Injifannoon injifannoo hindhalle injifannoo hinjedhamu-Muummicha ministiraa Abiy Ahmad

 

Finfinnee #Ethiopia Eebila 27/2015(YMN)Muummichi ministiraa guyyaa goototaa waggaa 82ffaa har’a kabajamaa jiru sababeeffachuudhaan ganama kana baga geessan! jechuun barreeffamaan ergaa dabarsaniiru.Ergaan guutuun muummichi dabarsan kan itti aanu kanadhaa.Dubbisaa!

Itiyoophiyaan biyya guyyaa bilisummaa utuu hintaane guyyaa injifannoo qabdudha.Hadholiifi abbootiin keenya bilisummaa isaanii waan kamiiniyyuu jijjiiruu hinfeene bilisummaadhaaf jecha wareegamaniiru.

Bilisummaan hadholiifi abbootiin keenya lubbuu wareeguudhaan nuuf tursiisan qofaasaa dhaabbachuu hindanda’u.Bilisumaawwan kanneen birootiin utubamuu qaba.Qabeenyi,gamtaafi tajaajiltummaan utubuunii qabu.

Damee diinagdeetiin jabaannee,qabeenya biyyaa yoo horachuu baanne,gargaaramtummaa keessaa yoo ba’uu dadhabne bilisummaan qofaasaatti fagoo nundeemsisu,kan hiyyummaadhaan boonee jiraatu nutaasisa malee.Gamtaa uummannee adda ba’uufi qoqqoodamuu yoo moo’achuu baanne bilisummaan qofaasaatti humna nuuf hinta’u.Bilisummaa gamtaadhaan arganne adda ba’uudhaan hayyamuma keenyaan dhabna waan ta’eef.

Biyyaafi ummata haqummaafi qulqullummaadhaan tajaajiluuf yoo murteessuu baanne bilisummaan qofaasaatti guddina hinfidu,malaammaltummaan hojmaanni duubatti hafaafi dhibaa’ummaan gara boodaatti nuharkisa waan ta’eef.

Guyyaa injifannoo keenya yoo kabajinu injifannoo gootota keenyaa booda injifannoowwan galmeessifne lakkaa’uudhaan ta’uu qaba.Injifannoon injifannoo hindhalle injifannoo hinjedhamu.