Falli jiru waliinis waliifis dhaabbachuudha

 

Finfinnee #Ethiopia Guraandhala 12,2015(YMN) Diinni walqooduumsa Saba Oromoofi hayyoota isaa irraa fayyadameera.Faayidaan diinni Oromoon akka hingamtoomne taasisuutiin argate ammoo asii hanga asiitti jedhamee kan himamee dhumu miti.Kan dhiyoo dhiifnee haala waggoota dheeraaf mudate yaadachuun kan kaafnu yoo ta’e waan yeroo gabaabaa keessatti dubbatamee dhumuu danda’u akka hintaane hubachuun rakkisaa hinta’u.

Hayyoonni Oromoo hedduun quuqama sabaaf qaban irraa ka’uun moggaasa dhaabbilee gara garaa kan akka Meccaafi Tuulamaafi kanneen biroo keessatti ijaaramuudhaan qabsaa’an qabsoon isaanii galmasaa  utuu hinga’in akka karaa irratti hafan taasifameera.Qaanqeen qabsoo Oromoo isaan qabsiisan garuu dhaamuu didee itti fufuu waan danda’eef har’a Oromoon iddoo durii hinjiru.

Dhugaa kana irratti waliigaluun barbaachisaadha.Oromoon har’a mirga abbaa biyyaa ta’uu argateera.Akka kanaan duraa qarqararra dhaabbatee ilaaluu irraa gara jiddugalaatti dhufuu danda’eera.Dhugaan kun kan waakkatamuu danda’u miti.Waan qabatamaan mul’achaa jiru haaluun akkamitti danda’amaa?Gonkumaa waan danda’amu miti.

Diinni keessaafi alaa humna Oromoon har’a horate sirritti waan hubateef waan of harkaa qabu jalaa fashaleessuuf kan danda’u hunda raawwachuudhaan wixiffachaa jira.Waan akaakileefi abaabileen isaanii Oromoofi sabaafi sablammoota kanneen biroorratti xiqqeessanii ilaaluudhaan,gadi qicuudhaan raawwachaa turan waan beekaniif moggaasa arrabsoo gara garaa darbachaa ooluun Oromoon hundi akka mataa gadi qabatuuf hojjechaa jiru.

Rakkoo kana qolachuun kan danda’amu waliinis waliifis dhaabbachuudhaan akka ta’e Oromoon hundumtuu kan biyya keessaafi biyyaalee alaa gara garaa keessa jiraatu hubachuu danda’uu qaba.Garaa garummaan ilaalcha siyaasaa yeroof turu inifannoo Sabni Oromoo guddichi goonfate kan dhabamsiisu ta’uu hinqabu.Mufiifi dallansuun sababoota adda addaatiin uumame mariidhaan fala argachuu kan danda’udha.Kun ammoo kanaan duras qabatamaan ta’ee mul’ateera.

Tokkummaan sabaafi hayyoota Oromoo tibba muummichi ministiraa Dr.Abiy Ahmad wayita gara taayitaa ol’aanaatti dhufan mul’atee ture kanaaf ragaa qabatamaa ta’ee kan fudhatamuu danda’udha.Haalli sun  shira diinoonni xaxaniin kan boora’ee ture ta’us carraan ilaafi ilaamee jechuun mari’achuun waliif galuu akka jiru tibbana mul’achaa jira.

Carraan kun akka hinfashaloofneef of eeggannoo cimaa taasisuun barbaachisaadha.Mootummaan Federaalaas ta’e mootummaan Naannoo Oromiyaa mallattoo marii nagaa mul’isaniiru,mamii malees waamicha marii nagaa dhiyeessaniiru.

Balbala marii nagaafi ilaafi ilaameef baname kana kan cufuu barbaadu akkuma kanaan dura mul’ate diina sabaati.Diinni fayyadamuu kan danda’u walgalteen yoo dhabamudha.Diinni yeroo waliigalteen dhabamu saamichaaf haala mijaawaa argata.Kanaaf nagaan akka bu’uufi tasgabbiin akka jiraatu hinbarbaadu.

Balballi jeeqamsaa fedhii diinaa kun amma cufamuuf jira’Oromoon yoo mammaaku’Waa malee manni hinaaru’jedha.Tibbana dhimma amantaa da’eeffachuudhaan akka malee wacamaa kan ture waa malee akka hintaane hubachuun barbaachisaadha.Duula banamee ture hundatu yaadata waan ta’eef amma asirratti kaasuu hinbarbaadu.Egaa inni kunis gamnummaafi fageessanii yaaduu hooggansaafi abbootii amantaatiin furmaata argateera.Kunis waan jalaa fashalaa’eef xiiqii keessa galuudhaan akka ta’aa jiran argaa jirra.

Akkuma durii ammas gootota Oromootti quba qabaniiru.Gamaafi gamanaa walwaamuudhaan dhufaniiru.Maqaa balleessiin hooggansa Oromoo irratti aggaamamaa jiru kaayyoo galmaan ga’uu barbaadu kan qabudha.Haala qabatamaan jiru qalbeeffachuudhaan dura dhaabbachuun injifannoo galmeeffame kunuunfachuun,eeggachuudhaan itti fufsiisuun dirqama Oromoota hundaa waan ta’eef keessumattuu hayyoonni Oromoo biyya keessaafi biyyaalee alaatti argaman kutannoodhaan hojjechuuf of qopheessuu qabu.

Keessumattuu balballi marii nagaatiif baname akka hincufamneef hojjechuun dirqama hayyoota Oromoorra jirudha.Kana milkeessuuf hayyoonni Oromoo muuxannoos ta’ee ga’uumsaafi beekumsa gahaa qabu.Maqaa saba Oromoo yeroo hunda waamaniifi saba barsiisee sadarkaa amma irra jiran biraan isaan ga’eef jecha maal nadhibee keessaa ba’uudhaan hojii gootummaa hayyoota Oromoo bara baraan waamisu akka hojjetaniif Saba Oromootu irraa eegaa jira.

Balballi banameera.Wanti rakkisaan hinjiru.Haala mijaawaatu uumame.Mootummaan Shaneedhaaf waamicha marii nagaa taasiseera.Hooggansi Shaneetis awwaateera.

Waamicha marii nagaa mootummaan dhiyeesseefi Shaneenis tole jedhee fudhate Oromoo hundatu deeggara.Sabni nagaan ba’ee nagaan akka galuuf,lammiin hundi hojjetee akka jiraatuuf guddina biyyaa keessattis shoora irraa eegamu akka gumaachuuf Nagaan amansiisaan jiraachuu qaba.

Nagaan afaan qawwee qofaan dhufuu akka hindandeenye hubatameera.Mootummaan dhugaa kana irraa ka’uudhaan waamicha marii nagaa dhiyeesse jedhamee amanama.Humna dhabeeti jechuun yaaduun sirrii hinta’u.Haala kanaanis ilaaluun waan danda’amu miti.Garee biyya bulchaa erga turee booda Maqaleetti galee fincileyyuu adabachiisuu danda’eera.Harka qullaatti hanbiseera.Humnoota alaa Itiyoophiyaa diiguuf shira adda addaa qopheessuudhaan socho’aa turanis hooggansa gamnummaafi gootummaadhaan dabalameen qaanessuu danda’eera.

Gareen hidhatan bosona jiru Shaneenis dhugaa kana hubachuu dadhaba jedhamee hinyaadamu.Wal waraansaan injifannoon galmeeffamuu danda’u akka hinjirre amma gama hundumaanuu hubatameera jechuun nidanda’ama.Shoorri hafe kan Ummata Oromoo,hayyoota Oromoo,manguddootaafi abbootii Gadaa Oromooti.Uumaan Oromoofi Oromiyaa,tokkichi Garaa Garbaa Oromiyaa nuuf haagargaaru,Itiyoophiyaa teenyas nuuf haabaraaru!Mariin nagaa yaadamee galmasaa haagaa’u!Fayyaa ta’aa.