'Waraabessi Guyyaan Yuuse Beekkachiise'

Finfinnee #Ethiopia Hagayya 11/2015(YMN) Shororkeessitummaan akka babal’atuuf hojjechaa kan jiran kanneen humnoota alaatiin bitamanidha.Diinonni Itiyoophiyaa maallaqa guddaa baasuudhaan yeroo adda addaatti ergamtoota bitachuudhaan bobbaasaniiru.

Ergamtoonni diinaan bitaman kun sochii taasisaniin Itiyoophiyaa akka diiganiif kan ergaman ta’ullee hanga ammaatti Itiyoophiyaa diiguu hindandeenye.Gara fuulduraattis kaayyoosaanii diigumsaa milkeessuu hindanda’an.Carraaqqii amma taasisaa jiraniinis ta’e gara fuulduraatti taasisaniin Itiyoophiyaa diiguu akka hindandeenye beekamaadha.

Garuu sochiin ergamtoonni deeggarsa humna diinaatti fayyadamuudhaan taasisan hojiin misoomaafi guddinaa akka miidhamuufi sadarkaa barbaadamuun milkaa’uu akka hindandeenye taasisuu danda’a.Haqa kana hubachuudhaan hojiin diina qolachuufi misooma itti fufsiisuu walfaana deemaa jira.

Dhugaa kanaaf ragaan qabatamaan jiru hojii qonna gannaa qonnaan bultoonni Itiyoophiyaa haala qabatamaa naannawa isaaniifi waqtii gannaa jirutti fayyadamuudhaan hojjechaa jiranidha.

Hojiin qonna gannaa utubaa diinagdee biyya keenyaa ta’e iddoo tokko tokkotti sababa hanqina dhiyeessii xaa’oofi sanyii filatamaatiin kan duubatti harkifate ta’us irra jiraansaa yoo ilaalamu  akkuma kanaan duraatti abdachiisaadha.Abdiin jiru ammoo baatiiwwan gannaa keessas jallisiidhaan omishi qamadii akka babal’atu waan ta’eef dachaadha.

Haala abdachiisaa akka biyyaatti jiru  kana maddiitti rakkoon boora’uu Nagaa naannoo Amaaraafi iddoowwan Naannoo Oromiyaatti mudate garuu yaaddessaadha.

Keessumattuu gareewwan diina irraa ergama fudhachuudhaan socho’an miidhaa geessisuun isaanii beekamaadha.Sochiin Naannoo Amaaraa keessumattuu  magaalota keessatti torban tokkoof ugguramee ture miidhaan sochii diinagdee irratti geessise salphaadha kan jedhamu miti.Haala uumame kanaan lammiiwwan baay’eetu miidhame.Kan galii guyyaatti argatu qofaan jiraatu irraa eegalee hookkara uumameen kanneen miidhaman baay’ee akka ta’an tilmaamuun waan nama dhibu hinta’u.

Kana hunda maaltu fide jechuun gaafachuun barbaachisaadha.Rakkoon amma jiru hundumtuu akka uumamuuf sababa kan ta’e fedhii taayitaati.Kanneen ‘ana malee ati hinbeektu,anatu siif beeka’ jedhan yeroo adda addaatti fedhii taayitaaf qaban guuttachuuf jecha sababoota adda addaatti fayyadamuudhaan hookkarri akka ka’u taasisaniiru.Kanneen tokko tokko fakkeenyaan kaasuudhaan yaadachuun barbaachisaadha.

Finxaaleeyyiin kamiyyuu waan da’eeffatan hindhaban.Dhimma amantaa,dhimma sabummaafi kanneeniin walqabatanitti fayyadamaa turaniiru.

Kanaan dura dhimma amantaa bataskaana Ortodooks tawaahidoo Itiyoophiiyaa da’eeffachuudhaan mootummaa ummataan filatamee taayitaarra jiruufi imaanaa ummataan itti kenname ba’achaa jiru humnaan taayitaa irraa fonqolchuuf hedduu carraaqaniiru.Sochiiwwan dhimma kana wajjin walqabatanii iddoowwan birootti taasifaman akkuma jiran as Magaalaa Finfinnee keessattis dhimma amantaa da’eeffachuudhaan mootummaan taayitaa irraa akka bu’uuf carraaqqiin guddaan taasifameera.

Jarri kun eenyufa’i akka ta’an dhiyeenya kanaa asitti ummata bal’aadhaan sirritti beekameera.Jarri kun akka abboota keenyaatti hundumtuu nuufa mala,Itiyuphyummaan nuun ala gatii hinqabu,hundumtuu nujalatti buluu qaba jechuudhaan kanneen hurufa irratti bookkisaa jiranidha.Hanga ammaatti waan danda’an hunda raawwataniiru.Ammaan booda garuu hindanda’an!

Carraaqqii kallatti adda addaatiin sababa uumuudhaan taasisan itti fufuudhaan xumura irratti gooticha Raayyaa Ittisa Itiyoophiyaa se’atan.Tuffiin baran mataa irra isaan ba’ee qawwee sababa adda addaa da’eeffachuudhaan of harka galfatan Raayyaa Ittisa Itiyoophiyaatti aggaaman.

Akkuma kanaan dura mootummaa humnaan taayitaa irraa fonqolchina jechuun socho’an Raayyaa Ittisa Itiyoophiyaas se’achuudhaan mee waan ta’u ilaalla jechuun waan yaalan fakkaata.Yaaliin isaan onnachuudhaan taasisan kun utuu oolee hinbulin gatii harkasaanii akka argatan taasise.

Hordoftoonni isaanii olola isaan biyya keessaafi alaa taa’anii afarsaa oolanii bulaniin machaa’an wanti jedhamuufi lallabamu dhugaa itti fakkaatee Raayyaa Ittisa Itiyoophiyaatti onnachuudhaan dhukaasan.

Waan duursanii ofumaaf jalqabaniif amma Naannoo Amaaraatti deebii gahaafi barbaachisaa ta’e argachaa jiru.Deebiin gootota keenyaan kennamaafi jiru gaabbii keessa akka isaan galchu shakkiin hinjiru.

Kanneen caasaa Badhadhinaa keessa taa’uudhaan haala mijeessaa turan kan akka Gadduu Andaargaachoofi Yohaannis Booyaaloo xumura irratti wanti yaadan akka hin milkoofneef hubannaan adda babayii irratti ba’uudhaan of saaxilan.Namoonni kun aantummaan isaanii diinaaf akka ta’es qabatamaan mul’isan.

Yohaannis Booyaaloo kanunaam durayyuu hooggansi jijjiiramaa kan fuuldura irra jiru’Hoomechadha,gatii hinqabu kana nuuf dhiisaa’ jechuun humnoota Ameerikaa jiraataniif akka waadaa gale nibeekama.Jarri kun qophiin taasisan bal’aa akka ta’e haala isaan tibbana mul’isantu nutti agarsisie.

Maqaa Ummata Amaaraatiin dhaadachaa faallaa mootummaa biyya bulchaa jiruu deemuudhaan yaalii lakkaa’amee dhuma hinqabne taasisaniiru.Xumura irratti humna qawwee malee fala biraa hinqabnu jechuudhaan murteessan.Kana booda hooggantoota Naannoo Amaaraa ga’uumsa hooggansaa qaban filuudhaan adamsanii ajjeesuu jalqabaan.Gochi ajjeechaa Girmaa Yeshixilaafi Namoota kanneen biroo irratti raawwatan kanaaf ragaa qabatamaa yoomiyyuu hindagatamnedha.Gochi ajjeechaa humnoonni kun Maqaa ‘Faannoo’ da’eeffachuudhaan iddoowwan adda addaatti raawwatan caasaan paartii Badhaadhinaa Naannoo Amaaraa keessa jiru hundi dhibbaa isaanii jala akka gale xumura irratti hubatameera.

Utuu kun ta’uu baatee haalli amma mudate gonkumaa mudachuu hindanda’u.Caasaan Badhaadhinaa naannicha keessa jiru hooggansa irraa eegalee hanga sadarkaa gadiitti kan argamu gareewwan finxaaleeyyii kana gara deeggaruutti kan deeme akka ta’e haaluma qabatamaan jirutu ragaadha.

Egaa Waraabessi biyya alaafi biyya keessa jiru qindaa’ee yuuseera.Waraabessi qindoomina guddaa uummate kun baga guyyaan yerootti yuuse.’Waraabessi guyyaan yuuse beekkachiise’jedhama.

Waraabessa yerootti utuu hindhiyin nutti yuuse kana ofirraa qolachuun nidanda’ama.Amma waraabessi yeroosaa malee guyyaadhaan yuuse kun akka isaaf galutti qolatamaa jira.Geerarsii kanaan dura dhageessifamaa tures amma gara bootichaatti jijjiirameera.

Ifatti ba’ee himamuu baatus miidhaan waraabeessa guyyaan yuuserra ga’e ol’aanaadha.Booyichi isaanii kan heddumates sababa malee akka hintaane sirritti hubatama.Marii Nagaa malee waraanni fala miti jechuun kan lallabaamaa jirus kanumaaf akka ta’e nibeekama.Amma kanneen humna abadachuudhaan bookkisaa turan akka kanaan duraatti caraanuu hindanda’an.Diinni alaafi keessaa deeggarsa taasisaafii tures harka diriirseef dachaasuun isaa kan oolu hinta’u.Kun hunduu kan ta’uu danda’e utuu hindhiyin yerootti waan yuusaniifi.Baga dafanii yuusan!Fayyaa ta’aa!