Tumsa Tarsiimawaa Dansaa Faayidaa Biyyaa Kabajisiisu!

(YMN, Hagayya 15, 2018) Itiyoophiyaafi Ameerikaan damee loltummaafi nageenyaatiin tumsa tarsiimawaa taasisuuf akka waliigalan ifoomsaniiru.Kun biyyaaf oduu aagaati jedhamee kan fudhatamuu danda’udha.Keessumattuu haala waqtaawaa akka biyyaatti keessa jirruufi bu’ii ba’ii naannawa gaanfa Afrikaatti mul’achaa jiru wajjin walqabatee yammuu ilaalamu waliigalteen kun faayidaa biyyaalessaa waloo mamii malee kabajsiisuuf kan garaarudha.

 Oduun aagaa kun kan dhaga’ame Raayyaa Ittisa Biyyaatti gareen Daayrektera hariiroo alaafi tumsa Loltummaa Meejar Janaraal Tashoomaa Gammachuun durfame Ameerikaatti daawwanna hojii erga adeemsisee boodadha.

 Mariin qondaaltoota loltummaa biyyaalee lamaaniitiin taasifame tumsa diippiloomaasiifi loltummaa Itiyoophiyaafi Ameerikaa jidduu jiru gara sadarkaa ol’aanaatti ceesisuuf kan gargaarudha.Kanaafis waliigalteerra ga’ameera.

Tumsi tarsimaawaan Itiyoophiyaafi Ameerikaa kun faayidaa biyyaalessaafi fayyadamummaa waloo mirkaneessuuf akkasumas ammoo wal amantaa waloo cimsuun Gaanfa Afrikaafi naannawichatti nageenya waaraa mirkaneessuu irratti kan xiyyeeffatedha.

Biyyaaleen lameen tumsa waliigalteen mirkaneessan kana hatattamaan hojiirra oolchuufi gara michummaa tarsimaawaatti ol guddisuuf kutannoo waloo qabanis mirkaneessaniiru.

Gareen loltummaa Itiyoophiyaa daawwannaa Ameerikaatti taasiseen Ministira Raayyaa Ittisaa Ameerikaa (Peentaagoon) jedhamuun beekamu keessatti itti aanaa gargaaraa Ministira Dhimmoota Afrikaa Biraayaan Jee Eelis waliin mari’ateera.

 Odeeffannoon ministeerri dhimmi alaa Itiyoophiyaa ifoomse akka mul’isetti gareen loltummaa Itiyoophiyaa qondaaltoota loltummaa Ameerikaa malees hooggantoota dhaabbilee Ameerikaa kanneen biroo waliin dhimmoota waloorratti mari’ateera.

Waliigalteen Itiyoophiyaafi Ameerikaa kun diinoota keessaafi alaa irratti rifaatuu akka uumu shakkiin hinjiru.Qindoomina uumuudhaan Itiyoophiyaafi  naannawa gaanfa Afrikaa unkuruuf qophaa’anii turan.Amma jalaa fashalaa’eera.Wanti gochuu danda’an hinjiru.Durumayyuu akka ta’uu hinqabnetti qindoomina uuman.Humnoota waan hedduun walfaallaa jirantu qindoomina uume.

Amma callisuumaan garee seeraan alaa waayyaannee irratti tarkaanfiin loltummaa fudhatamaa jira.Kaayyoon tarkaanfii kanaa meeshaalee waraanaa waayyaanneen gamaa-gamaanaa walitti funaannatte barbadeessuudhaan walfixiinsa waayyaanneen hamoommatteef hanbisuudha..Kaayyoon Mootummaa Itiyoophiyaa galmasaa ga’aa akka jiru odeeffannoowwan mul’isan tibbana guyyuutti tamsa’aa jiru.

Ammaan booda qindoomina diinoota alaa waliin taasifameen mootummaa Itiyoophiyaa paartii Badhaadhinaatiin hooggaamaa jiru taayitaa irraa fonqolchina’ jechuun dhaadannoon waayyaanneen dhageessisaa jirtu gatii tokkollee hinqabu.

Bara bulchiinsa prezidaantii Ameerikaa Kanaan duraa Joo Baayidan qondaaltoonni Ameerikaa tokko tokko warra waayyaannee wajjin michummaa gaarii kan uuman waan turaniif waggoota shaniin dura kan ta’ee darbe nibeekama.Hindagannus.

Amma sun hinjiru.Biyyaaleen lixaa akka yeroo sanii waayyaannee madii hiriiran amma hinjiran.Adabadhaa jechuun itti himaniiru.Warri waayyaannee garuu irraa hinfudhanne.Deeggarsa meeshaa waraanaa mootummaa Shaabiyaafi Misiraa irraa argatan abdachuudhaan akka malee ta’an.Mootummaan Itiyoophiyaa tooftaa gaariifi fudhatamummaa qabuun tarkaanfii faayidaa biyyaalessaa kabajsiisuu danda’u fudhateera.

Ammaan boodas yoo adabachuu didaniifi waamicha nagaa dhiyaateef fudhatnii gara nagaatti hindhufan taanaan tarkaanfii duuba deebii hinqabne irratti fudhachuuf waliigalteen loltummaa Itiyoophiyaafi Ameerikaan taasisan  bu’uura guddaa ta’ee kan tajaajilu ta’a.Nuti akkana jenna.Itiyoophiyaafi Ameerikaan baga waliigalan!