Ayyaanoota Fulbaana keessaa

Finfinnee #Ethiopia Fulbaana 04/2016(YMN) Baatii Fulbaanaa keessa Ayyaanoota hedduutu kabajama. Kan jalqabaa ayyaana jijjiirama baraati.Barri moofaan 2015 xumuramuusaa labsuufi bara haarawa 2016 simachuu keenya beeksisuuf jecha Fulbaana1 bara 2016 ayyaana simannaa waggaa harawaa kabajuudhaan dabarsineerra.

Ayyaanoonni itti aanuudhaan Fulbaana keessa kabajaman kanneen biroos dhufaa jiru.Kan duraa Mooliida.Hordoftoonni amantaa Islaamaa akka himanitti ayyaana Moolidaatiin guyyaa dhaloota Nabiyyuu Mahaammaditu kabajama.

Odeeffannoon ayyaana Moolidaa wajjin waqabatanii jiran akka mul'isanitti ayyaanni moolidaa akka ayyaanoota Islaamaa kanneen birootti ho'ifamee hinkabajamu.Kanneen kabajan garuu jiru.Sababasaa hordoftoota amantichaatu sirritti beeka waan ta’eef dhimma kana isaanumaaf dhiisuu wayya.

Ayyaanoota walakkeessa baatii Fulbaanaa keessa kabajaman keessaa tokko kan ta'e Ayyaanni Masqalaas sussukuun dhufaa jira.Oromoon akka jedhutti Masqalli mootii ayyaanaati.Kunis sababa quubsaadhaan akka himame beekamaadha.

Masqala booda Gara xumura baatii Fulbaanaatti kan kabajamu ammoo Irreecha Oromooti.Ayyaanni Irreecha Oromoo Finfinnee doloolloo Biddeenaafi Bishooftuu Hora Arsadeetti kabajama.

Egaa ayyaanonni kun ayyaanota ummata bal’aati.Keessumattuu Ayyaana Irreecha Oromoo irratti lammiiwwan biyyaa miliyoonaan lakkaa’amantu irratti argama.Tuuriistoonni biyyaalee alaas ayyaanoota kanneen irratti baay’inaan akka argaman beekamaadha.

Keessumattuu ayyaana Masqalaa sababeeffachuun jala bultii irratti sirna Damaraa Fulbaana 16 bara 2016 gaggeeffamu irratti ummata hedduutu hirmaata.Ayyaana Irreecha Oromoo torban Masqalaatti kabajamu irrattis haaluma walfakkaatuun lammiiwwan miliyoonaan lakkaa’amutu hirmaata waan ta’eef ayyaanonni Ummtaa kun akkuma barame karaa nagaatiin kabajamanii akka darbaniif qaamolee mootummaa nagaafi tasgabbii kabajisiisan maddii hiriiruudhaan shoora lammummaa gumaachuun barbaachisaadha.Fayyaa ta’aa!