Biyya diiguuf yaalii xumuraatu taasifamaa jira

 

Finfinnee #Ethiopia Guraandhala 03,2015(YMN) Itiyoophiyaan akka Nagaa dhabdu taasifamaa jira.Diinni biyyaa gamaafi gamanaa walitti birmatee socho’aa jira.Mootummaa jijjiiramaatti quba qabeera.Mootummaa amma hooggansa irra jiru kana fonqolchinee taayitaa irraa buufnu malee waan barbaadnu argachuu hindandeenyu jechuun akka waliigalan gochuma qabatamaan taasisaa jirantu mul’isa.

Garuu miidhama geessisuun ala waan argachuu barbaadan hinargatan.Mootummaan Itiyoophiyaa amma jiru shira,iyyaafi wacaan kan fonqolfamu miti.Mootummaa seera qabeessa sagalee ummataatiin filatamedha.Motummaa ummataan filatamee jijjiirama hundi irraa fayyadamu lafa qabsiisuuf hojjechaa jiru shiroota gara garaa xaxuudhaan kuffisuun waan danda’amu miti.

Mootummaan Itiyoophiyaa muummicha ministiraa Dr.Abiy Ahmadiin hoogganamaa jiru kallattii Jaalala,dhiifamaafi ida’amuu qabatee imala eegale shira humnoonni keessaafi alaa walta’uudhaan xaxaniin taayitaa qabate irraa akka bu’uuf wixiffannaan taasifamus haalli mootummaan kun taayitaa ummataan kennameef irraa yeroo malee humnaan ittiin buufamu gonkumaa hinjiru.

Kanaan dura Oromoofi Amaara walitti buusuudhaan Itiyoophiyaan akka diigamtuuf yeroo adda addaatti yaaliin taasifameera.Yaaliin taasifame hundumtuu fashalaa’ee hafe.Kanneen shira adda addaa xaxuudhaan jeeqamsa qindeessaafi hojiirra oolchaa turanis wanti yaadaniifi karoorfatan milkaa’uu hindandeenyeef akkuma baran qaanii haguuggachuudhaan hafaniiru.Sochiin amma jirus kanaan ala ta’uu kan danda’u miti.

Yaaliin xumuraa amma taasifamaa jiru amantaa da’oo kan taasifatedha.Yaaliin dhimma amantaa da’oo taasifachuudhaan mootummaa jijjiiruu kun kanumaan duras taasifamee bu’aa humni diigumsaa barbaadu galmeessisuu akka hin dandeenye beekamaadha.Itiyoophiyaatti sababa amantaatiin jeeqamsi akka babal’atuuf kanaan dura karoora shirtootaatiin bataskaanoonni hedduun akka gubatan taasifameera.Masgiidoota hedduu irra miidhaan akka ga’u taasifameera. Bataskaanoonniifi Masgiidoonni akka gubatan taasifaman deebi’anii akka ijaaraman taasifamuudhaan waliin jireenyi hawaasaa itti fufuu danda’eera.

Haala ammaa kana hanga tokko wanti adda taasisu abbootiin amantaa saba Oromoofi sabaafi sablammoota kanneen biroo keessaa ba’an gaaffii mirgaafi rakkoo bulchiinsa gaarii kaasuu isaaniiti.Gaaffiin abbootiin kaasan mariifi ilaafi ilaameedhaan deebii gahaa argachuu kan danda’u ta’uun utuu beekamuu waan kana finiinsuudhaan mootummaa irratti jibbi akka uumamuuf hojjetamaa jira.

Sochiin humnoota gara garaatiin keessaafi alaa taasifamaa jiru ‘carraan kun nudarbu hin qabu’ jechuun kan murteeffatan akka ta’an mul’iseera. Mootummaan waan kana akkuma barame tooftaafi obsa bal’aadhaan bira darbuuf hojjechaa kan jiru ta’us amma xiiqiidhaan sadarkaa ibsa walitti baasurra akka ga’ame waanuma ta’aa jiru irraa hubachuun rakkisaa miti.

Ibsi abbootiin amantaa irra deddeebiidhaan kennaa jiran Itiyoophiyaa keessa mootummaan amantaa waan jiru fakkeesseera.Sanuu ibsa waldhayetu ba’aa jira.’Abbaan amantaa tokko ka’ee nuti hiriira hin waamne,kadhannaan haataasifamu jenne malee’ jechuun yoo himu,galagala ammoo abbaan amantaa kan biraa miidiyaatti ba’uudhaan ‘Hiriirri hinhafu.Waan Guraandhala shanitti karoorfanne hojiirra oolchuurraa duubatti hinjennu,nuti ijoollee keenya wajjin wareegamuuf qophoofneerra’ jechuun himan.

Maal wanti akkanaa?Itiyoophiyaan biyya heeraafi seeraan bulaa jirtu ta’uunshii utuu beekamuu seera dhabdummaa kana maaltu fide jechuun gaafachuun barbaachisaa ta’a.

Mootummaan jijjiiramaa amma jiru ADWUI qabsoo ummata bal’aafi sosochii keessaatiin taayitaa irraa buusuun taayitaa biyya bulchuu erga qabatee booda Itiyoophiyaan ijaarsa aadaa sirna demokraasiitiin sadarkaa biyyaalee guddatanii bira ga’uu akka dandeessu waan barbaaduuf wantoonni hedduun demokraasii da’eeffachuudhaan faalla’aniiru.

Humnoonni diigumsaa ammoo fedhiifi murtee mootummaan deemokraasiin akka dagaaguuf qabu waan sirritti beekaniif kanatti fayyadamuudhaan biyyaafi ummatarra miidhaawwan suukaneessaa ta’an akka ga’uuf onnachuun socho’aniiru.Jalqabarra ummata hedduu qayee jireenyaa irraa buqqiisuudhaan haala mootummaa ilaaluuf carraaqan.Ittifuudhaan gochoonni seeraan alaa gara garaa akka raawwataman taasisan.Kanaanis lubbuun lammiiwwan darbeera,qabeenyi ifaajii waggoota hedduu boodaa biyyaafi lammiiwwan horatan barbadameera.

Gareen taayitaa irraa bu’uuf dirqameefi Maqaleetti gales shira humnoota gara garaa wajjin qindaa’uudhaan hojjechaa tureen onnachuudhaan raayyaa ittisa biyyaa ajaja kaabaa irratti miidhama seenaan hindaganne raawwate.Gocha badii haala suukaneessaa ta’een raawwateen daanga’ee utuu hin hafin taayitaa irraa bu’etti deebi’uuf waraana miidhaa guddaa geessisee darbe bane.

Waraanni gareen TPLF bane hooggansa gamnummaa muummichi ministiraa Dr.Abiy Ahmad kennaniin turtii waggoota lamaa qofatti xumura argachuudhaan kanneen dhiita’anii waan ta’an wallaalanis waliigaltee nagaa mallatteessuuf dirqaman,meeshaalee gurguddoo qabeenyuma Itiyoophiyaatiin hidhatanis hiikkachuun dirqama itti ta’e.

Itiyoophiyaan nagaa waaraa argachaa jirti jedhamee lammiin nagaa barbaadu gammachuusaa utuu hinfixatin wanti biraa dhalachuu eegale.Gareewwan adda addaa finxaaleessummaadhaan beekaman qabsoo hidhannoo jalqabne jechuun ololan.TPLF dabalatee humnoonni gara garaa gareewwan qabsoo hidhannoo taasifna jedhan kanaaf galaafi deeggarsa maallaqaas taasisaa akka jiran hubatame.

Tajaajilli komunikeeshinii mootummaa Federaalaa ibsa kaleessa galgala baaseen haqa kana mirkaneesseera.Tajaajilichi ibsa haala yeroo irratti kenneen akka mirkaneessetti qaamoleen dhimma amantaa kaayyoo siyaasaa badiinsaatiif itti fayyadamuuf socho’an mul’achaa jiru.Kunis karaalee gara garaatiin mirkanaa’eera

    Gareen abbootii qabeenyaa, namoota siyaasaafi gurmaa’iinsa dargaggoota hafuuraan “Qopheessaa hiriira wareegamaa” jedhu sadarkaa jiddugaleessaarraa hanga gadiitti caasaa hundeessuu mootummaan bira gahuu himeera.

Gareen kun carraa uumametti fayyadamuun jeequmsa meeshaan deeggarameen mootummaa sochoosuuf fedhii akka qabuufi kanaafis dargaggoota filuun bobbii eegaluu,kaayyoo isaatiif tooftaa adda addaatiin maallaqa walitti qabuun raabsaa akka jiru akkasumas qaamolee karaa seeraan alaa hidhatan waliin hariiroo uumaa akka jiru mootummaan akka mirkaneeffate beeksiseera.

Egaa ‘beekkanneen yoo jalaa ba’anidha’ kallattiin amma mootummaan hordofaa jiru kallattii sirriidha.Ol’aantummaan seeraa kabajamuu qaba.Hundumtuu heeraafi seeraan buluu qaba.Humna kanaan ala socho’u irratti tarkaanfii seera qabeessa ol’aantummaa seeraa kabajisiisu fudhachuun dirqama mootummaati.Gochoota seeraan alaa raawwataman gama saaxiluufi seeratti dhiyeessuutiin ummanni bal’aanis dirqama irraa eegamu ba’uu qaba.Qindoomina uumnee yoo kana goone qofadha biyya Nagaadhaan keessa jiraannu qabaachuu kan dandeenyu.Fayyaa ta’aa!