Karoorri Jeeqamsaafi Hookkaraa fashalaa’eera

 

(YMN,Ebila 15,2018) Galanni guddaan daangaa hinqabne ummata bal’aaf haata’u! Ummani bal’aan Nagaa barbaada.Kanaaf yoomillee tokkummaan Nagaaf dhaabbata.Ummanni ejjennoosaa cimaa kana irra deddeebiidhaan mul’iseera.

Diinni keessaafi alaa qindoomina uumuun filannoo waliigalaa barana caamsaa 24 adeemsifamu da’oo taasifachuun dursee gungumuudhaan jeeqamsaafi hookkarri akka babal’atuuf karoorfatee,tarsiimoo karoorasaa hojiirra ittin oolchus qopheeffatee socho’eera.

Garuu kan yaade hunduu akka hinmilkoofneef kunoo qabatamaan mirkanaa’eera.Filannoon akka jeeqamuuf,ummanni yaaddoo keessa akka galuuf,caasaan mootummaa akka burjaaja’uuf diinni sirritti itti qophaa’uun hojjetee ture.

Jalaa fashalaa’e.Karaatti hafan.Warri keessaafi alaa amma  qaana’anii akka morma gadi qabatan hubanne.Utuu ta’uu baatee weelluun Teediroos Kaasaa’uun(Teedii Afroo) torban har’aa sa’aatii 8tti,baatii 8ffaatti,bara 2018’tti dura duulli banameefi gadi lakkifame akkuma jarri yaaddee itti qophoofte waan baay’ee kan jijjiiru ture.

Hintaaneef.Mamii malee akka jalaa fashalaa’e haala qabatamaan jiruttu ragaadha.Warraaqsi ummataan deeggagrame  torban miti,guyyoota lamaafi sadi keessatti jijjiirama qabatamaa ta’e mul’isa.Garuu shirri diinni itti qophaa’ee shire ummata bal’aa rakkoo qalawiinsa jireenyaa qabuun kan deeggarame waan hintaaneef diinni waaroo salphinaa haguuggachuun dirqama itti taate.

Galmeen filattootaa kaleessa Ebila 14 bara 2018 guutummaatti milkaa’inaan xumurameera.Ragaan Boordii Filannoo Itiyoophiyaa dhiyeenya ifoome akka mil’isetti filannicha irratti hirmaachuuf ummanni lakkoofsisaa miliyoona 46 caalu galmeeffamuun kaardii filannoo fudhatee of harkaan ga’ateera.

Yeroon galmee boordichi dabale filattoonni hedduun carraa filachuu akka argataniif shoora guddaa gumaacheera.Kunis hirmaannaa ummataa dabaluuf haala mijaawaa uumeera.Injifannoo kanaan diinni akka gadduufi mataa gadiqabatu beekamaadha.

Injifannoon kun akka galmeeffamuuf Boordii Filannoo Itiyoophiyaa dabalatee qaamoleen dhimmi ilaallatuun hundi shoora guddaa bakka bu’ummaa hinqabne gumaachaniiru.Injifannoon kun diina gaddisiisuun darbuus lammiiwwan biyyasaanii jaallatan hundaaf gammachuu kan uumudha.

Egaa filannoon waliigalaa Caamsaa 24,2018 adeemsifama.Ammaan booda guyyaa sagaleen itti kennamu kanaaf of qopheessuun barbaachisaadha.Qophiin guddichi galmeeffamuun kaardii filannoo fudhachuu ture.Kun milkaa’eera.Kaardii sagalee keenyaan murtee seenaa qabeessa itti dabarsuuf of harkaan ga’anne of eeggannoon olkaawwachuun ammoo dirqama  lammii galmeeffame hundaati.

Waan kana namatti himuun barbaachisaa ta’uu baatus yaadachiisumaaf guyyaa murteen itti dabarafamuufi sagaleen itti kennamu salphaatti argachuuf kaardii filannoo iddoo dhiyoo kaawwachuun barbaachisaadha.Kaardiin filannoo qawwee keenya karaa nagaatiin qaama hinbarbaadne deem narraa ittiin jennu akka ta’e qalbeeffachuun gaariidha.

Baandaawwan ergamtuummaadhaan diinaan bitamanii socho’an malaafi tooftaa birootiin dhufuun isaanii waan hinoolledha.Akkuma kanaan dura gochaa turan  wanti itti qophaa’aan yoo jalaa fashalaa’u mala biroo qopheeffachuudhaan dhufu.Xiiqii keessa galan waan ta’eef haala mijaawaa argatan hundatti fayyadamu.

Kanaaf of eeggannoofi qophaa’ummaan diina qolachuufi fashaleessuu ummata bal’aa hirmaachise akkuma kanaan duraatti daran finiinuudhaan akka itti fufuuf hojjechuun dhimma murteessaadha.

Kana yoo goonu paartiiwwan adeemsa filannoo seera qabeessatti hirmaachaa, iddoo lama dhaabbatan dabalatee mindeeffamtoota diinaa hunda irra deddeebiidhaan qaanessuun nidanda’ama.Filannoo demokraatawa Addunyaa Afaan qabachiisu adeemsisuu akka dandeenyu kanaan durayyuu mul’ifneerra.Filannoon waliigalaa bara 2018 gama hundumaanuu kan milkaa’e nuuf haata’u!