Doorsifinillee Akka Qaba!

(YMN,Finfinnee,Fulbaana 29,2019) Bofatu akkana jedhe,jedhan. ’Abbaatu Of Mara’ mammaaksa Oromooti.Oromoon akka sabaatti sababa malee hinmammaaku.Sababaan mammaakee qaama dhimmi ilaallatuuf ergaa guddaa dabarfata.

Hattuun hattuudha.Ofiifis hattee kanneen biroos akka hataniif waan calliftuuf onnattee hattoota irratti qabsaa’uu hindandeessu.Dhugaa kana qabsoo muummichi ministiraa Itiyoophiyaa Dr.Abiy Ahmad(Abbichuun) gochaa jiran irraa qallbeeffanna.

Dr.Abiy gara taayitaa biyya bulchuutti erga dhufanii asitti qabsoo malaammaltoota(hattoota)irratti taasifamuu qabu irratti utuu hindubbatin bira darbanii hinbeekan.Waltajjiiwwan hedduu irratti qabsoo hattoota dhabamsiisuuf taasifamaa jiru irratti ummanni bal’aan akka qabsaa’uuf irra deddebi’uudhaan waamicha taasisuu irraa eegalee tarkaanfiiwwan malaammaltoota adabachiisuu danda’an yeroo adda addaatt akka fudhataman taasisaniiru.

Sababa ejjennoo cimaa muummichi ministiraa Abiy Ahmad hattoota irratti qabaniitiin Itiyoophiyaa keessatti gochi hannaa qondaaltoota mootummaatiin raawwatamu hir’ateera jechuudhaan afaan guutuun dubbachuun nidanda’ama.Haqa kanaaf agrasiiftuuwwan addaa addaa eeruun nidanda’ama.Agarsiiftuuwwan qabatamaa ta’e hedduu keessaa sochii misoomaa wayita ammaa Itiyoophiyaa keessatti hojjetamaa jiru qofa kaasuudhaan haa’ilaallu.

Hojiin misoomaa Itiyoophiyaa keessatti dameewwan adda addaatiin finiinaa jiru haala amansiisaa ta’een itti fufuu kan danda’e gochi malaammaltummaa shira adda addaa fayyadamuudhaan qondaaltoota mootummaatiin raawwatamu hir’achuu waan danda’eef akka ta’e mamii malee dubbachuun nidanda’ama.Amma akka Kanaan duraa ija baasanii ‘akkana naaf gootu malee kana siif gochuu hndanda’u’ jechuun tajaajilamaa dararuun waan danda’amu miti.Xiqqoo yaadda’auun jalqabameera.Qabsoon hawaasni hubannoo qabu taasisuu jalqabes kanaaf shoora gumaachaa jira.

Sababa dhiibbaafi burjaaja’uumsa uumuu dallaalootaafi qindoomina qondaaltoota mootummaa waliin jiruun hawaasni bal’aan tajaajila barbaadu argachuuf matta’a kennuun amaleeffamee tureera.Kan humna maallaqaa qabu malaammaltootaafis waa ramaduudhaan dhimmasaa raawwachiifataa ture.Kan humna maallaqaa hinqabne ammoo tajaajila barbaadu dhabuudhaan mootummaa komachaa callisee jiraata.Haalli qabatamaan waggoota hedduuf biyya keenya keessa ture kanadha.

Waggoota dhiyoodhaa asitti agruu tajaajila mootummaa maallaqaan bitachuun akka hafuuf Mootummaan Ida’amuu mala wayii qabatee gadi gadi ba’e.Masoob tajaajilli iddoo tokkoo akka eegalamu taasise.Tajaajilli teeknooloojiitti fayyadamuudhaan kennamu kun sadarkaa Federaalaatiin Finfinneetti akka jalqabamu taasisuudhaan wayita ammaa gara Naannolee gara garaattis akka babal’atu taasifamaa jira.

Adeemsi kun hawaasa tajaajilamuuf haara-galfii gaarii uumaa akka jiru yaada hawaasni kennaa jirutu raggaa qabatamaadha.Hanga tokko bayyanachuun akka jiru haaluma qabatamaan mul’atutu ragaa ta’ee dhiyaachuu danda’a.

Hojmaata Teeknooloojiin deeggarame kana se’achuun waan danda’amu miti.Wanti yaalamu yoo jiraate balbalatu cufama.Adeemsaan ammoo yeroo gabaabaa keessatti saaxilamuutu dhufa.Kanaaf Masoob tajaajila iddoo tokkootiin kan matta’a fudhachuuf jarjarus ta’e kan matta’a kennuuf onnatu jiraachuu hindanda’u.

Hojimaanni hammayyaa’aan kun galiin mootummaadhaaf galuu qabu harka namoota dhuunfaa akka hingalleef dhorka.Hojmaata hammayyaa’aatu waardiyaa ta’ee eega.Kanneen shira addaa addaatti fayyadamuun kana biras darbuun akkuma Kanaan duraa gocha malaammaltummaa misooma biyyaattii gufuu ta’u raawwachuuf socho’an ammoo takka tura malee saaxilmuunsaanii waan oolu hinta’u.

Kun qabatamaan ta’ee yeroo adda addaatti agarree jirra.Hojimaata farra malaammaltummaa mootummaan diriirse gara cinaatti dhiisuun tooftaa ofii uummataniin socho’uun kanneen gocha hannaa irratti bobba’an saaxilamuudhaan seeratti yoo dhiyaatan mul’ateera.Kun ammoo qabsoo ummanni bal’aan malaammaltoota irratti taasisuuf haala mijaawaa kan uumudha.Hawaasni onnatee yaaddoo keessaa ba’uudhaan qaama mootummaa dhimmi ilaallatuuf eeruu kenna.

Eeruu yeroo adda addaatti hawaasni kennetu hattoonni mala adda addaa fayyadamuun waa qunxuratan ragaadhaan tarkaanfiin kan irratti fudhatame.Kan akkanaa Kanaan ’Waa Malee Manni Hin’aaru’ jechuudhaan bira dabarra.

Ibsa gabaabaa muummichi ministiraa Itiyoophiyaa Dr.Abiy Ahmad wayita ministiroota muudaman dhiyeessan kennan irraa waan hedduutu hubatamuu danda’a.Kanneen akkuma Kanaan dura barame dhoqqee loobicatti seenan sadarkaa irra jiraniin waan badii raawwataniif itti gaafatamuun isaanii waan oolu hinta’u.Itti gaafatamummaan guddaan ammoo kan sammuun nama gaaftudha.Yoo nama ta’anii sammuu qabaatan sammuu isaaniitu isaan gaafata.Sanuu itti deddeebi’ee isaan cinqa.Kun ammoo gammachuu isaan dhorka.Waan shiraan biyyaafi ummata irraa qunxuratan saniinuu gammadanii jiraachuu hindanda’an.Waan warrii waayyaannee ta’e qalbeeffachuun gaariidha.Kanneen ragaan qabatamaan irratti argames seeratti dhiyaachuunsaanii waan hin’oolle ta’a.Akkasi dubbiin.

Ministiroonni Itiyoophiyaa kaleessaa haarawa muudamanis ta’e kanneen akka itti fufan taasifaman akeekkachiisaafi doorsisa muummichi ministiraa mana marii bakka bu’oota ummataatti iftoomaan kennan akkamitti iaalu laata? Akka itti ilaalan isaantu beeka.Gochoota badiirraa of eeguudhaan kutannoodhaan ummata tajaajiluun dhimma murteessaa akka ta’e adda babayiirratti itti himameera.Yoo kutannoofi sammuu sirrii qabaatan waan iftoominaan himame hojiirra oolchuudhaan ummata bal’aa tajaajiluudhaan ogeessiifi hojjetaan isaaniin bulfamus haqaan ummata akka tajaajilu taasisu.Ta’uu baannaan maal nadhibeedhaan socho’uun gadi galoo ta’anii hafu.Kanuma dubbiin!

Akeekkachiifni Dr.Abiy kennan isaaniif gala jennee ammanna.Ibsi muummichi ministiraa Abiy Ahmad kennanis ummanni qabsoo malaammaltoota irratti taasifamuuf akka onnatu taasisa.Ummanni bal’aan kutannoo hooggansi biyyaa qabu Kanaan onnatee malaammaltoota dura akka dhaabbatu shakkiin tokkollee hinjiru.Fayyaa ta’aa,waan dubbiftaniifis galatoomaa!