Dhukkubni sirna daldalaa keenya sirnaan wal’aanamuu qaba!

Finfinnee #Ethiopia Waxabajjii 28/2016 (YMN) Akka biyyaatti dameen daldalaa dhukkubsatee jira.Kunis tuttureera.Daldalli akka dhukkubsate namuu ni beeka.

Daldalaan ofiif qofa yaada jennee komachuun maqaa itti baafne, amala keenya kana hubatee sirriitti beeka,kan birrii shantamaa birrii dhibba,kan kuma tokkoo kuma lamatti yoo gurgure eenyutu mormuu danda'a?kan gaafatuhoo jiraa?

Dubbii keenya irratti, waan kana akkumakoo hubattaniittuu?taajjabdanii laata?Biyya keenya keessatti gatiin oomisha tokkoo yeroo tokkotti ol kaafame ykn. dabale yoo ta'e, gara fuulduraatti daballiifi caalmaan oomisha yeroo booda  yoo dhufellee haalli bakka gatii gurgurtaa duraan turetti itti deebi'uu danda'u ykn. gatii wal madaaluun gurguramuufi daldaalamuu danda'u hinjiru.Dhugaa dubbachuuf gonkumaa hin jiru.Maaliif? jennee gaafachuu qabna!Sirni gabaa bilisaa kana fakkaataayii? Akkanaayii?Daldalaan akkas jedha,’gabaa bilisaa waan ta'eef gatiin barbaadeen gurguruuf mirgan qaba’

Hundaafuu faalla’uu sochii daldalaa biyya keenyaa kanaaf sababni guddaan maalidha jettu? Kabajamoo Muummichi Ministeeraa keenya dhimma qaala’iinsa gatii irratti darbee darbee haala addunyaa irratti waan nutti himan irraa kan hafe, qaamni damee daldalaa deebii kallattiifi qabatamaa nuuf kennuu danda’u jiraa laataa?Rakkoon qaama mootummaa damee daldalaa jira.Ministeerri Daldalaafi Walitti Hidhamiinsa Naannawaa jedhamu sun lubbuun jiraayii?mee haagafannu maalif callifna?

Dubbataa rakkootu mudata,kanaaf hindubbatin callisi!, jedhanii nu barsiisanii akkaataa kanaan guddannee rakkina keessa jirra!Dhaabbanni mootummaa ani armaan olitti kaasefi caasaan isa jala jiru maaliifi eenyuuf akka hojjetan waan beekan hin fakkaatan.

Qondaaltonnifi mootummaan ummatakoo tajaajilu jedhee itti amanee muude,gocha maal nadhibeetiin mootummaan akka komatamu taasisaa utuu jiranuu maalif callifama?

Namoonni damee daldalaa hoogganan sun akka waraanaatti miidiyaa sodaatu jedhan.Maalif sodaatuu?Gaaffiifi komii ummataaf deebii akka kennan yeroo gaafataman,akka didan beekameera,haallisaanii hubatameera.

Hundaafuu mee asirratti isn maal jettu?qaamni mootummaa hojjeteefi waan hojjetetti amanu onnatee dubbata,hojii hojjete ija jabinaan dubbatee ummataaf ibsuu irraa duubatti hin deebi'u.

Dhukkubni sirna daldalaa hooggansa damichaa irraa eegala, bu'aan isaas madda komii ummataa ta'uu isaati.

Sababa jijjiirama gatii idil-addunyaa irraa kan ka’e gatiin oomishaalee boba’aa jijjiiramuu danda’a,Tole haata’u gatiin oomishaaleefi meeshaalee biyya keessatti oomishamaniifi hawaasni harki caalaan itti fayyadamuhoo, sababa maaltiin oolee bulee gatiin isaanii akka malee dabalaa deemaa?Dhugumatti akkaataa fedhii daldalaafi faddaaltotaatti yeroo yeroon dabalaa deemaa jira.

Sochiin damee daldalaa bakka lammiileen itti saamaman, oomishtoonni gatii humna isaanii itti hin arganne,dhuunfoonni karaa neetworkii baraniin kan itti fayyadamaniifi ittiin kabajaman ta’eera.Kun dhukkuba guddaadha.Dameen daldalaa akka malee dhukkubsate kun dawaa argatee akka fayyu hawwina.