Shororkeessaa Paarlaamaa keessaa

  

Finfinnee #Ethiopia Caamsaa 10/2015(YMN) Ummata Goondar bakka bu’uun Miseensa mana marii bakka bu’oota ummataa ta’uuf carraa kan argate Kiristiyaan Taaddala mana marii keessa taa’uudhaan waan baay’eedhaan daangaa darbeera.

Kanaan dura muummicha ministiraa Dr.Abiy Ahmadiin maalif taayita gadi hinlakkiftuu? jechuun adda babayii irratti gaafatee deebiin kennameeraafi.Namtichi kun gaaffii kana kan gaafate ergama humnoota alaa isa ergatan galmaan ga’uuf akka ta’e nibeekama.

Tuttuqaan karaa namicha kanaatiin raawwatamaa jiru balaa guddaa fidee dhufuu danda’a.Manni marii bakka bu’oota ummataa nama kana abboommachuu qaba.Seeraafi qajeelfama ittiin bulmaata miseensoota mana marii bakka bu’oota ummataa cabsuudhaan utuu socho’aa jiruu cal jechuudhaan bira darbuun boodarra maalif mana kanaa hinbaatanii?maal gootu asii? jedhee akka isaan gaafatuuf haala mijeessuufii danda’a.

Kun miseensa mana maree miti.Naamusa miseensummaa mana mariis hinqabu.Kashlabbee namaati.Kashlabbeetu dubbii barbaacha oliif gadi fiigaa oola.Kanaan duras waan baay’ee jedheera.Ammas jechaatuma jira.Kan tibbana karaa miidiyaa hawaasummaa isaatiin jedhe ammoo kan nama ajaa’ibsiisudha.

Kiristiyaan Taaddala akkana jechuudhaan miseensoota hawaasa daayaaspooraa shoorokeessitummaadhaan beekkaman deeggareera,jajjabeesseera 'Miseensoonni daayaaspooraa tarkaanfii mootummaa faashistii mormuudhaan qabsoo cimaa taasisaa jirtaniin akka bakka bu'aa ummataa tokkottiin beekkamtii kennaaf.Gaaffiiwwan haqaafi walqixxummaa ummata keenyaatiif ambaasaaddara ta'uudhaan qabsoon qindaa'aan taasisaa jirtan qabsaa'oota demokraatwa hunda biratti kabaja kan qabuufi qabsoo ummata keenyaa keessattis iddoon addaa kan kennamuuf akka ta'e isiniif mirkaneessuun barbaada.Faashitiin yoo barbadaa'u du'aa ka'uun Itiyoophiyaa nijalqaba' jedhee barreesseera.

Mana marii bakka bu’oota ummataa keessa taa’uudhaan humnoota shoroorkeessitoota biyya alaa taa’uudhaan mootummaan Itiyoophiyaa taayitaa irraa akka fonqilfamuuf halkanii guyyaa hojjechaa jiran akkamitti deeggaruufi jajjabeessuun danda’amaa?Seerri farra shororkaa kanaan dura mana marichaatiin ragga’e gocha akka kanaa kan dhorkudha.Kiristiyaan Taaddala waa’ee seera kanaa quba hinqabuuyii?Moo tubbii baretu mataarra isa kore?

Miseensoonni mana marii bakka bu’oota ummataa nama kana gorfadhaa!Ta’uu baannaan miidhaan isarra ga’uu danda’u ulfaataadha.Diina alaa asnutti bookkisaa oolu deeggaruufi jajjabeessuun meedaallii kamiiniyyuu fudhatama hinqabu.