Tarkaanfii ol’aantummaa seeraa kabajisiisuu fala waarawaaf

  

Finfinnee #Ethiopia Waxabajjii 04/2015(YMN) Mootummaan Federaalaas ta’e Mootummoonni Naannolee ol’aantummaan seeraa akka kabajamuuf itti fufiinsaan hojjechuu qabu.Seera kabajisiisuun dirqama yeroo hundaa ta’uutu irra jiraata.Qabaa-gadhiisaa deemuun  bu’aa itti fufiinsa qabu argamsiisuu hindanda’u.Haalli kun ammoo kanaan dura qabaatamaan ta’ee mul’ateera.

Fakkeenyaaf ijaarsi seeraan alaa akka dhaabbatuuf tarkaanfiin fudhatamu takka ho’aa,takka ammoo qabbanaa’aa deema yoo ta’e kanneen goocha ijaarsa seeraan alaa irratti bobba’an onnachaa deemuun dhawaataan mootummaa tuffatu.Mootummaan homaa hingodhu jechuun kanneen ijaarsa seeraan alaa irratti hirmaatan baay’eedha.Gocha kanaan biyyi keenya nimiidhamte malee hinfayyadamne

Waggoota darban keessa kan qabatamaan ta’ee mul’ate kanadha.Mootummaan akka tuffatamu kan taasisan ammoo caasuma mootummaa keessa jiru.Faayidaa dhuunfaa argachaa galii seeraan alaatiin of gabbisaa mootummaan akka tuffatamu taasisuun kanneen humna maallaqaa qaban akka barbaadanitti gocha ijaarsa seeraan alaa irratti akka bobba’an taasifameera.

Waggoota darban keessa keessumattuu magaalota gara garaa keessatti ijaarsi seeraan alaa babal’achaa kan deeme walitti hidhamiinsa namoota caasaa mootummaa keessa jiraniifi namoota seeraan ala badhaadhuuf socho’aniin taasifameen akka ta’e beekamaadha.

Haala qabatamaa amma jiruun kutannoon mootummaan gochoota seeraan alaa qolachuufi hanga dhumaattis dhabamsiisuu mul’achaa jira.Keessumattuu sochiin Magaalaa Finfinneefi Naannoo Oromiyaa keessatti taasifamaa jiru akka fakkeenyaatti ka’uudhaan eeramuu kan danda’udha.

Tarkaanfiin ijaarsa  seeraan alaa bulchiina Magaalaa Shaggaritti raawwataman irratti fudhatame kutannoo mootummaan qabu kan mul’isedha.Kutannoon mootummaan mul’ise kun ammaan booda ijaarsi seeraan alaa akka hinraawwatamneef balbala adeemsa seeraan alaa kan cufedha jechuun nidanda’ama.

Namoonni faayidaa dhuunfaa kabajisiifachuuf caasaa mootummaa keessa dhokachuudhaan socho’an ammaan booda akka kanaan duraatti onnatanii deemu jechuun hindanda’amu.Haala kana kan uume kutannoo mootummaan mamii malee mul’isedha.

Bulchiinsa Magaalaa Shaggaritti tarkaanfiin mootummaan Naannoo Oromiyaa ijaarsa seeraan alaa irratti fudhate hanga tokko waca kan uume ta’ullee gama fala waaraa argamsiisuutiin shoorri gumaachu ol’aanaadha.Ijaarsa seeraan alaa duuba shirri siyaasaa akka jiru hubachuudhaan shiroota shiraman tarkaanfii seera qabeessaan kukkutuun sirriidha,barbaachisaadha.Mootummaan waanumma irraa eegamu raawwate waan ta’eef kan deeggaramudha.

Bulchiinsa Magaalaa Finfinnee keessatis kutaawwan magaalaa gara garaa keessatti sababa hojii daldala xixxiqqaatiin ijaarsawwan seeraan alaa daandiirratti raawwataman akka diigamman taasifameera.Akka himamaa jirutti manneen xixiqaa daldala xixiqaaf ijaaraman da’eeffachuudhaan gochoonni sochii fonqolcha mootummaatiif deeggarsa taasisan raawwatamaniiru.

Sochiin naannessa meeshaa waraanaa seeraan alaa akka babal’atuuf manneen seeraan ala ijaaraman kun shoora akka gumaachan odeeffannoowwan dhimmicha irratti ba’an mul’isaniiru.Hundumaafuu ijaarsa seeraan alaa kamiyyuu dhabamsiisuun fala waarawaa argamsiisuuf shoorri gumaachan ol’aanaadha waan ta’eef ummata bal’aadhaan kan deeggaraman akka ta’an beekamaadha.