Sabboonummaan ‘GOCHA’

Finfinnee #Ethiopia Hagayya 24/2015(YMN) Pirezidaantiin Mootummaa Naannoo Oromiyaa Obbo Shimallis Abdiisaa dhimma sabboontuummaa ilaalchisuudhaan ergaa dabarsaniiru.

Dhimma sabboonummaa irratti sadarkaa amma irra gahameen haalli kanaan duraa ammaaf bu’aa akka hinqabneefi sabboonummaan gocha qabatamaa ta’een utubamuu akka qabu obbo Shimallis ergaa barreeffamaan dabarsaniin hubachiisaniiru.

Qabiyyee ergaa guutuu pirezidaantichaa dubbisaa!

A. Barbaachisummaa Hiika Haaraa

Hiika siyaasni keenya hanga ammaa sabboonumaadhaaf kennu irra deebinee ilaaluu qabna. Akkaataan dhimma kana ittiin ilaallu, gulantaa qabsoon keenya irra gaheen kan walsimuu miti. Hubannoo kana sirreessuun, gama tokkoon gulantaa qabsoo irra jirruufi itti aanuu beekuuf kan nu dandeessisu yoo ta’u, gama biraatiin, garaagarummaa dhimmoota waloo ummata keenyaa irratti qabnu dhiphisuudhaan qisaasama humnaa hir'isa.

Addunyaa kana irratti namni dhuunfaa tokkos ta'e gareen tokko waan barbaadu milkeessuuf dirqama gufuu isa muudatan lama irratti ni qabsa'a.Tokko gufuu waan ta'uuf barbaadnu irratti muudataniifi gufuu waan gochuu barbaadnu irratti nu muudatan. Gufuun dhimma TA’UU qunnamu dhiibbaa qaama alaa irraa kan maddu yoo ta’u, gufuun dhimma GOCHUU irratti qunnamu ammoo dhiibbaa keessoo namticha ykn. garicha mataa isaatirraa madda. Haluma kanaan, qabsoon kamiiyyuu gulantaa walduraa duubaan dhufu lama keessa darba: Gulantaa Qabsoo ''TA’UUfi Gulantaa Qabsoo ''GOCHUU''.

B. Gulantaa Qabsoo TA’UU

Gulantaan qabsoo TA’UU irra jireessaan, dhiibbaa qaama alaa irraa bilisa ta’uuf kan taasifamudha.Qabsoon ''ta'uu'', madda keessa galtummaa of ta'uu qaama tokko sakaale maal/eenyu akka ta’e adda baasuu irratti fuulleeffata.Dhimmi TA’UU mirgoota umamaatiin (natural rights) deebisanii goonfachuu qabsaa’udhaan ibsama: akkaataa aadaa ofiitiin uffachuu, Irreeffachuu, Afaan ofii dubbachuu, Afaan ofiitiin barachuufi kkf. Ummanni Oromoo rakkoo akka kanaa dabarseera. Qabsoon Oromoon waggoota 30 fi 40 dura taasisaa ture qabsoo bifa kanaa ture. Kanaafi qabsoon sabboontota bara sanii adda durummaan Oromoo Ta’uuf taasifamuun isaa. Gufuu qaama alaa irraa dhufe kana irratti sabboontonni hedduun qabsaa’aniiru.

Namoonni/gareewwan lakkoofsa hin tuffatamne qaban har’as waa’ee Oromoo TA’UU akka qabsa’aa jiran himu. Kana raawwachuun Sabboonummaa akka isaan goonfachiisu ni amanu; akka sabboonaatti of’ilaalu. Maqaa Oromootiin qabsa’uun badii ta'uu baatus rakkoo kan ta’u, gulantaa qabsoo darbame irratti humna rakkoo Oromoon amma keessa jiru hiikuu danda’u qisaasuu isaaniiti.

Har’a Oromoo Ta'anii jiraachuun rakkoo tokko keesssa illee nama hin dabarsu. Gatii nama hin baasisu. Qabsoo jabaa gatii qaaliin itti kaffalameen boqonnaan sun cuamfeera.Har’a Oromummaan eenyummaa itti qaana’amu osoo hin taane, kan ittiin dhaadatamu ta’eera. Har’a Oromoo TA’UUFAN qabsaa’a jechuun bilisummaa Oromoo TA’UU qabsoo hadhaawaa sabboontota hedduutiin deebi’ee argame osoo hin beekin busheessuu ta’a.

Qabsaa’ota kanneeniin SABBOONTOTA jechuun keenya, qabsoo yeroofi gulantaa isaa eege waan taasisaniifi. Galanni SABBOONTOTA sadarkaa kanaan nu gahaniif haa ta’u!

C. Gulantaa Qabsoo ‘GOCHUU’

Gulantaan qabsoo lammaffaan gulantaa GOCHAAti. Gulantaan qabsoo GOCHUU gufuu of TA’UU qaama alaatiin nama muudate irraa, erga bilisa bahamee booda kan dhufudha.Qabsoo mirga fedhii, hawwiifi galma ofii dhugoomsuuf ofirratti taasifamudha.Dhimmi GOCHUU dhimma “naaf mala” (entitlement) jedhu ilaallata. GOCHUUn dandeettii galma ofii milkeessuu danda’uu irratti fuulleeffata.

Yaadamni GOCHUU gaaffii “maddi keessa galtummaa qamni tokko akka waan barbaade GOCHUU hin dandeenye murteessu maali/eenyu?” jedhu irratti xiyyeeffata.Qabsoo lafarratti hojjechuun/GOCHAAn ibsamudha.Garbi tokko qabsoo taasiseen mirga ofta’uu deebisee goonfachuun dhuma qabsoo isaa miti; gahaas miti. Mirga goonfate dhugoomsuuf qabsoo GOCHAA’tti ce’uu qaba.Gochi ammoo jiraachuu waa tokkoo barbaada: qabeenya, beekumsa ykn. ogummaa gatii baasu.Kanaaf, mirga of TA’UU argate kana GOCHAA’n gadi dhaabuuf, rakkoo qabeenyaa, beekumsaa ykn. ogummaa gatii baasu dhabuu isaa irratti qabsaa’u qaba.Qabsoon GOCHUU, qabsoo qaama alaa irratti taasifamu osoo hin taane, qabsoo ofirratti taasifamu/ofirratti hojjechuu ta’uu qaba kan jennu kanaafi.

Gulantaan qabsoo Oromoo amma irra jirus gulantaa GOCHAAti. Bara ummanni Oromoo mirga aadaafi duudhaa isaatiin buluu goonfatetti, bara ummanni Oromoo mirga Afaan isaatiin barachuu, hojjechuufi ofbulchuu goonfatetti,roorroo Oromoo TA’UUn gahaa ture odeessuun sabboonaa nu hin taasisu. Inumaayyuu tattaaffii injifannoo TA’UU argame GOCHAA’n gadi dhaabuuf taasifamu kan nujalaa danqudha.

Bara kana Oromoon aartii akka qabu namuu ni beeka. Qabsoon nu’eeggatu, qabsoo gama aartitiin ofTA’UU osoo hin taane, Oromummaa gama aartitiin deebisee goonfate kana GOCHAA’n utubuudha. Qabsoon akka sabboontota Oromoo tokkootti nu eeggatu, aartii beekkamtii argate kana barnootaan, leenjiidhaan, teeknoolojiidhaan, giddu gala aartii babal'isuudhaan cimsuudha. Qabsoon akka sabboonaa Oromoo tokkootti nu eeggatu, dhaloota mirga ofTA’UU booda dhufeefi dhufaa jiru kanaaf barnoota qulqullina qabuu dhiyeessuu akkasumas teeknoolojii addunyaan irra gahe hidhachiisuun sadarkaa kamittuu dorgomaa akka ta’u gochuudha. Ummata Oromoo qabsoo hadhaawadhaan abbaa biyyummaa isaa deebifatee kana diinagdeedhaan akka gahoomu qabsoo GOCHAA’tiin bira dhaabbachuudha.

Hooggansi jijjiiramaa keenya yeroo hojiitti galu gulantaan qabsoo ammaa, GOCHAA’n agarsiisuu akka ta’e hubannoo guutuu waliini. Hojii ijoon sabboontota Oromoo dandeettii GOCHUU ummata keenyaa guddisuu kan ta’u akkataa kanaan yoo ilaalle. Dandeettiin GOCHUU ummata keenyaa kan guddatu, karaa kamuu osoo hin taane, murtoo gochaaf ofkennuu, fedhii halkaniif guyyaa dadhabuu horachuu, akkasumas naamusa cimaan socho’uuf qophaa’uu gaafata. Walumaa galatti GOCHA barbaada. Raawwii pirojaktoota kumaafi kitilaa, tarkaanffilee haaraa hedduu waliin waldhaansoo kan qabne kanaafi.Qaama Oromoodhaaf dhaabbadhe jedhu kamuu waliin, sadarkaa kanatti tumsaan qabsaa’uudhaaf qophiidha.

D. Galmoota Gulantaa Qabsoo GOCHAA

Gulantaan qabsoo ammaa qabsoo GOCHAA akka ta’e yoo walii galle, galma inni milkeessuuf kaayyeffate ibsuun barbaachisaa ta'a. Waa sadi irratti luucceffata: dhaloota barnootaafi teeknoolojii hidhate, ummata diinagdeedhaan gahoomeefi sirna cimaa qabaachudha.

1. Dhaloota BARNOOTA (qulqullina qabuu) fi TEEKNOOLOJII hidhate uumuu

Naannoon keenya barattoota mil. 11 ol barsiisaa jira. Waliin gahiinsa barnootaa cinaatti qulqullina barnootaa eeguun dhimma ijoo ta’uu hubachuun inisheetivoota adda addaa baajata mootummaafi humna waloo (tajaajila lammummaa) fayyadaman bocuudhaan hojiitti galle. Gama kanaan ijaarsa Manneen Barnootaa Addaa Ifa Boruu, Manneen Barnootaa Bultii Addaa Ifa Boruu, Manneen Barnootaa Bu’uura Boruu Sadarkaa Tokkoffaa Duraa, dareewwaan dabalataa kumaatamaan lakkaawwaman,hojiilee mijattummaa manneen barnootaa dabaluu, akkasumas dhiyeessii nyaata barattootaa caqasuu dandeenya.

2. Ummata keenya DIINAGDEEdhaan gahoomsuu

Milkaa’ina galma kanaatifis inisheetivoota hedduu bocuudhaan socho’aa jirra. Inni jalqabaa karoora mootummaa hanga sadarkaa maatiitti gadi buusuudhaan Badhaadhina Maatii milkeessuu ilaallata. Dabalataanis,qusannaa jajjabeessuu, hammatummaa faayinaansii baadiyyaa (rural financial inclusion) dabaluu, dandeettii galii maddisiisuufi sassaabuu guddisuu,dorgomummaafi dandeettii galii maddisiisuu dhaabbilee misoomaa mootummaa cimsuu, Interpiyuunarummaa babaldhisuu, too’annoo (regulations) jabeessuun fayyadamummaa ummataa mirkaneessuu kaasuu dandeenya.

3. SIRNA CIMAA (hin reeqqifne) ijaaruu

Gama kanaan, riiffoormiiwwan kenniinsa tajaajila mootummaa, babaldhina dijiitaalaayizeeshinii, sirnoota dhawaata badaa dhufan deebisanii gadi dhaabuu: Busaa Gonofaa, Tajaajila Lammummaa, Mana Murtii Aadaa, Gaachana Sirnaa, hirmaachisummaa ummataa mirkaneessuufi kkf. kaasuun ni danda’ama.

Walumaa galatti, hiika “Sabboonummaa”dhaaf qabnu irra deebinee ilaaluu qabna. Humna keenya gargar hiree kan nu laaffise dhimma kana ilaalchisee fuula walfakkaataarratti argamuu dhabuudha. Ammaan booda, gulantaa qabsoo darbe irratti humna keenyaa qisaasuu hin qabnu.

Hoggansi sadarkaan jirrus waan tokko hubachuu qabna. Ummata irratti aangofnee miira tajaajiltummaafi GOCHA tajaajilaa tokko malee, quuqama ummata Oromoodhaaf ‘qabnu’ dhaadhessuudhaan sabboonummaa goonfachuu hin dandeenyu. ‘Sabboontonni’ Oromoo hundi, GOCHAA’n qabsoofnee sabboonummaa dhugaa haa goonfannu.

Sabboonaan, nama GOCHAAN lafarratti ummata isaatiif waa xiqqoo GOCHUU danda’u.

Gamtaan taanee, GOCHAAN haa qabsoofnu!

GOCHAAN qabsoofnee Sabboonummaa haa goonfannu!

Sabboonummaan GOCHA! Jedhaniiru pirezidaantiin Mootummaa Naannoo Oromiyaa obbo Shimallis Abdiisaa ergaa fuula miidiyaa hawaasummaa isaaniirratti dabarsaniin.