Tarsiimoowwan mootummaa fonqolchuuf qophaa’e afraffaa(4)

  

Finfinnee #Ethiopia Bitootessa 28,2015(YMN) Barreeffama kutaa 3ffaa darbe irratti bal’inaan akkan kaasetti Magaalaa Finfinnee dirree jeequmsaa taasisuun tarsiimoo ykn.mala finxaaleeyyiin mootummaa jijjiiramaa fonqolchuuf itti fayyadamaa jiranidha.Tarsiimoon itti aanu maalidha?

Duula jibbiinsaa taasisuun tarsiimoo afraffaa finxaaleeyyiin mootummaa fonqolchuuf nugargaara jedhanii itti fayyadamaa jiranidha.Jibbiinsa labsuu qofa utuu hintaane maqaa balleessuunis tarsiimoo jibbiinsaa kana keessa kan jirudha.Dubbisaa!

Tarsiimoo 4:Duula jibbiinsaafi maqaa balleessuu taasisuu

Finxaaleeyyiin alaafi keessaa walqindeessan mootummaa jijjiiramaa karaatti hanbisuuf carraaqqii itti fufiinsa qabu taasisaa turaniiru,ammallee gocha isaaniirraa of hinqusanne.Duulli jibbiinsaa ‘Oromoon biyya bulchuu hindanda’u’ dhaamsa jedhu dabarsuudhaan jalqaba.

Seenessi Oromoon biyya bulchuu akka hindandeenye mul’isuufi amansiisuuf itti fayyadaman jeeqamsa babal’isuudha.Ofumaa tuqanii jeeqamsi akka babal’atu taasisu.Ofummaa ajjeessanii mootummaatu ajjeese jedhu.Ofummaa lammiiwwan buqqisanii mootummaatu buqqise jedhu.Kanaan olola isaanii barame afarsaa oolu.

Dhimma kana hanga tokko fakkeenyaan ilaaluun barbaachisaadha.Finxaaleeyyiin Amaaraafi Oromoo qindoomina guddaa akka qaban barreeffama kanaan duraa tokkoon kan ilaalle ta’us mata duree kana wajjinis wanti walitti dhufu jira waan ta’eef qindoomina finxaaleeyyii Amaaraafi Oromootiin gochoota badii raawwataman ilaaluun dirqamadha.

Dhimmi buqqaatii dhalattoota Amaaraa Naannoo Oromiyaa keessa jiraatanii yoo ka’u kan buqqisaa jiru hidhattoota Oromoo akka ta’anitti ilaalama.Wanti kun irra keessa yoo ilaalamu nama hundumaafuu dhugaadha.Hidhattoonni Oromoo gocha lammiiwwan iddoo jireenyaa irraa buqqisuu kan raawwatan finxaaleeyyii Amaaraa wajjin mari’atanii akkaataa ittiin raawwatan irratti qophaa’anii,kana boodas isaan lamaanuu haala mootummaan akka jibbamuuf olola ittiin afarsan gadi fageenyaan itti qophaa’uudhaan raawwatu.Kun ammoo yeroo adda addaatti qabatamaan ta’ee agarree jirra.

Duula maqaa balleessuu tibbana jiru kan ilaallu yoo ta’es waa’ee humna addaa hidhannoo hiikkachiisuu tibbana itti lallabamaa jiru ilaaluun gaarii ta’a.Waan hinjedhgamne akka jedhametti fudhachuudhaan humni addaa Naannoo Oromiyaa hidhannoo hinhiikkatu jechuun arrabsoofi olola hinmalle afarsaa ooluun jibbiinsa irraa kan maddudha.Humni addaa Naannoo Amaaraa jiru hidhannoosaa kan hiikkachuu qabu humna addaa Naannoo Oromiyaa jiru wajjin morkachuudhaan utuu hintaane seeraafi qajeelfama jiru qofaan deemuudhaan ta’a.

Humnoonni addaa Naannoolee kanneen biroo keessa jiranis hojmaatuma diriirfame irratti hundaa’uudhaan waan murteeffame hojiirra oolchu.Maarree akka ilaalcha Finxaaleeyyii Amaaraatti humna addaa Naannoo Amaaraa maaltu adda taasisa?hidhannoo hiikkachuun humna addaa naannichaa haala amma mul’achaa jiruun maalif mataasaanii bowwaafachiise laata?

Finxaaleeyyiin hidhannoo yaadaa hinqaban.Yaada bilchina qabu dhiyeessuudhaan tarsiimoofi sagantaa ummata fayyadu bocanii dhiyeessuus waan hindandeenyeef kan abdaatan humna qofaatti.Humna loltummaatiin mootummaa amma jiru moo’annee taayitaa qabachuu dandeenya jedhanii yaadu.Yaada faallaa qabatan kana galmaan ga’uuf ammoo afaan Qawweeti.Kanaaf humni addaa naannoo Amaaraa hidhannoo hiikkchuu hinqabu jechuudhaan wacaa oolanii bulu.Egaa jaaltames jibbames humni addaa Naannoowwan kamiyyuu keessa jiru seera jalatti kan bulu waan ta’eef qajeelfamaafi hojmaata diriirfame kabajuudhaan miieeshaa hidhate qaama dhimmi isa ilaallatutti dabarsee kennuun dirqamadha.Muummichi keenya Dr.Abiy Ahmad humni addaa naannoo kamiyyuu keessa jiru hidhannoo akka hiikkatuuf kallattii kaa'uudhaan murtee dabarsuun isaanii hojii seenaa qabeessa hojjetanidha.Bara baraan yaadatamaa jiraata.Muummichi akkuma dameewwan hojii kanneen biroo irratti hojii bu'a qabeessa hojjetan dhimma kana irrattis waan biyyaafi ummata fayyadu hojjetan waan ta'aniif galata guddaa qabu.

Dubbiftoota kabajamtoota barreeffama kana yeroon isiniif dhiyeessuu jalqabetti tarsiimoon fonqolcha mootummaa Finxaaleeyyiin qopheeffatan lakkoofsaan 11 akka ta’an isinitti himeen jira.Akkuma tarsiimoo 1ffaa hanga 4ffaatti taasise haala qabatamaa amma jiruun tokkoon tokkoon isaaniirratti barreeffama bal’aa dhiyeessuun rakkisaa waan ta’eef tarsiimoowwan hafan gaggabaabseen isiniif dhiyeesse nahoofkalchaa.Fayyaa ta’aa.

Tarsiimoolee Diinaa lakkoofsa 5-11ffaa

Tarsiimoo 5ffaa: Hoongee Gammoojjii ajandaa idil-addunyaa gochuu.

Hoongee  gammoojjii  Oromiyaa keesatti irra-deddiibiidhaan uumamaa jiru  gara “siyaasa beelaa” tti jijjiiruudhaan bifa idil- adunyaawaa akka qabaatu taasisuu, kanaanis dhimmi ala ergii qamadii Oromiyaa ajandaa kanaan cilee dibuun mootummaan akka fudhatama dhabu taasisuu.

Tarsiimoo 6ffaa: Waamicha araaraa gufachiisuu.

Waamicha Araaraa Mootummaan Federaalaafi Naannoo Oromiyaa  humnoota hidhatanii Oromiyaa keessa socho’aniif taasise akka fashaalaa’u gochuu, humnootni siyaasaa Oromoo akka tokko hin taane hojjechuu, Mootummaan Naannoo Oromiyaa fi humni hidhatee bosona jiru garaagarummaa tokko akka hin qabne fakkeessuun ummata burjaajessuu.

 Tarsiimoo 7ffaa: Diigumsa ijaarsa seeraan alaa daldala siyaasaatiif oolchuu. 

Tarkaanfii  ijaarsa seeraan alaa diiguuf Finfinnee fi Shaggar keessatti taasifamaa jiru akka waan saba tokorratti qofa xiyyeeffatee, akkasumas saba sana naannoo Oromiyaa keessaa qulqulleessuuf akka waan raawwatamaa jiruu fakkeesanii dhiyeessuun ummata burjaajessuu.  

Tarkaanfii 8ffaa:Oromoo hannaan maqaa balleessuu.

Hannaan wal-qabatee mootummaan kun mootummaa wayyaanee caalaa akka sirnaatti saamicha keessa waan gale fakkeessaanii ummata burjaajessuun hoggansa akkasumas abbootii qabeenyaa Oromoo hamilee cabsuuf yaaluu.

 Tarsiimoo 9ffaa: Mootummaan waan jigaa jiru fakkeessanii dhaadhessuu.

Ibsa Mootummaa Naannoo Amaaraa baasuun akkasumas ajandaa miidiyaa naannoo Amaraa irraa ka’uun mootummaan federaalaa biyya hogganuu akka dadhabee fi sirnichi akka waan jigaa jiruutti  dhaadhessuu.

Tarsiimoo 10ffaa: Mootummaan Federaalaa TPLF hiikkachiisaa hin jiru jechuun ummata burjaajessuu.

Mootummaan federaalaa TPLF hiikkachiisaa akka hinjirree fi lafti Walqaayitii fi Raayyaa TPLF-f akka deebi’ee kennameetti odeessuun ummata Amaaraa burjaajessanii fincilaaf kakaasuu yaaluu.

Tarsiimoo 11ffaa: Deggartoota mootummaa qaanessuu, hamilee cabsuu. 

Nama mootummaa fi paartii Badhaadhinaa deeggaru kamiyyuu tooftaalee adda addaa fayyadamuun suukkanneessuu, salphisuu,fudhatama dhabsiisuuf yaaluu.

Xumura

Galmi ijibbaata diina Oromoo aangoo siyaasaa harka Oromoo jiru dhuunfachuun Oromoo akka hin kaanetti cabsuu,sabdaneessummaa balleessuu fi sirna qeenxee deebisanii ijaaruudha.Kanaafuu, Oromoon hundi  garaa garummaa ilaalcha siyaasaa isa gidduu jiru karaa nagaan furachuun bifa ijaarameen sochoo’uun ajandaa diinni bocatee nutti duulaa jiru kana cabsuuf garaagarummaa tokko malee tokkummaadhaan falmachuu qaba!