Dhimma Yaa'ii Sirna Gadaa Arsii Sikkoo Mandoo

Yaa'ii Gadaa Oromoo Sikkoo Mandoo Godina Arsii Lixaa Aanaa Nageellee Arsii, Dhaddacha Guutaatti gaggeeffame seerota gurguddoo lallabuun goolabameera. Yaa'iin kun bakka ilmaan Oromoo Sikkoo Mandoo qubsuma mararraa argamanitti guyyoota lamaaf gaggeeffamuun, Gadaa ciise deebisanii kaasuun, dhaloonni safuufi duudhaa Oromoo ganamaatti akka deebi'uufi Faandiddee/durinjirreen akka sirratuuf seerota lallabee jira.

Bu'uruma kanaan, Dhaddachonni Oromoo Sikkoo Mandoo Odaa Roobaa jala jiran 20 deebi'anii hojii eegaluu akka qaban, dhaddachi hunduu wal qixa akka ta'eefi baalliin bakkatti deebi'ee darbuu akka qabu lallabameera.

Gama biraatiin, fuudhaafi heerumni uumee ganamaan akka gaggeeffamuu qabuufi gabbarri akka hafu, dhaloonni qe'ee ofii gatee akka hin godaanneef, godaansi seeraan alaa akka dhaabbatu, aadaafi duudhaan Oromoo akka mirgisuu darbees dhaloonni duudhaa ganamaatti deebi'ee akka jiraatu akkasumas, ragaa sobaa walirratti bahuun dhaabbachuu akka qabu labsaniiru.

Kanumaan walqabatee, Oromoon Oromoo ajjeesuun diinummaa akka ta'e labsuun, guutuu Oromiyaatti nageenyi akka bu'u, waldhabdeen kamiyyuu mariifi marabbaan furamuu akka qabu labsaniiru. Bu’uuruma kanaan qaamoleen hundinuu waamicha abbootii Gadaa kabajuun araddaa Oromootti nagaa buusuuf hojjechuu akka qaban dhaamaniiru. Dabalataanis, Oromoon duudhaa kaleessa ittiin umama tiksu deebifachuun biqiltuu dhaabuufi kunuunsuu akka qabu lallabuun, yaa'ichi goolabameera.

Hojii duudhaa Oromoo iddootti deebisuu keessatti, Mootummaan Jijjiiramaa Naannoo Oromiyaa beekumsa xabboo Oromoon jaarraa hedduuf itti jiraachaa ture deebisuun, dhaloonni aadaafi duudhaa ganamaatti akka deebi'u dursee tarkaanfii garagaraa fudhateera. Gama kanaan hojiilee dursee raawwate keessaa tokko galmoota gulantaa qabsoo ummata Oromoo madaalan bocuu ture. Galmoonni sabboonummaa gochaatiin ibsaman keessaa tokko "sirna cimaa ijaaruu"dha.

Galmi kun gama tokkoon aadaa (seenaa, duudhaa, safuufi eenyummaa) ummata Oromoo bu'uura kan taasisuu yoota’u, sagantaaleen kamuu yaadamuma kana hordofanii kan bocamanidha. Jalqabbii tureen yaadamoonni aadaa ummata keenyaa irraa sirnoome milkaa’inoota qabatamaa hedduuf ka’umsa ta’aniiru.

Fuldurattis, Mootummaan dhimma eenyummaa, aadaafi qaroomina ummata eeguufi dhaloota dhufutti ceesisuu ilaalchisee deeggarsafi ittigaafatamummaa kamuu kan bahatuudha.

Walumaagalatti, Mootummaan seenaafi duudhaa Oromoo qoratee baasuun iddootti akka deebi'u taasisuu, duudhaalee Oromoo sirnoomsuu, jiloota Oromoo beeksisuu, ardaalee jilaatiif beekamtii kennuufi aadaa Oromoo dagaagsuun dhaloonni eenyummaa ofii akka beekuufi itti jiraatu gochuun waadaa ummataaf galame gochaan dhugoomsaa kan deemu ta'a.

@Waajjira Pirezidaantii Oromiyaa