Kan daldalaan qabeenya horate sababa misooma Finfinneetiin qabeenya kan duraa caalu argata.

Abbootiin qabeenya dameewwan hojii kanneen biroo irratti bobba’uudhaan hojjechaa jiranis haala walfakkaatuun bu’aa dabalataa argachuun imala qabeenya horachuu finiinsuudhaan itti fufu.

Amma walbira dhaabbachuun amaleeffamee gara aadaa ta’uutti deemaa jira.Sadarkaa Naannoo Oromiyaatiin tajaajilli lammummaa seeraan deeggaramee akka hojiirra ooluuf waggootaan dura murteeffamuun biyyaafis shoora gumaachaa jira jechuun nidanda’ama.

Fakkeenyummaa Naannoo Oromiyaatu fedhatame jedhamee yoo  dubbatame dhara hinta’u.Caffeen Oromiyaa labsii tajaajila lammummaa raggaasisee hojiirra akka ooluuf  erga murteessee asitti sochiin tajaajila tola ooltummaa itti fufiinsa waan qabaateef  lammiiwwan hedduu jireenya  rakkinaa keessaa baasuun danda’ameera.Lammiiwwan humna dhabaniif Dargaggoonni humna ta’uudhaan mana ijaaraniiru.Jiraattoonni galii dhabuudhaan jireenya rakkisaa keessa turuuf dirqaman guyyuutti carraaqqatanii akka jiraataniif  haalli mijeeffameera,madda galii akka argatan taasifameera.

Lammiiwwan sababa balaa nam-tolcheefi uumamaatiin miidhaman battalatti gargaaruun akka danda’amuufis Buusaa-Gonofaan Oromiyaa caasaa isaa babal’isee socho’uudhaan lammiiwwan akka dhaqqabu taasifameera.Carraaqqiin rakkoo keessaa walbaasuu kun utuu walirraa hincitin yoo itti fufuu danda’e sadarkaa hundumaan badhaadhina biyyaa mirkaneessuun rakkisaa hinta’u.