Madaa Mogolee Mudaammuddiitti ol ba'uuf yaale

Finfinnee Muddee 05/2016(YMN)Mootummaan Itiyoophiyaa amma Badhaadhinaan hoogganamaa jiru obsi humnoota seeraan ala socho'aniif mul'ise akka malee bal'atee kan turedha.Utuu obsii mootummaa daangaa dhabuu baatee haalli amma qabatamaan mul'achaa jiru uumamuu hindanda'u.

Mootummaan keenya bilisummaa daangaa hinqabne kenne.Kanaafis  sababa qaba.Kan ukkaamamee ture hundi qlleensa gaarii akka argatuuf karra bane.Mootummaan Demokraasiin akka babal'atuuf dagaagaa akka deemuuf jedhee balbala bal’aa waan baneef dararame.Mootummaan keenya ofis dararee ummanni bal'aanis akka dararamu taasise.Dhugaan kun waan fuulleetti mul'atudha.Dhokachuufi dhokfamuu hindanda'u.Waakkachuunis waan danda'amu miti.Hunduu kana sirritti nibeeka.

Keessumattuu mootummaan kallattii Badhaadhinaatin hoogganamaa jiru rakkooleen hedduun akka jiran waan beekuuf akkaataa rakkooleen fala ittiin argatan erga mijeessee tureera.Haala mijaawaa uumeera.Kan darbe dhiifamaan bira darbuudhaan Dhiifama,Nagaafi Jaalalli bu’ura bal’aa akka qabaataniif carraaqeera.

Yaadama ida’amuu fiduudhaanis hundumtuu ida’amee biyya takkittii qabnu Itiyoophiyaadhaaf akka hojjetuuf mootummaan kallattii sirrii kaa’eera.Kallattiin sirriin kaa’ame kun garuu humnoota gara garaa muraasa biratti fudhatama utuu hinargatin tureera.Humnoonni kallattii mootummaa Itiyoophiyaatiin kaa’ame hinfudhannu jedhan jalqabuma irraa eegalee kan didan kanneen faayidaan isaanii jalaa tuqame akka ta’an nibeekama.

Humni dhufiinsa Badhaadhinaa dura biyya bulchaa ture yaadama ida’amuu fudhachuu kan dide maalif akka ta’e beekamaadha.Durumaanuu kan ani jedhe malee ta’uu hinqabu jechuun kan beekamu humni of-tuulaan taayitaa mi’eeffate kan qabsoo ummataatiin irraa fonqolfamuu utuu beekuu taayitaa hunda qoqqoodee bulchuutti waan deebi’uu danda’u itti fakkaatee akka malee wixiffate.

Waan hundaan keessumattuu qabeenyi biyyaa damee loltummaatiin Itiyoophiyaan waggoota hedduuf carraaqxee horatte harkasaa keessa akka jiru waan beekuuf qophaa’ee waraana bane.

Caasaa raayyaa ittisa biyyaa Itiyoophiyaa dhawaataan akka happise waan beekuufis homtuu hindhufu jedhee tuffii bareen qophii gahaa taasisuun ajaja kaabaa irratti miidhaa geessisuudhaan gara taayitaatti deebi’uuf carraaqe.Humni amma bututee botoroo ta’ee taa’uuf dirqame haalli dura irratti ittiin ka’e yaaddessaafi suukaneessaa waan tureef ummattoonni Itiyoophiyaa kutannoodhaan ka’uudhaan qolachuudhaan ofirraa adabachiisan

Bu’aan kun akka galmeeffamuufis hooggansi jijjiiramaa kutannoodhaan hojjeteera.Dhuma irrattis Nagaa wayya,waan hunda karaa naagaatiin fixuutu filatama jechuun gara marii nagaa Piriitooriyaatti deemamuun waliigalteen nagaa Piriitooriyaafi Keeniyaa Naayiroobii mallatteeffameera.Amma akka barbaadameefi eegametti ta’uu baatus waliigalteen Nagaa Piriitooriyaa hojiirra oolaa jira.

Waliigalticha booda waan ta’aa jiru ilaalunis barbaachisaadha.Gareen shororkeessaafi finxaalessaan durumaanuu wayyaanee wajjin waliigaltee qabu Shaneen waliigalteen nagaa Piriitooriyaa erga mallatteeffamee booda sochii Oromiyaa keessatti taasisaa ture finiinsuudhaan ummanni Oromoo akka dararamu taasise.

Gochi suukaneessaan shaneen ummata irraan ga’e suukaneessaafi sochiin diinagdee akka gufatus kan taasisedha.Ummanni manaa ba’ee galuu akka dadhabu taasiseera.Shiftnaan maqaa Shanee da’eeffattes iddoowwan adda addaatti gocha saamichaatti bobba’uudhaan waanuma shaneen ummata irratti raawwate raawwachaa turte.

Mootummaan Itiyoophiyaa nagaafi tasgabbii ummataa eegsisuufi kabajisiisuuf dirqama waan qabuuf tarkaanfii yeroo adda addaatti fudhateen shororkeessitootaafi hattoota irratti tarkaanfii duuba deebii hinqabne fudhateera.Kanaanis humni shaneefi saamtootaa akka dadhabe beekamaadha.Shororkeessitoonni tarkaanfii mootummaan Itiyoophiyaa isaan irratti fudhate dandamachuu waan dadhabaniif badii ofiif raawwatan waakkachuun mootummaa Badhaadhinaan hoogganamaa jirtutu ummata miidhe jechuun yeroo adda addaatti ololaniiru.Ibsa kaleessa ba’eenis waanuma barametu dabalame,wanti haarawaan hinjiru.

Finxaaleeyyiin gamaa-gamanaa qindaa’uudhaan socho’an mootummaa Itiyoophiyaa moo’achuu dandeenya jechuun wixiffatan waan hindandeenye wajjin falman.Mootummaan Itiyoophiyaa wixiffannaa finxaaleeyyiifi ergamtoota diinaatiin fonqolfamu amma hinjiru.Humna mootummaan Badhaadhinaa horate hubachuu dadhabuun finxaaleeyyiin hundumtuu akka miidhaman taasiseera.Fiild Maarshaal Birhaanuu Juulaa tibbana akka mirkaneessanitti finxaaleeyyiin Amaaraa haleellaa raayyaa ittisaatiin irratti fudhatame irraa baraaraman gara gammoojjii Naannoo Amaaraatti baqachuudhaan jireenya gadadoo  keessa turuuf dirqamaniiru.

Shaneen maqaa Oromootiin socho’aa turtes weeb-saayitii hawaasummaa irratti qawwee hidhattee suuraa mul’isuudhaan ala eessayyuu akka hingeenye hubatameera.Bu’aan kun kan argame tumsi ummanni mootummaadhaaf taasisu ol’aanaa waan ta’eefidha.Ummanni farreen nagaatiin rakkate humnoota badii hunda saaxiluudhaan mootummaatti dabarsee kennaa tureera,ammas tumsa mooruummaa maddii hiriiruudhaan taasisaa jiru daran cimmsuudhaan itti fufeera.

Amma humnoota badii guutummaatti adabachiisuudhaan gara marii biyyalessaatti deemuun barbaachisaadha.Mariin biyyaalessaa Itiyoophiyaan itti qophoofte rakkoolee hedduu Itiyoophiyaa keessatti bu’ura gadi fageeffatanii turaniif fala waaraa kan argamsiisudha.Humnoonni adda addaa keessaafi alaa wixiffachaa jiran mariin biyyaalessaa akka hinmilkoofneefis socho’aa akka jiran qablbeeffachuun barbaachisaadha.

Marii nagaatiin rakkooleen Itiyoophiyaa fala yoo argatan burjaajeessitoonni fayyadamuu hindanda’an,galiin shiraan hammaarratan jalaa hafa.Itiyoophiyaan yoo tasgabboofte sochii misoomaafi guddinaa eegalte finiinsuudhaan haala amansiisaadhaan itti fufuu dandeessi.Kun ammoo du’aafi badiinsa finxaaleeyyii hundaa saffisiisa.Humnoonni badii kunneen dhugaa kana waan beekaniif madaa mogolee ta’anii turan.Yaallin taasisan hundumtuu jalaa fashalaa’eera.Humni qilleensaa Itiyoophiyaa ammoo abdiin isaan qaban hundi akka jalaa dhabamuuf dhabamuuf ga’uumsi horachuun mul’isaa jiru warra badii hunda karaa irratti hanbisa.Wanti argaa jirruufi dhugaan qabatamaan mul’achaa jiru kanuma.