Jawaar maal jedhee?Aaga Dhaga'aa Jennee Eebbifnaan!

  

 

 

 

Finfinnee #Ethiopia Bitootessa 08 2015(YMN) Warri nuun mormaniiifi morma keessan qabuudhaan araat kiiloodhaan isin baafna jechuun nutti dhaadachaa jiran tibbana waa nutti himaa jiru.Dhugaafi shira isaanii barame ta'uufi dhiisuusaa saa hanga ammaatti adda hinbaafanne.Garuu ammoo wanti isaan Jawaar raawwate jedhan dhugaa taanaan Oromoo hundatti oduu aagaa himaa jirtu galatooma! jennaan.

Yoo quba qabaachuu baattan Jawaar Mahaammaad ‘taayitaan biyya bulchuu Oromoo harkaa ba'uu hinqabu’  jechuun ejjennoo qabatee hojjechaa jira.Jawaar hidhattoota bosona jiraniinis ‘qawwee lafa kaa'aa’ jechuun dhaameera jedhan.

Jawaar kallattii qabsoo fuulduroo barreeffama fuula 76 qabuun kaa'eera jedhanii nutti himan.Waan isaan jechaa jiran kana nuti hanga ammaatti hinmirkaneeffanne.Barreeffamni Jawaar toora keessaatiin raabseera jechuun isaan odeessaa jiranis hanga ammaatti nundhaqqabne.Kanaaf qabiyyee barreeffama Jawaar guutuutti hinbeeknu.Kanaaf waan gadifageenyaan hinbeekne irratti akka malee bal’ifnee dubbachuu hinfeenu.

Haata'uutii wanti isaan shira itti dibuudhaan odeessaa jiran kan Oromoo hunda fayyadudha malee kan miidhudha jedhamuu hindanda'u.Jawaar Mahaammad taayitaan abbaa biyyummaa Oromoo harka turuu qaba jechuun ejjennoo yoo qabate nideeggarama malee gonkumaa hinbalaaleeffatamu.Oromoon kamiyyuu waan kana nibalaaleeffata jedhamee hinyaadamu.Kanaan dura sababa beekumsaafi hubannoo dhabuutiin hangam akka miidhame beeka waan ta’eef huromoon hundumtuu waan Oromoo gamteessu irratti gufuu hinta’u.

Oromoon seenaa darbe yaadachuudhaan lammata gabroomuu irraa of tiksuu qaba.Seenaan akka himutti kanaan dura Ijoolleen Oromoo qaaliin biyya bulchuu danda'an shira tooftaa diinni itti shireen haala nama gaddisiisuun galaafatamtee hafte.

Hooggansi Oromoo amma jirus akkaatuma abbootiin diinaa dur raawwataniin akka maqfamaniif jarri waan dandeessu hunda gochaa jirti.Kanaafis waliif birmachaa akka jiran quba qabna.Kana malees tarsiimoowwan gara garaa bocachuudhaan socho’aa akka jiran hubachuun barbaachisaadha.Dhimma tarsiimoowwan isaan qopheffachuudhaan ittiin socho’aa jiran haala qabatamaa jiru wajjin barreeffamaan tokko tokkoonin isiniif dhiyeessa waan ta’eef hordofaa.Gocha isaan raawwachaa jiran saaxiluudhaan dura dhaabbanna!

Kanaan dura haala Dr.Hayilee Fidaafi qabsaa'onni Oromoo beekamoon ittiin dhabamsiiffamaniin hooggansa amma jirus dhabamsiisuuf wixiffatanis  gonkumaa akka hindandeenye dura dhaabbannee itti himuu qabnna.

Akkuma weellisaan dur’Yaabaallee sarariitii namni yartuun nama miiti’jedhee weellise sana ta’uu danda’a waan ta’eef yartuuwwan amma jiran ekeraa abbotii isaanii hordofuun waan karoorfatanii itti qophaa’an raawwachuudhaan miidhaa geessisuu danda’u waan ta’eef miidhama lammataa irraa of baraaruuf Oromoon hundi dhugaa jiru qalbeeffachuudhaan kutannoodhaan dhaabbachuun dagachuu hinqabu.

Gama kanaan wanti Jawaar Mahaammad hojjechaa jira jedhan sun faayidaa qaba jechuun waan fudhachuun danda’amudha.Tarsiimoo Jawaar kanaan tokkummaa Saba Oromoo sababoota adda addaatiin jidduutti akka qabbanaa’uu ta’e deebisuudhaan daran finiinsuun nidanda’ama.

Oromoon tokkummaadhaan sochoonaan ammoo wanti tokkummaa Oromoo caalaa isaan sodaachisu akka hinjirre beekamaadha waan ta’eef gamtoomuu Oromoo ilaaluudhaan jarri shiraan deemaa jirtu adabattee taa’uu dandeessi.Tokkummaa Oromoo dura humni dhaabbachuu danda’u gonkumaa akka hinjirre beekamaadha.

Kanaaf komiiwwan xixiqqoo sababoota gara garaatiin uumaman ammaaf dhiisuudhaan dhimma gamtaafi tokkummaa Saba Oromoo irratti sirritti hojjechuun dhimma xiyyeeffannoo guddaa argachuu qabudha.Oromoon yoo tokkomee socho’e wanti dhabu tokkollee akka hinjirre beekamaadha.Yoo tokkoomnu firas baay’ifachaa deemuun barbaachisaadha.Hammattummaa keenya barameen kanneen shiraan ala jiran kunuunsuun ofitti qabuun jajjabeessuun dagatamuu hinqabu.Fayyaa ta’aa!