Tarsiimoo fonqolcha mootummaa lakkoofsa lammaffaa(2)

Finfinnee #Ethiopia Bitootessa 12,2015(YMN) Finxaaleeyyiin keessaafi alaa qindoomina uummatan Mootummaa qajeelfama paartii Badhaadhinaatiin hoogganamaa jiru fonqolchuuf nugrgaara jechuun tooftaawwan adda addaa qopheeffachuun socho’aa akka jiran nibeekama.

Tarsiimoo lakkoofsa tokkoffaatiin waldhabdee amantaa finiinsuudhaan hordoftoonni amantaa kirstaanaafi Islaamaa waldhadeetti akka galaniif haala mijaawaa argame kamiittuu fayyadamuudhaan carraaqqii ol’aanaa taasisaniiru.Garuu hanga ammaatti yoo milkaa’uu dadhabanis tarsiimoo jalqabaa itti fufiinsaan hojiirra oolchaa akka jiran barreeffama kutaa 1ffaa keessatti kaaseen jira.Barreeffama itti aanuun ammoo dhimma lammiiwwan sababoota adda addaatiin iddoo jireenyaa irraa buqqa’anis fonqolcha motummaatiif nugrgaara jedhanii yaaduun akka tarsiimootti itti fayyadamaa akka jiran agarsiiftuuwwan qabatamaa ta’an kaasuudhaanin isiniif dhiyeessa,dubbisaa!

Tarsiimoo 2:Dhimma lammiiwwan buqqa’anii daldala siyaasaaf itti fayyadamuu

Sababa haleellaa hidhattoonni iddoowwan tokko tokkotti raawwataniin lammiiwwan naannawa jireenyaa isaaniirraa buqqa’uuf dirqamaniiru.Adda durummaadhaan Oromiyaa lixaa godinaalee Wallaggaa keessatti yeroo adda addaatti lammiiwwan buqqa’uun jireenya dararamaatiif saaxilamuusaanii kaasuun nidanda’ama.Lammiiwwan qayee isaaniirraa buqqa’uun isaanii finxaaleeyyii Amaaraafi Oromootiif gammachuufi fishiliqa guddaa uuma.Kanas yeroo adda addaatti qabatamaan agarree jirra.Finxaaleeyyiin lammiiwwan qayee isaaniirraa akka  buqqa’aniif qindoominaan hojjechaa akka turan qondaaltoonni mootummaa mirkaneessuudhaan ummatatti himaa akka turan nibeekama.

Gama kanaan dhugaa jiru pirezidaantiin bulchiinsa Mootummaa Naannoo Oromiyaa obbo Shimallis Abdiisaa finxaaleeyyiin Amaaraafi Oromoo qindoominaan akka hojjechaa jiran mirkaneessaniiru.Obbo Shimallis gareewwan Finxaaleeyyiin Amaaraafi Oromoo waan walfalaman fakkeessuuf yaalu malee qindoominaan akka hojjechaa jiran mirkaneessineerra jechuun yaa’ii Caffee Oromiyaa dhiyeenya gaggeeffame irratti waan mirkaneessaniif haqa kana hundatu beeka.

Kanaaf buqqaatiin lammiiwwanii gabaan siyaasa Finxaaleeyyii akka ho’uuf haala mijaawaa kan uume ta’uunsaa beekameera.Ofumaa qindaa’anii nagaa booressuudhaan lammiiwwan iddoo jireenyaa irraa akka buqqa’an erga taasisanii booda’Mootummaan lammiiwwan baraaruu hindandeenye’ergaa jedhu dabarsuuf keessaafi alaa iyyi akka dhaga’amu taasisuun mootummaa irratti dhiibbaan akka uumamuuf irra deddeebi’uudhaan carraaqaniiru.

Tarsiimoon isaanii kun mikaa’ina barbaadan akka argamsiisuuf wixiffannaan taasisan lammiiwwan kamirrattuu miidhaa geessiseera.Oromoon miidhameera,Amaarris miidhameera.Lamaanuu qayee isaaniirraa buqqa’uuf dirqamaniiru.lubbuun namootaa darbeera,qabeenyi carraaqqii waggoota hedduu booda horatan jalaa barbadeeffameera.

Balaan buqqaatii dhalattoota Amaaraa qofa miidhe jechuun kan olulu humni finxaaleessaan Amaaraa ammas himannaasaa  cimsuudhaan itti fufeera.Keessumattuu Oromoon hundumtuu kan nama ajjeessuufi kan buqqisu,qabeenya kan saamu walumaagalatti bulguu fakkeessanii dhiyeessuudhaan summii jibbiinsaa facaasaa jiru.Humnoonni kun Oromoo hunda irratti arraba roobsuudhaan haalli ummata Amaaraa fayyaduu ittiin danda’an hinjiru.

Kan biraa bulchiinsi magaalaa Shaggar sochii ijaarsa seeraan alaa ittisuuf tarkaanfiin dhiyeenya fudhate dhalattoota Amaaraa buqqisuuf kan fudhatame akka ta’e fakkeessuudhaan finxaaleeyyiin Amaaraa daldala siyaasaa isaanii hanga ammaatti finiinsuun itti fufaniiru.Haa ta’uutii bulchiinsi magaalaa Shaggar ijaarsawwan seeraan alaa irratti tarkaanfii kan fudhate nama sabummaadhaan adda qoodee akka hintaane qondaaltoonni bulchiinsichaa ragaa dhiyeenya kennanin mirkaneessaniiru.

Kana wajjin walqabatee humni finxaaleessaan Amaaraa bulchiinsi Magaalaa Shaggar kan hundeeffame dhalattoota Amaaraa Finfinnee irraa buqqisuuf shira qophaa’edha jechuun balaaleffachaa jira.Paartiiwwan maqaa paartii siyaasaa seera qabeessaan socho’aa jiran ejjennoo humna finxaaleessaa deeggaruudhaan dhimma hundeeffama bulchiinsa Magaalaa Shaggar irratti ibsa mormii baasaniiru.Kunis paartiiwwan kun humna finxaaleessaa wajjin qindaa’uudhaan hojjechaa akka jiran dhugaa qabatamaan mul’ise ta’eera.

Humnoonni finxaaleeyyiin akkaataa seera Itiyoophiyaatiin karaa nagaa filachuudhaan yaadasaanii ummataaf dhiyeessuudhaan haalli filannoodhaan taayitaa qabachuu ittiin danda’an utuu jiruu mootummaa filannoo demookraatawaan ummata bal’aadhaan filatame fonqolchuun taayitaa gojoma’aniif qabachuuf tarsiimoo badii qopheeffachuudhaan socho’uun ulaagaa kamiiniyyuu fudhatama hinqabu.

Itiyoophiyaan lammiiwwan aadaa waldanda’uu,walkabajaafi jaalalaan biyya keessa jiraatan waan taateef finxaaleeyyiin dheebuu taayitaa ba’uuf diinoota Itiyoophiyaa seenaadhaan beekaman wajjin qindaa’uudhaan deeggarsa argataniin mootummaa ummataan filatame haalli humnaan taayitaa irraa fonqilchuu ittiin danda’an gonkumaa jiraachuu baatus humnoonni kun tuffii ummataaf qaban mul’isaa jiru waan ta’eef saboonni,sab-lammoonniifi ummattoonni Itiyoophiyaa nurraa adabadhaa jechuu qabu.Tarsiimoo finxaaleeyyii itti aanu qabadheen dhufa.Fayyaa ta’aa!