Hiyyummaa keessaa kan nubaasuu danda'u qonna keenya!

 

 

Finfinnee #Ethiopia Caamsaa 16/2015(YMN) Omishitummaa qonnaa dachaa baay'eedhaan dabaluun fedhii utuu hintaane dirqama ta'eera.Omisha qonnaa baay'inaafi qulqullinaan omishuun yeroonsaa ammadha. Omishi qonnaa lakkoofsa ummataa amma jiru wajjin walsimu akka jiraatuuf itti gaafatamni kan qonnaan bultootaa qofa miti.

Mootummaan Biiroo qonnaafi waajjiraaleen qonnaa sadarkaadhaan jiranis itti gaafatamaafi dirqama guddaa qabu.Omishitummaan qonnaan bultootaa akka dachaadhaan dabaluuf sanyii filatamaa xaa'oofi galteewwan qonnaa kanneen biroo dhiyeessuutu irraa eegama.

Hawaasni qonnaan bulaan ammoo deeggarsaafi hordoffii taasifamuufitti fayyadamuudhaan ofiif fayyadamee biyyas fayyaduuf carraaqqii addaan hincinne taasisuu qaba.Amma akka durii san akka hintaane beekamaadha.Qonni ganna qofa ta’uun hafeera.Keessumattuu iddoowwan qonna jallisiistiif mijaawaa ta’anitti bonaafi ganna qotuun omishuun baramaa dhufeera.Kun hawaasa qonnaan bulaadhaaf jijjiirama guddaadha.Haala adeemsa hojii qonnaa amma jiruun qonnaan bultoonnis muuxannoo walirraa fudhachaa jiru.Akka kanaan duraa qofaa fiiguunis hafaa jira.Qonnaan bultoonni gareedhaan ijaaramuudhaan qonna kilaastaaraa babal’isaa jiru.

Haala kanaan hojjechuun gamtaa cimsuun omishitummaa dabaluuf faayidaa hedduu kan qabudha.Omisha midhaanii dabaluu qofaaf utuu hintaane gama hundumaanuu wal utubuuf shoora guddaa kan gumaachudha.Omishaafi omishitummaan qonnaan bultootaa dabalaa yoo deeme,qonnaan bulaan hundumtuu rakkoo diinagdee keessaa ba’a.Qonnaan bulaan midhaan oomishe ofirra darbee hawaasa Magaalaa keessa jiraatuufis sirritti dhiyeessuu danda’a.Kana malees gabaa alaatti dhiyeessuudhaanis faayyadamtummaasaa daran dabalaa deema.

Adeemsa kanaan diinagdeen Itiyoophiyaa guddachaa deemuudhaan badhaadhinni hawwinu qabatamaan mirkanaa’aa deema.Hunduu nyaatee buluu danda’a.Rakkoon hojii dhabdummaa amma baay’oota darares fala waaraa argachaa deema.

Bu’uurri cimaan diinagdee biyya keenyaa qonnadha.Qonna hammayyeessuudhaan teeknooloojiiwwan qonnaatti fayyadamuudhaan qotuun dirqamadha.Kun ta’uu baannaan omisha baay’ee argachuun rakkisaa ta’a.Omisha qonnaa baay’inaafi qulqullinaan argachuuf teeknooliijiiwwan qonnaa dhiyaatanitti madaquudhaan hojjechuun dirqama qonnaan bulaa hundaa ta’uu qaba.Qonnaan bultoonni kilaastaraan gurmaa’anii qotuun kanaaf haala mijaawaa kan uumudha.

Gurmaa’inni kun sanyiiwwan filatamaas ta’e xaa’oo akkasumas galteewwan omisha qonnaa kanneen biroo bu’aa ba’ii malee argachuudhaaf haala mijaawaa kan uumudha.Gurmaa’nni kilaastaraa kun qonnaan bultoonni akka kanaan duraa Qotiyyoodhaan utuu hintaane Tiraaktaraan akka qotataniifis haala mijaawaa uumeera.Iddoowwan baay’eetti qabatamaan mul’achaa kan jirus kanadha.

Muuxannoon kun naannolee gara garaa keessatti akka babal’atuuf tumsi taasifamaa jirus baay’ee gaariidha.Fakkeenyaaf Mootummaan Naannoo Oromiyaa qonnaan bultoonni naannolee biroos Tiraaktaraan qotachuu akka danda’aniif deeggarsi taasise kan eeramuu danda’udha.Muuxannoo Oromiyaatti argame kana dhawaataan gara naannolee hundaatti babal’isuudhaan omishitummaan qonnaa dachaa baay’eedhaan akka dabalaa deemu taasisuun barbaachisaadha.Kun ta’uu kan qabu lammiiwwan Itiyoophiyaa baadiyaafi magaalota keessa jiraatan jireenya hiyyummaa keessaa baasuu kan danda’u diinagdee qonnaan guddatu akka ta’e waan amanamuuf akka ta’e hubachuun barbaachisaadha.Fayyaa ta’aa!