Obbo Addisuu Araggaa gaaffiiwwan hundi deebii akka argatan himan

Finfinnee #Ethiopia Eebila 13,2015(YMN) Obbo Addisuu Araggaa gorsaa muummicha ministiraati.Dhiyeenya kana barreeffamoota dhimma gocha sanyii balleessuu waggootaan dura raawwatameefi sochii finxaaleeyyiin biyya keenyaa taasisaa jiran qeequ waan baasanif finxaaleeyyiin biyya keessaafi biyya alaatti argaman heddu balaaleefachaanii turan.

Ergaan barreeffamoota saniin Obbo Addisuun dabarsan of eeggannoon akka taasifamuufi finxaaleeyyiin daandii jeeqamsaa filatan gocha badiirraa akka of qusataniif baruumsa kan kennudha malee waan biraa akka hinqabne beekamaadha.Finxaaleeyyiin garuu obbo Addisuun haqa waan humaniif itti duulaa turan.Kun amaluma isaanii ittiin beekamanidha.

Obbo Addisuu Araggaa ayyaana Iid-alfixir har'a kabajamaa jiru sababeeffachuun ergaa halkan edaa karaa weeb saayitii hawaasummaa isaaniin dabarsaniin oduu aagaa himan.Hidhattoonni karaa nagaatti deebi'uuf mariirra akka jiran himan.Qabiyyee ergaa guutuu isaanii dubbisaa

Rabbiin kadhata keessan dhagaheera ; Waamicha kadhataafi yaad-qalbii keessan irraa fagoo hin jiru. Balballi samii kadhata keessaniin banamaa jira. Rabbiin bokkaa roobsee, dachee magarsee, lubbu-qabeeyyiif soora gahaa kenneera; Horii beelaafi dheebuu baaseera.

Jaallatamtoota hordoftoota amantaa Isilaamaa Itoophiyaa, sagandniifi du'aayiin keessan firii godhatee, rakkoon nageenyaa Kaaba Itoophiyaa daandii furmaata nagaa qabateera. Humnoonni adda addaa hidhatanii bosona jiranis daandii nagaa filachuun misiraachoo nagaa dabalataa nu gonfachiisuuf mariirra jiru; Calqabbii imala nagaarratti argamu.

Balballi samii kallattii adda addaatiin nutti cufamee oongeedhaan nu watwaachisaa ture, yeroo ammaa kana Kaabaafi Kibbaan, Bahaafi Lixaan karra eebbaa saaqamee nuuf roobsuu eegaluu isaanitiin qe'een Itoophiyaanotaa gammachuu dachaa gonfachaa jira. Loon dheebuun qooqanii turan arga bahaniiru; Jabbiloonni dheebuu bahan burraaqaa jiru. Margi biqilee bakkeen magariisa uffateera; Daa'imman burraaqanii taphatu; Biyyi quufaafi gabbinaan guuteera.

Waan taheefis, hordoftoonni amantaa Isilaamaa guutuu Itoophiyaafi addunyaa Ramadaanni kun gaaffiiwwan keessan hundaaf deebii qabatee waan dhufeef baga gammaddan, baga gammanne jechuun fedha.

Baatiin Ramadaanaa guyyaa isa xumuraarra gaheera. Ammas du'aafi sagada keessaniin gaaffiin nuuf hin deebine tokkollee akka hin jirre amantaa guutuu qabna.

Irra deebiin baga geessan, baga waliin geenye!