Abbaan humnaa akkana kunoo!

Finfinnee #Ethiopia Onkololeessa 08/2016(YMN) Hooggantoonni biyyaalee lixaa torban kana didichanii gara Teel-Aviivitti qajeelan.Nuti ammoo waan kana taajjabbiidhaan ilaalle.Edaa akkana dubbiin jenne.Waan ofii yoo ta’u hunduu waliif birmata.Loogdummaa Israa’eliif qabaniin akkaataa kanaan akka dhabuusaanii taajjabne.

Dura gara naannichaatti kan qajeelan ministira dhimma alaa Ameerikaa Antoonii Biliinkan ta’uusaanii agarre.Itti aanee pirezidaantichatu dhaqe.Joo Baayidan Israa’eel erga dhaqanii booda ammoo muummichi ministiraa Biriitaaniyaa Riishii Suunaak  magaalaa Teel-Aviiv galuusaanii dhageenye.

Waan gaarii,falaaf yoo ta’e daansaadha.Garuu hinfakkaatu.Filisxeemootaaf yaaduudhaan quuqamaan akkana ta’an jechuun waan danda’amu miti.Gareen Hamaas Israa’eel irratti miidhaa geesseseera sababa jedhuun waraanni Israa’eeliifi garee Filisxeem jidduutti tibbana jalqabame jarreen kun didichanii garasitti qajeelanis hindhaabbanne finiinuudhaan itti fufeetuma jira.Qondaaltoonni kun waldhabdee mudatetti fala hinargamsisan taanaan,miidhaan lubbuu namaafi qabeenyarra gahaa jiru hindhaabbatu taanaan imalliifi ariifannaan isaanii gatii hinqabu,bilaashadha.

Amma miidhaan Israa’eel Magaalaa Gaazaa irratti geessifte ol’aanaa akka ta’e miidiyaa isaaniitiin irra deddeebidhaan gabaasaa jiru.Miidiyaawwan isaanii waan goftoliin isaanii jedhan irratti wanti nutti himan tokkollee hinjiru.Yoo himanis irra dibaan bira darbu.Har’a ganama BBC’n akkana jechuun gabaasaa ture.”Muummichi ministiraa Biriitaaniyaa Riishii Suunaak daawwannaa guyyoota lamaatiif Teel-Aviiv galaniiru”jedheWaan biraas dabalee nutti hima jennee eegnus homtuu hinjiru..Amma dhuguma wanti kun daawwannaafi?Jennee yoo gaafanne akkasumas jarri kun naannawa bahaa jiddu galeessaa kana unkuruudhaaf shira xaxaa jiru jechuun yoo shakkine eenyutu nudhorkaa?Itti aansuudhaan ammoo isaan kam dirree waraanaa taasisuu akka barbaadan kan ilaallu ta’a.