Wabiin araaraa saba Oromoofi dudhaasaa caalu hinjiru!

 

 

 

Finfinnee #Ethiopia Guraandhala 16,2015(YMN) Sabni Oromoo aadaa boonsaafi kabajamaa qaba.Diina Oromootu aadaafi dudhaa Oromoo gadi qica malee aadaan araaraafi dhiifamaa Oromoon qabu isa birayyuu darbuudhaan addunyaa kan dhaqqabuu danda’edha.Kanaaf ragaa qabatamaa ta’uun kan dhiyaatu Sirna Gadaa Oromoo hambaa kiliyaa addunyaa ta’uun waggootaan dura galmeeffamedha.Sirni Gadaa Oromoo amma qabeenya addunyaati.Maddi injifannoo boonsaa kanaa ammoo aadaafi dudhaa Oromoon duriifi ammas qabudha.

Sabni Oromoo ilaafi ilaamee jedhee mariidhaan rakkoosaatti fala barbaaduu beeka.Mariifi ilaafi ilaameedhaan rakkoosaatti furmaata yoo barbaadu qaama biraa hinhirmaachisu.Qaama sadaffaa barbaacha hindeemu,deemees hinbeeku.Oromoon maalif akkana godhaa?jechuun gaafachuun barbaachisaadha.Sabni aadaa dilbii qabuufi dudhaa kabajamaadhaan jiraatu maal dhabee orma bira dhaqaa?Qaama sadaffaa dhimma ofiitti waamuun rakkoo dabalataa malee fala argamsiisuu akka hindandeenye Oromoo caalaa eenyutu beekaa?Gaffilee kana of gaafachuudhaan haqa qabatamaan jiru hubachuun barbaachisaadha.

Dubbiftootakoo akkam jirtan?har’a ammoo maal jechuu barbaaddee?qarqara naannoftaa?naan jechuun keessan hinoolu.Oromoon yoo mammaaku’Waa malee manni hinaaru’ jedha.Anis waan kana waa malee akkan hinjenne sirrtti akka hubachuu dandeessan hinshakku.

Dhiyeenya kana mootummaan Federaalaas ta’e mootummaan Naannoo Oromiyaa gareen hidhatee bosona jiru gara marii nagaatti akka dhufuuf waamicha akka taasisan nibeekama.Erga waamichi marii nagaafi araaraa kun dhiyaatee booda waan gamaa-gamanaa jedhamaafi darbatamaa oolu baay’eetu jira.Kanas akka quba qabdan nan abdadha.

Akkuma beekamu Badhaadhinni biyya bulchaa jiru rakkoon Afrikaa Afrikaanootaan fala argachuu qaba malee orma itti waammachuu hinqabnu ejjennoo jedhu qaba.Dhugaan kun irra deddeebiidhaan himameera.Qabataamaanis ta’ee mul’ateera.Maarree utuu kun beekamuu qaama sadaffaa jechuun araaraa walootti orma waammachuun maalif barbaachise?

Kun of salphisuu akka hintaaneef of eeggannoo gochuun barbaachisaadha.Duruu guddaa ta’uun keenya utuu beekamuu ofumaaf of xiqqeessinee ormi gadi xiqqeessee akka nuilaaluuf,akka nutuffatuuf balbala banuudhaan waggoota hedduuf miidhamne.Waan darbe irraa barachuun muuxannoo fudhachuun gamnummaadha.

Ormi akka isaaf tolutti malee akka nuuf tolutti hojjeta jechuun yaaduun of gowwoomsuudhaan ala waan biraa ta’uu hindanda’u.Qaamoleen dhimmi isin ilaallatu mee waan kana sirritti qalbeeffachuudhaan haailaallu.Qaama sadaffaa idil addunyaa mana marii tasgabbii dhaabbata mootummoota gamtoomaniitti seeraan ala yeroo 10 caalaa dhimma Itiyoophiyaa irratti akka mari’atamuufi qoqqobbiin akka murteeffamuuf carraaqaa erga turee booda shirri yaade jalaa fashalaa’etu nuuf yaadaa?Moo ergasii asitti ilaalchi diinummaa biyya keenya irratti qaban jijjiiramee?

Diinoonni Itiyoophiyaa qaawwa argatan kamittuu fayyadamuudhaan Itiyoophiyaan akka miidhamtu taasisuu irraa duubatti hinjedhan.Dhugaan kun beekamuu qaba.Dhimma kana kallattii adda addaatiin ilaaluun haqa qabatamaan beekamu hubachuun dirqama lammii biyyaaf yaadu hundaati.

Kallattii sirriidhaan yaadama yoo ta’e ‘Shanee ykn.WBO’ akkaataa aadaafii dudhaa saba Oromootiin qajeelfamuudhaan marii nagaatti dhufuufi araaramuu wanti dhorku tokkollee hinjiru.Carraa marii nagaafi araaraa argametti fayyadamuun barbaachisaadha.Carraa argame kana sababoota  gara garaa tarreessuudhaan bu’aa dhabsiisuun akkuma kanaan dura ‘ABO’ irratti ta’ee darbe miidhama malee fayyadamtummaa fiduu hindanda’u.

Kanaaf harkisaa gamaafi gamanaan jiru ofirraa ittisuudhaan akka qajeelfamni aadaafi dudhaan sabaa ajajutti marii nagaatti dhufuun araaramuun kan dabe sirreessuun xiyyeeffannoo argachuu qaba!Wabiin araaraa saba Oromoofi dudhaasaa caalu eessumaayyuu dhufuu akka hindandeenyeefi dirqamaan qaamni sadaffaan akka dhufu yoo taasifames fudhatama qabaachuu akka hindandeenye garanumaa qalbeeffachuun gaarii ta’a.Fayyaa ta’aa!