Murteessaan yaada moo’ataa qabaachuudha!

  

Finfinnee #Ethiopia Caamsaa 10/2015(YMN) Yaadi moo’ataan jiraannaan fudhatamni hawaasa biratti argamu hindhabamu.Humni yaada moo’ataa of harkaa qabu ummata bal’aatti dhiyaachuudhaan yaadasaa himachuuf,hubachiisuuf fudhatama akka argatu taasisuuf onnatee hojjeta.Kan yaada moo’ataa of harkaa hinqabne ammoo sababoota gara garaa funaanuudhaan mootummaa qeequufi arrabsuun yeroosaa bilaashatti balleessa.

Yaada moo'ataa utuu hinqabaatin gara taayitaatti dhufuun gonkumaa akka hindanda'amne hubatamuu qaba!Kan yaada moo'ataa dhabuudhaan rakkate akkuma argaafi dhag’aa jirru mootummaan ce'uumsaa yaahundeeffamu jechuun kadhata.Kun adeemsa sirrii miti.

Humnoonni finxaaleeyyiin Amaaraafi Oromoo obsa mootummaa Itiyoophiyaa akka sodaatti fudhachuun har'as akkuma kanaan duraa gocha badii raawwatan akka itti fufan dhaga’aamaa jira.Humnoonni kun miidhaan dhokatanii riphuudhaan geessisaa jiran eessumaanuu akka isaan hingeenye hubachuudhaan karaa nagaatti dhufuu qabu!Wanti hawaasnis irraa eegaa jiru kanadha.Mootummaa ummataan filatametti xiiqii qabachuudhaan socho’uun kaayyoo ergamtummaa diinota alaafi keessaa milkeessuuf socho’uun bu’aan argamsiisuu danda’u akka hinjirre yaaliiwwan waggoota darban keessa taasifameen mul’ateera.

Sochiin afaan qawweetti fayyadamuudhaan taayitaa qabachuuf taasifamu qaroomina jaarraa 21ffaa amma keessa jirru wajjin kan walsimu miti.Jaarraa kanatti taayitaa qabachuun kan danda'amu yaada moo'ataa hawaasa irra jiraa amansiisuu danda’u qabatanii hawaasatti dhiyaachuu qofaadhaani.

Haala qabaatamaa amma jiruun keessumattuu Shanee/WBO wajjin walqabatee mariin nagaa marsaa itti aanuu mootummaa wajjin Zaanzibaaritti jalqaban itti fufa jedhamee abdii guddaadhaan ummata bal’aadhaan utuu eegamaa jiruu hidhattoonni shanee/WBO iddoowwan adda addaatti dhokatanii riphanii magaalota seenuudhaan hawaasni akka shororkaa'u taasisuun sirrii miti.Medaallii kamiiniyyuu fudhatama kan qabu miti.Gocha kanaan fudhatamni ummata irraa ittiin argachuu danda'anis hinjiru.Humnoonni halaala taa’anii hidhattoota kana ergatanis bu’aan galmeessifachuu danda’an akka hinjirre beekuu qabu.

Wanti tibbana Magaalaa Bishooftuufi Oolanciitiitti hidhattoonni raawwataniiru jedhamee odeeffamaa jirus dhugaa qabatamaa kana kan mirkaneessudha.Yaaliin taasifamuun lubbuu namootaafi qabeenyarra miidhaan ga’uu danda’a.Akka himamaa jirutti wanti ta’e kunuma.Kana bira darbuun waan danda’amu miti.

Ummata bal’aafi mootummaa Itiyoophiyaa wayyaanee hanga funyaanitti hidhatteen turte daaraa godhee adabachiise humnaanan moo’adha jechuun socho’uun gowwummaadha.Dhugaa kana yeroo tokko qofa utuu hintaane al lama sadi itti yaaduun barbaachisaadha.

Mootummaa Itiyoophiyaa ijaaramasaa daran jabeeffatee jiru humnaan,sanuu ammoo kilaashiifi qawwee dulloomaa asiifi achii walitti funaaname baatanii bosona keessa luuxuudhaan moo’achuun hindanda’amu.Ifaajii bu’aa fiduu hindandeenyedha.

Amma wanti murteessaan yaada moo’ataa of harkaa qabaachuuf carraaquudha.Yaada moo’ataa malee gara taayitaatti dhufuun akka hindand’amneef balballi cufameera.Balbala cufame kana humnaan banuuf sochoo’uun faayidaan fiduu danda’u hinjiru.’Maal haabaasuuf dhama raasuu?’jedhee mammaakuudhaan dubbiisaa fixate Oromoon.Fayyaa ta’aa!