Ergaa Muummicha Ministiraa Dr.Abiy Ahmad dabarsan

 

 

 

 

 ‘Sanyiin kaleessaa,Firii har’aa,Galaa Boruuti’

Waqtiin wanti tokko itti uumamuufi itti beekamu garaa garummaa qabaachuu danda’a.Gadameessi erga uumamee baatiiwwan booda ulfa ta’ee mul’ata.Daa’ima ta’ee dhalachuuf ammoo yeroo dabalataa fudhata.Daa’imni dhalate guddatee jabaatee,namoomaafi ammallisaa guutummaatti kan beekamu ammoo waggoota boodadha.Iccitiin jireenyaa guddaan kaleessa gadameessi hinmul’anneefi daa’ima xobbee keessa namni har’aa dhokatee  jiraachuufi guddachuu isaati.Eenyummaafi bu’aa kaleessaa tarkaanfiiwwan har’a fudhatamaniifi sirreessawwan raawwataman qaruufi sirreessuu kan danda’an ta’uunsaanii ammoo haqa abdii namaaf kennudha.

Sanyiin Midhaaniis ta’e aramaa yeroon lafa keessa ittiin jiraatuufi biqilee guddachuun itti mul’atu garaa garummaa kan qabudha.Mukni sanyii keessa jiraata.Akkuma biyyee,qilleensa,ifaafi kunuunsa argatuutiin adeemsa yeroo keessatti eenyummaansaa guutuun mul’ata.Akkuma kana sanyiin yaadaa hawaasa keessatti facaafamus guddateefi jabaatee laliseefi firii baasee namoota biratti qabatamaan mul’achuuf yeroo baay’ee fudhata.Kanumaafidha wanti ifa hinbaane akka waan hinjirreetti fudhachuun kanarras darbee yeroo ifa ba’utti akka uumametti hubachuun dogongora kan ta’u.

Keessumattuu jijjiiramni sirnaa,bu’aansaa gaariinis ta’e badaan yeroo gabaabaa keessatti hinmul’atu,hinmedaalamus.Yaadawwan jijjiiramaaf ka’uumsa ta’an namootaan hubatamanii,barmaataafi sirna ta’anii hanga aadaa ibsama eenyummaa hawaasaa ta’anitti waggoota hedduuf tura.Bu’aawwanis ta’an cabiinsi jijjiiramni hordofsiisu kan beekaman walharkaa fuudhiinsa dhalootaa keessattidha.Dhimmichi yaada namoota dhuunfaarraa ka’uun imaammata,tarsiimoofi karoora ta’ee yoo hojiirra oolu suuta suuta baramaa hojmaata,akkaataa jireenyaa,barmaataafi amala ta’a.Akka weereraatti muraasotaan jalqabamuun baay’oota dhaala.Naannawa tokko irraa ka’uudhaan biyya waliingaha.Kanneen adeemsa jijjiiramaa kana hinhubanneef,jalqabbiifi guddinasaa sirritti kanneen hinhubanneef jijjiiramoonni uumaman hundi tasa kan dhufaniifi rifaatuu hawaasaa kan hordofsiisanidha.

Bu’aan qormaata barattootaa xumura sadarkaa lammaffaan dhiyeenya kana galmeeffame kanaaf agarsiiftuu gaariidha.Falmiifi quu’annoo baay’ee booda garagalchuufi hanna sadarkaa ol’aanaadhaan hir’isuuf malli qormaata jiddu galeessaan kennuu bu’aan argamsiise rifaatuu hawaasaa ol’aanaa yoo uumu mul’ateera.Qormaatamtoota keessaa dhibbentaan shantamaafi kanaa ol gaaffiiwwaniif deebii kennuun barattoonni darbuu danda’an lakkoofsisaanii hedduu gadaanaadha.Manneen barnootaa kumaan lakkaa’aman haalli barataa tokkollee dabarsuu ittiin dadhabn uumameera.Kunis rakkoolee qulqullina barnootaa irratti qabnuufi rakkoo hammaataa keessa jirru sirritti nutti mul’ise.

Sadarkaa rakkina kanaa sirritti,lakkoofsaan kan hubanneefi kan agarre amma ta’ullee rakkoon garuu qormaataan ibsame malee kan uumame miti.Cabiinsi sirna barnootaa barsiiftoonni  barattoota har’a qormaataman barsiisan haala ittiin foo’aman,mala ittiin leenji’an,imaammataafi kallattii sirni barnootaa ittiin hoogganameefi dhimmoota kenneen biroo hedduu wajjin kan walqabate waggota kurnan baay’ee kan keessa dabarreefi bu’aa imala kabeelawaati.Har’a omisha rakkoo facaafamee yoo haammannes sanyiin lafa tuqee biqiluu erga jalqabee waggoonni lakkaa’amaniiru.Kana wajjin walqabatee dhugaa tokko beekuu qabna..Rakkoon kun  halkan tokkoon akkuma hinuumamne fallisaas halkan tokkoon dhufuu hindanda’u.Har’a rakkoo baruumsaa abaaboorra darbee firiisaa badaa ittiin agarre sirreessuuf  yeroo baay’eefi gatii ulfaataa gaafata.Cabiinsi akkanaa damee tokko qofaan jira jechuun yaaduun dogongoradha.

Akkuma damee barnootaa irratti faalla’iinsi numudate damee siyaasaafi hawaas-diinagdee,damee haqaatiinis ta’e damee tasgabbiitin haaluma walfakkaatuun cabiinsawwan yeroo dheeraaf turan qabna.Liqaawwan waarummaafi bu’a qabeessummaa jiddu galeessa hintaasifanne,raawwii pirojaktii dadhabaa,manca’iinsaafi hanna,quucaruu dhaabbilee, seeneeffama siyaasaa qoodumsaa ol’aanaafi finxaalessummaa sabummaa,dhaabbilee amantaafi dhaabbilee hawaasummaa keessa rakkooleen jiran,hanqinoonni damee quunnamtii alaatiin turan,cabiinsawwan seexaafi dudhaa keenyaan numudataniifi kanneen fakkaatan  waggoota kurnan baay’ee darban keessatti adeemsaan uumamuuniifi babal’achaa turaniiru.Cabiinsawwan kunniin akkuma sirna barnootaa kan qolatuun yoo argachuu baatan utuu ifa hinba’in jiraachuufi rakkoolee daddabalamaniif ka’uumsa ta’uuf carraan qaban bal’aadha.

Qonnaan bulaan tokko sanyii facaasuudhaan dura waqtii qannaatti sanyiin aramaa buqqisee hinbaafne lafa keessa dhokatanii waan hinjirre yoo fakkaatanis rakkoo guddaa kan uuman bishaaniifi xaa’oo boodarra sanyii gaariif kennamu saammachuun erga guddatanii boodadha.Sababa kanaan qonaan bulaan sun yeroo aramaa buqqisuu qabutti humna baasuun olitti gatii guddaa baasuun yeroo aramaan biqilutti ifaajii lammataatiif saaxilama.Kanumaafi hawaasni keenya  beekumsa waggoota hedduuf horate irraa ka’uudhaan’Irra dibaan hinfiddu bu’aa’jechuun kan dubbatu.Aramaawwan siyaasaafi hawaasummaa akka biyyaatti kaleessa buqqifnee hingatne hanga waan hinjirre fakkaatanitti dhokatanii waan turaniif amma haala mijaawaa eeggachuun  adeemsa siyaasaa gaariif shaakallii yoo saaman argaa jirra.

Waggoota kurnan darban ukkaamsaafi humnaan rakkoolee jiran haguuguudhaan kan hinjirre nutti fakkaatus seeneeffamni qoodumsaafi finxaaleessummaan sabummaa daangaa dhabe nudhaalee ture.Har’a hanga tokko bilisummaan argamnaan hammeentaa rakkoo jiruu agarre.Dhaabbileen tasgabbiifi haqaa keenyaa jabaatanii ga’oomina utuu hinqabaatin doorsisuudhaaniifi abbaa irrummaatiin akka saree dabbasaan itti baay’atee irree cimaa kan qaban fakkaatnii jiraachaa turan.Haala bilisummaafi demookraatawaatiin yoo qoraman garuu cabiinsisaanii  ifa ba’ee mul’ate.Diinagdeen saamichaan dhorameefi dhibbaa liqaatiin bututee ture lakkoofsa mul’iftuu guddina diinaghdeetiin haguugamee harki dhahamaafi ture liqaa fudhattan deebisaa yeroo jedhamu jireenya ummataa fooyyessuu yoo dadhabu,fedhii hojii hoji-dhabeeyyii walakkumallee guutuu  yoo dadhabu cabiinisisaa hammam akka ga’u saaxilame.Rakkooleen kun  bu’ura kan gadi fageeffatan ta’anis hammam akka ga’an ifa ba’ee kan mul’ate sirnichi bilisummaa hanga tokko jiruun yoo sakatta’amudha.Iddoo bilisummaan hinjirretti  hundumtuu ukkaamamuufi cufamuun sodaadhaan yoo jiraatu inumaatuu rakkooleen kan miidhagan fakkaatanii mul’achuu danda’u.Dugaan jiru garuu keessa keessa lafa yoo qabataniifi saaphanaa’aa turuun ilkaan birmadummaa biyyaa ittiin ciniinu biqilfachaa ture.

Amma gama sirna barnootaatiin adeemsa waggoota hedduu darbeefi bu’aasaa hubachuu dandeenyus rakkoo kana keessaa ba’uuf garuu hojii yeroo baay’eetu nurraa eegama.Rakkoo jiru beeknee jirra jechuun har’uma falasaa arganna jechuu miti.Damee diinagadeefi sirna siyaasaatiin hojii walfakkaataatu nurraa eegama.Dhaabbileen siyaasaafi hawaasummaa sababa gaaffiiwwan demokraasiifi bilisummaatiin yoo gatantaran agarreen humni qaban dadhabaa akka ta’e sirritti nutti mul’isaniiru.Hammentaa rakkoo jiruu har’a hubannus rakkoon kun har’a akka hin uumamne yaaduun maddi furmaataa nudhaloota har’aa akka taane amanuudhaan itti gaafatamummaadhaan hojjenna.Hammentaa cabiinsa keenyaafi heddumina rakkoolee keenyaa sirritti hubachuun tarkaanfiiwwan fooyyessaas hojiirra oolchaa jirra.

Cabiinsa hawaasummaa waggoota hedduuf dhokatee akka waan sirrii ta’etti ilaalamaa ture haala mijaawaa argameen ifa ba’ee fuulleetti yoo qolataniin  jalqabarra rifaatuudhaan liqimfamuun wanti raawwatan dhabamuun ajaa’ibsiisaa miti,deebii uumamaatis ta’a.

Garuu dhimmichaafi bu’urasaa waakkachuuf yaaluun yookan sababa ta’uu hin qabne tarreessaa darbuun furmaata waaraa rakkoolee jiranii hinfidu.Dhukkuba busaatiif qoricha busaa malee mallattoo mataa bowwuufi qorra mul’ise jedhamee  qoricha mataa bowwuufi qorraa fudhachuun akka fala waaraatti hinfudhatamu.Yoo rakkoon mudatu quba namatti qabuufi qaawwa jiruun hulluuquun miliquun furmaata gowwotaafi sodaattotaa yammuu ta'u daandi’n sirriin gamnootaafi goototaa rakkoolee mudatan fuulleetti qolachuun furmaata waaraatiif carraaquudha.

Cabiinsa har’aa dogongorri kaleessaa uume hubannee humna fala waaraa argamsiisu waliin ta’uuf qophaa’uu qabna.Baay’inni rakkoolee yeroo dhiyootti numudatan kutannoofi humna guutuudhaan gara furmaataatti akka demnuuf kan dhiibbaa taasisan ta’uu qabu.Yaadaafi humna haarawaan sussuukuuf abdiidhaan haakaanu!Jijjiirama ol’aanaafi jireenya fooyya’aaf haacarraaqnu!Akka biyyaafi hawaasaatti daandiin nubaasu isa kanadha.Dogongoroota kaleessa irraa dhaalle dhabamsiisuun iddoo isaaniitti sanyii gaarii yoo facaafne shakkii malee carraaqiin keenya firii gaarii baasa.Ijoollee ijoollee keenyaatiifis galaa abdii ta’aaf.

Itiyoophiyaan carraaqqii Ijoollee isheetiin kabajamuun bara baraan haajiraattu!!

Waaqayyo Itiyoophiyaafi Ummattoota ishee haa eebbisu!

Muummicha Ministiraa Itiyoophiyaa Dr.Abiy Ahmad

Amajjii 25 bara 2015