Tarsiimoo Fonqolcha Mootummaa Finxaaleeyyiin Qopheeffatan sadaffaa(3)

  

Finfinnee #Ethiopia Bitootessa 13,2015(YMN) Tarsiimoowwan finxaaleeyyiin mootummaa fonqolchuuf qopheeffatan keessaa tokko bulchiinsa Magaalaa Finfinnee dirree jeequmsaa taasisuudha.Barreeffama kutaa lammaffaatiin finxaaleeyyiin buqqaatii lammiiwwanii daldala siyaasaatiif akka itti fayyadaman agarsiidtuuwwan isiniif dhiyeessuun kaaseen jira.Itti aansee ammoo haala Finxaaleeyyiin Magaalaa Finfinnee dirree jeequmsaa taasisuuf tarsiimoo ittiin qopheeffatanin isinitti hima.Dubbisaa!

Tarsiimoo 3:Finfinnee dirree jeequmsaa gochuu

Magaalaan Finfinnee wiirtuu siyaasaa Mootummaa Federaalaafi bulchiinsa Mootummaa Naannoo Oromiyaati.Kana malees Finfinneen jiddu gala teessoo dhaabbilee ardii Afrikaafi idil addunyaa akka taate beekamaadha.Finxaaleeyyiin dhaga’amtummaa argachuuf yeroo adda addaatti Finfinnee irratti xiyyeeffachuudhaan carraaqqii jeequmsaa galma ga’uu dadhabuun jalaa fashalaa’ee hafe irra deddeebiidhaan taasisaniiru.

Dhiyeenya kanas waanuma baran raawwachuuf wixiffatanis bu’aa barbaadan galmeessifachuu hindandeenye.Bilaasha ta’uuf dirqaman.Kan karoorfatanii itti qophaa’an milkaa’uufii dide.

Ayyaana Adwaa waggaa 127ffaa Guraandhala 23 bara 2015 Finfinneetti kabajame wajjin walqabatee wanti itti qophaa’an ga’uumsa humnoota tasgabbiitiin jalaa fashalaa’e.Guyyaan injifannoo kun adda babayii siidaa Minilik jalatti kabajamuu qaba malee maalif gara adda babayii Masqalaa geeffama?Raayyaan ittisaa kabaja guyyaa injifannoo kana akka qindeessu maalif taasifame?jedhanii mormuudhaan waan isaan bataskaana Giyoorgisii keessatti raawwatan yaadachuun barbaachisaadha.

Bataskaana da’eeffachuudhaan humnoota tasgabbii iratti dhakaa darbachuun jeeqamsi akka ka’uufi sababa kanaanis lubbuun nama tokkoo akka darbuufi namoonni muraasnis balaa madaa’uutiif akka saaxilaman taasisaniiru.Humni poolisii aara ija nama boochisu biifuuf waan dirqameef namoota hedduurra miidhaan akka ga’u taasisaniiru.

Kana duras sababa waldhabdee abbootii amantaa Tawaahidoo Ortoodooksii Itiyoophiyaa jidduutti mudate sababeeffachuudhaan hiriira hinhayyamamne Guraandhala 5 bara 2015 baanu malee jedhanii rakkisuudhaan mootummaan hiriiricha waan hin hayyamneef kunis jalaa fashalaa’ee hafeera.Kan injifannoo Adwaa sababeeffachuudhaan  bataskaan Giyoorgisiitti taasisan karoorri Guraandhala shanii waan jalaa gufateef xiiqiidhaan kan raawwatanidha.

Finxaaleeyyiin haala mijaawaa argame kamittuu fayyadamuudhaan magaalaa Finfinnee dirree jeequmsaa taasisuu irraa akka duubatti hinjenne carraaqqii yeroo gara garaatti taasisaniin qabatamaan mul’ateera.Gara fuulduraattis waan baran raawwachuu irraa akka of hinqusanne nibeekama.

Qindeessitoonni Finxaaleeyyii Amaaraa biyya alaa jiran kan akka nama Taammaany Bayyana jedhamuu ‘Mootummaa Abiy fonqolchuuf hiriirri namoonni kumni dhibbi tokko qofaan itti hirmaatan niga’a’ jedhee qajeelfama waan dabarseef gamaa gamanaa walwaamuudhaan Finfinnee dirree jeequmsaa taasisuuf wixiffatanis wanti isaan yaadan galma ga’uufii hindandeenye.

Kana malee humni finxaaleeyyiin Naannoo Amaaraa,kibbaafi Oromiyaa irraa namoonni hedduun gara Magaalaa Finfinnee akka dhufan taasisuudhaan Magaalaan Finfinnee dirree jeequmsaa akka taatuuf hedduu carraaqaniiru.Keessumattuu Naannoo Amaaraa irraa dargaggoonni hedduun gara Magaalaa Finfinnee akka galaniif sochii bal’aa taasisaniiru.Mootummaan shira kana dursee waan hubateef imalli namoonni gara Magaalaa Finfinneetti taasisan akka daangeeffame taasisee ture.

Tarkaanfii fudhatame kanaanis olola gara garaa facaasuudhaan mootummaan akka jibbamuufi akka shakkamuuf waan danda’an hunda raawwachaa turaniiru.Isaan shira itti qophaa’an hojiirra oolchuuf haala mijaawaa argatan hundatti akka fayyadaman hubatameera.Akka fedhiifi carraaqqii isaaniitti utuu ta’ee Finfinneen dirree jeequmsaa ta’uudhaan abjuun fonqolcha mootummaa isaan itti qophaa’an kan milkaa’u ture.Garuu hintaane fashalaa’udhaan hafan,qaanii baran haguuggatan.

Kanneen muraasa finxaaleeyyii deeggaraniin ala jiraattoonni Magaalaa Finfinnee irra jiraan nagaadhaan hojjetachuudhaan jiraachuu barbaadu.Irra jiraan yeroo jeeqamsaaf ba’uyyuu kan qabu miti.Nagaadhaan ba’ee nagaadhaan mana isaatti deebi’uu kan barbaadudha.Humnoonni finxaaleeyyiin garuu shira qaala’iinsa jireenyaa uumuu raawwachuudhaanis jiraattoonni nagaadhaan jiraachuu barbaadan akka hintasgabboofne taasisaa jiru.

Mootummaan dhiyeenya kanaa asitti haala qabatamaan jiru hubachuudhaan tarkaanfiiwwan sirreessaa fudhachaa jira.Shirri qaala’iinsa gatii akka fala argatuuf dhiyeessiin omishawwan gara garaa akka dabalu taasisuudhaan hawaasni akka tasgabbaa’u taasisaa jira.Tarkaanfiin kun haala fayyadamtummaa jiraattoota Magaalaa itti fufiinsaan mirkaneessuun daran cimee itti fufuu qaba.Hawaasni irra jiraan rakkoo qala’iinsa jireenyaatiif yoo saaxilamu finxaaleeyyiidhaaf haalli mijaawaan waan umamuuf kallattii kamiiniyyuu finxaaleeyyiin kamiyyuu haala mijaawaa akka hinarganneef kutannoodhaan hojjechuudhaan yeroo kamittiyyuu Magaalaan Finfinnee dirree jeequmsaa akka hintaaneef hojjechuun dirqamadha.