Daawwannaa Pirezidaant Ruuttoo?

 

Finfinnee Caamsaa 16/2016(YMN) Pirezidaantiin Keeniyaa Wiiliyaam Ruuttoo Ameerikaa daawwachaa jiru.Gitisaanii Ameerikaa Joo Baayidan simannaa ho'aa akka taasisaniif beekameera.Pireezidaant Ruuttoon Ameerikaatti daawwannaa guyyoota sadii taasisu jedhameera.

Turtiin kan milkii haata’uuf.Daawwannaan kun garuu shira Ameerikaan Itiyoophiyaa irratti qabu mul’isa.Akkisaa akkam akka ta’e kan ilaallu ta’a.Shirri Ameerikaa maal irraa akka maddu xiinxaluunis barbaachisaadha.

Keeniyaan ollaa teenya,ollaa Itiyoophiyaa waan taateefis hamaashii hinfeenu.Akka biyyaatti Ameerikaafi Keeniyaan walitti dhufeenya diippiloomaasii qaban cimsuun waliin hojjechuun waan rakkoo qabu miti.

Pirezidaantiin Keeniyaa Wiiliyaam Ruuttoo turtii kaleessa Pirezidaant Joo Baayidan wajjin Waashingtan Diisiitti taasisaniin dhimmoota waloo adda addaa irratti mari’ataniiru.

Marii taasifameen Ameerikaan shoroorkeessitummaa ittisuuf Keeniyaa wajjin hojjetti jedhameera.Akkaataa kanaan sochii yakka shoroorkeessitoonni naannawa gaanfa Afrikaatti taasisan Keeniyaan deeggartuu Ameerikaa ta’uudhaan shororkeessitoota kan qolattu ta’a.Asirratti Keeniyaan hanga Itiyoophiyaa humna qabdiiree? jennee gaafanna.

Biyyi keenya Itiyoophiyaan shororkeessitoota qolachuudhaan seenaa yoomiyyuu hindagatamne galmeessiftee jirti.Garee shororkeessaa al-Shabaabiifi shoroorkeessitoota kanneen biroo qolchuudhaan bu’aan galmeessifte ol’aanaadha.Keessumattuu gareen shororkeessaan al-Shabaab jedhamu Soomaaliyaa irra darbee biyyaalee naannawa gaanfa Afrikaa akka hinjeeqaneef carraaqqiin Itiyoophiyaan taasifte daran ol’aanaadha.

Biyyi sadarkaa kanaan shororkeessitoota qaaneessiteefi akka adabatan taasifte Itiyoophiyaan utuu jirtuu Keeniyaan meedaallii maaliitiin deeggartuu Ameerikaa akka taatuuf filatamte jechuun gaafachuun barbaachisaadha.

Turtiin yeroo walitti dhufeenya diippiloomaasiis kan ilaalamu yoo ta’e walitti dhufeenyi diippiloomaasii Ameerikaafi Keeniyaa waggaa 60 kan caalu miti.Walitti dhufeenyi diippiloomaasii Ameerikaafi Itiyoophiyaa ammoo kan Keeniyaan Ameerikaa wajjin qabdu wajjin walbira qabamee yoo ilaalamu dachaa ta’a.

Maarree Ameerikaan maalif Keeniyaa filatte?Sababa qabdi.Itiyoophiyaan Naannawa gaanfa Afrikaatti biyya adda duree ta’uudhaan akka beekamtuuf Ameerikaanis ta’e biyyaaleen lixaa kanneen biroo akka hinfeene beekamaadha.Fedhii shiraa qaban kana irraa ka’uudhaan sochii Itiyoophiyaa gadi qicu taasisuun dirqama itti ta’a.

Kanaan dura yeroo waraana kaabaatti qondaaltoota wayyaaneetiif tumsuudhaan Ameerikaafi biyyaaleen lixaa kanneen biroo waan raawwatan yoomillee dagachuun hinbarbaachisu.Manni marii tasgabbii dhaabbata mootummoota gamtoomanii haala seenaa keessatti mul’atee hinbeekneen yeroo hedduuf dhimma Itiyoophiyaa irratti akka mari’atu kan taasise dhiibbaa isaanii akka ta’e beekna.Gallanni biyyaalee michuu Itiyoophiyaa ta’aniif haata’u gufuu biyya keenya irratti uumame bira darbuu dandeenyee jirra.

Kutannoon akka biyyaatti qabnuufi deeggarsi biyyaalee michoota Itiyoophiyaa shira diinaa hunda injifachuudhaan bira darbuu akka dandeenyuuf shoora guddaa gumaacheera.Haalli amma warri lixaa irratti argaman xiiqii keessa galuusaanii mul’isa.Maal goonee Itiyoophiyaa mufachiifnu?akkamitti gadi qabnuun?jedhanii yaadaafi carraaqaa akka jiran gochuma qabatamaan taasisaa jirantu mul’isa.Isaan waan fedhan haata’an.Nuti garuu imala guddinaafi badhaadhinaa irraa gonkumaa duubatti deebi’uuf hinhayyamnu!Sussukni Itiyoophiyaa gara fuulduraa malee gara boodaa miti!Fayyaa ta’aa!