Bareedina Uumamaa Biyya Keenyaa!

 

(YMN,Finfinnee,Hagayya 26,2018) Itiyoophiyaan teenya biyya uumamaan badhaateefi qabeenyawwan uumamaa baay’ee dinqisiisoo ta’aniin beekamtudha.Qabeenyawwan dinqisiisoo keessaa barreeffama Kanaan qabeenya uumamaa Naannoo Oromiyaatti argamu,waa’ee Gaarreen Baaleefi Paarkii biyyaalessaa Baalee kan ilaallu ta’a.

Guyyaan Turiizmii Idil Addunyaa dhiyeenyatti jechuun Baatii Fulbaanaa keessa Ayyaana Masqalaa dhufu booda itti fufiinsaan kabajama waan ta’eef waa’ee qabeenyawwan keenya hawwattoota Turiistii ta’aniirratti hubannoo gahaa qabaachuun barbaachisaa waan ta’eefin dhimma kana irratti xiyyeeffadhe.Misooma damee Turiizmiitiif xiyyeeffannoo Mootummaan Itiyoophiyaa kennes walqabsiiseen kaasa.Dubbisaa!

Gaarreen Baalee dinqisiifatamoodha.Paarkiin Biyyaalessaa Baalee akka hundeeffamee har’a ga’uuf shoora guddaa kan gumaache gaarreen Baaleefi qabeenyawwan uumamaa Gaarreen Baalee keessatti argamanidha.

Akka durii  miti, amma Gaarreen Baalee ni’eegamu,nikunuunfamu.Kanaaf ammoo haala mijaawaa kan uume Paarkii Biyyaalessaa Gaarreen Baalee waggootaan dura hundeeffamuun tajaajila kennaa jirudha.

Paarkii biyyaalessaa Gaarreen Baalee keessatti Jeedala Diimtuu eessumattuu hin’argamne dabalatee Bindeeldoota hedduutu jiraata.Isaan  kunis daawwattoota hawwachuudhaan beekamu.Tuuriistoonni biyyaalee alaa kumaatamaan lakkaa’aman yeroo adda addaatti qabeenyawwan uumamaa Paarkii Biyyaalessaa Gaarreen Baalee keessatti argaman daawwachaa turan,garafuulduraattis Turiistoota kumaatamaan lakkaa’amantu daawwata.Kanaafis biyya keessatti haalli mijaawaan uumameera.

Haalawwan mijaawaan daawwattootaaf uumaman lakkoofsi daawwattoota naannawichaa dabalaa akka deemuuf shoora kan gumaachanidha.Daandiin gara naannawichaa geessu jiraachuun,iddoon bulmaataa qophaa’uun,akkasumas tajaajilli Hootelotaa akka babal’atu taasifamuun kan eeramamidha.

Karaa birootiinis loojiiwwaniifi paarkiiwwan bashannanaa naannolee biyya keenyaa adda addaa keessatti miidhagfamanii hojjetaman misoomni damee Turiizmii daran akka babal’atuufi amansiisaa akka ta’uuf shoora guddaa gumaachu.Hawwattoonni Turiistii kan akka Wancii,Gorgora,Cabaraa Curcuraafi kanneen biroo naannolee gara garaa keessatti kaka’uumsaafi qajeelfama mootummaa Ida’amuutiin ijaaraman jijiirama qabatamaa damee misooma Turiizmiitiif shoora guddaa gumaachaniiru.

Qabeenyawwan uumamaa akka biyyaatti qabnu misoomsuudhaan Turiistii hawwachuu akka danda’anitti ijaaruufi miidhagsuun bu’aa diinagdee damee kana irraa argamu amansiisaa taasisuuf gargaara.Bu’aan diinagdee damee kana irraa argamu itti fufiinsa yoo qabaatu ammoo akka biyyaatti guddina diinagdee amansiisaa ta’eefi gufuudhaan hinjilbiinfanne qabaachuu dandeenya.

Guddiinni diinagdee biyyaa amansiisaa ta’ee itti fufiinsa qabaannaan haalli jireenya lammiiwwan hundaatuu dhawaataan fooyya’uunsaa waan hin oolle ta’a.Kanaaf carraaqqii gama kanaan mootummaan ida’amuu kutannoodhaan taasisaa jiru tumsuufi qabatamaan itti hirmaachuun dhimma murteessaadha.

Adeemsa darbe keessatti abbootiin qabeenyaa biyya keenyaa sadarkaa adda addaa irratti argaman sagantaa “Maaddiin Dhalootaa” fi kanneen birootti hirmaannaa maallaqaa taasisuun akkasumas dhiyeessii meeshaalee ijaarsaatiin qooda fudhachuudhaan hojiiwwan lammii hunda boonsuu danda’an akka hojjetamaniif shoora gamasaanii gumaachaniiru.Garafuulduraattis deeggarsa taasisan cimsanii akka itti fufan yaada Kanaan dura kennaniin kan mirkaneessan ta’uun nibeekama.