Michummaa Itiyoohiyaafi Kooriyaa Kibbaa

Finfinnee Caamsaa 26/2016(YMN) Michuun waliif Irkoodha! Itiyoophiyaafi Kooriyaan Kibbaa waliif michuudha.Michummaan biyyaalee lamaanii waggoota hedduu kan lakkoofsisedha.Dhiigni loltoota Itoophiyaa Kooriyaa Kibbaatti dhangala’eera.lafeen gootota keenyaa achitti caccabeera.

Waggootaan dura loltoonni Itiyoophiyaa gara Kooriyaa Kibbaa dhaquudhaan diina irraa ittisuuf carraaqqii ol’aanaa taasisaniiru.Carraaqqii gootoonni Itiyoophiyaa loltoota biyyattii wajjin qindaa’uudhaan taasisaniin bu’aan birmadummaa biyyaa kabajisiisuu galmeeffameera.

Oolmaa Itiyoophiyaan Kooriyaa Kibbaatiif waggootaan dura oolteef jecha Kooriyaan Kibbaa maatii loltoota Kooriyaa Kibbaa tumsaniif deeggarsa taasisaa jirti.As Magaalaa Finfinnee keessa iddoon jireenyaa ‘Ganda Kooriyaa’jedhamu jira.Naannawa kana keessa maatii loltoota kanaan dura gara Kooriyaa Kibbaatti duulantu jiraata.

Mootummaan Kooriyaa Kibbaa maatii duultotaatiif deeggasa taasisaa akka jiru nibeekama.Ijoolleen loltoota duraanii deeggarsa diinagdeefi carraa barnootaa argachuun fayyadamaa jiru.Walitti dhufeenyi seenaa-qabeessi Itiyoophiyaafi Kooriyaa Kibbaa kun kunoo ammas daran cimee akka itti fufe haala tibbana mul’ate irraa hubanna.

Tibbana gareen ergamaan Mootummaa Itiyoophiyaa muummicha ministiraa Itiyoophiyaa Dr.Abiy Ahmadiin hoogganame yaa’ii Kooriyaa Kibbaa- Afrikaa irratti hirmaachuuf gara Magaalaa guddoo Kooriyaa Kibbaa See’uul dhaqe.Simanniin muummicha ministiraa Dr.Abiy Ahmadiifi Giiftii duree Zinnaash Taayyaachootiif taasifame ho’aadha.

Turtii Kooriyaa Kibbaatti taasifameen bu’aan Itiyoophiyaan galmeessifte guddaadha.Walgalteewwan waldeeggarsaa hedduun mallatteeffamaniiru.Kanneen keessaa  waliilgateen deeggarsaa taasifame adda durummaadhaan kan eeramuu danda’udha.

Ministirri Maallaqaa Obbo Ahmad Shiidee akka mirkaneessanitti Itiyoophiyaafi Kooriyaan kibbaa walii galtee tumsa misoomaaf oolu doolaara Biiliyoona  tokkoo waliif mallatteessaniiru.Maallaqni kun waggoota arfan dhufanitti hojiirra kan ooludha.Kana jechuun Itiyoophiyaan waggaa waggaadhaan deeggarsa misoomaa Doolaara miliyoona 200fi miliyoona 50 Mootummaa Kooriyaa Kibbaa irraa argatti jechuudha.Nuti aaga dhageenye.Oduun gammachiisaan kun diinoota Itiyoophiyaa hunda kan mataa bowwaafachiisuufi kan huuruu isaanii dhiibsisu akka ta’e nuti sirritti beekna.Fayyaa ta’aa!.