Carraa Qabeessoota Ta’anii Booji’aman,Boojuu Kunuunsaa!

Suuraa isaanii kana daawwachuun yoo tilmaamnu umuriin ijoollee kana waggaa 10 hanga 15 kan caalu miti.Daa'imman xobbee kana abidda waraanaatti naquun bu'aan warra waayyaanneetiif argamsiise hinjiru.Badiifi hammeenya ittiin beekamantu dachee irraa isaan dhabamsiisaa jira.

Odeeffannoowwan guutummaatti daaraa ta'uusaanii mul'isan ba'aa jiru.Tuffiidhaan huuruu dhiibanii wantoota hammeenyaa hedduu raawwachaa turan waan ta’eef kan gadduuf yoo jiraate bara taayitaasaaniitti fayyadamaa kan ture qofa akka ta’u shakkiin hinjiru.

Waayyaanneen waggoota 27’f wayita Itiyoophiyaa bulchaa turteetti ofiifi kan ishiitti dhiyaatan qofa fayyadaa turte.Biyya saamte malee bu’aan biyyaaf argamsiifte hinjiru.Wantoonni fakkeessuuf jecha hojjette hinjiran jechuu miti.Hanga tokko hojin misoomaa hojjetame jira.Kanumayyuu ummata Itiyoophiyaatiif quuqamanii utuu hintaane shiroonni dhokasaatti raawwachaa jiraatan akka hinbeekamneef godhan.

Bajata misoomaaf ramadamu hunda irraa qunxurachaa akka jiraachaa turan iccitiiwwan erga taayitaa irraa ari’amanii booda gadi ba’anii adda babayii guutanitu ragaa ta’ee dhiyaata.Wanti hataa turan hundi jalaa dhabamnaan akkuma baran hanna ittiin beekamanitti deebi’uuf marsaa afur guutuu Itiyoophiyaa irratti waraana banan.

Waraanni marsaa 4ffaa daboo hedduu kan ittiin waammatan ture.Garee Tsimdoo isaaniin hoogganamu hundeessuudhaan takka munyuuquuf yaalanis wanti yaadaniif karoorfatan karaatti jalaa fashalaa’ee hafe.Utuu akka karoora isaaniitti ta’eefi Mootummaan Ida’amuu taayitaa irraa fonqolfamee biyyi nagaa dhabee ture.

Ergattoonni isaanii shaabiyaafi Egyptis akka amma gaddarra jiran utuu hintaane silaa yoona gammachuudhaan fishiliquuyyuu.Karoorri gammachuudhaan utaaluuf qabatan galma ga’uufii didee salphatan.

Warri waayyaannee sammuun isaanii waan hinyaadneefi malee medaallii maalitiin ijoollee xobbee kana waraanatti hirmaachisanii moo’achuu danda’uu?odeeffannoowwan kaleessa ba’an akka mirkaneessanitti ijooleen suuraa isaanii daawwattan kun waraana naannawa daangaa Eertiraatti adeemsifame irratti booji’aman.

Daa’imman kun umurii barachuu qabanitti adda waraanaatti akka bobba’an kan taasise garee seeraan alaa Waayyaanneeti.Amma Raayyaa Ittisa Itiyoophiyaatiin booji’amaniiru.Gooti Raayyaan Ittisaa Itiyoophiyaa ammoo kan booji’e kunuunsaan qabuu beeka.Boojuu kunuunsuun duruu amalaafi aadaa gootota keenyaati.Boojuu kunuunsaa jireenya nagaattis deebisaa!

Gochoonni Waayyaannee jibbisiisaa ta’an ammaan booda Itiyoophiyaatti akka hindeebine mirkanaa’eera.Amma ergataanis ta’e ergmtoonni haleelamaa jiru.Haleellaa gootota Itiyoophiyaa dandamachuudhaan bayyanachuu akka hindandeenye haala qabatamaan jirutu ragaa qabatamaadha.

Gareewwan miseensa Tsimdoo duubaa jiddu gala biyyaatti waraana banuuf takka wixiffatanis haleelamaniiru.Kanneen albaatiisaanii ofirra yaasaa baqatanis bosona itti dhokatan keessaa yeroo gabaabaatti ba’u jedhamee hinyaadamu.Achumattuu dhumuu danda’’u.Itiyoophiyaan biyya goototaati.Ijoolleenshii gootoonni utuu jiranuu kan ishii se’atu hinjiru.Fayyaa qabaannee hayyama waaqaatiin umurii dheerannee waan hedduu argaa jirra.Galanni kan uumaa keenyaa haata’u!